وڭتۇستىك قازاقستاندا «جاسىل ەل» ەڭبەك جاساقتارىنىڭ جازعى جۇمىس ماۋسىمى باستالدى. وسىعان وراي، شىمكەنتتەگى دەندروساياساباقتا «جاسىل جەلەك جايقالسىن» اتتى سالتاناتتى كەش ۇيىمداستىرىلدى. جيىنعا قاتىسقان وبلىس اكىمىنىڭ ورىنباسارى ۇ.سادىبەكوۆ «جاسىل ەل» ساربازدارىنىڭ جازعى ەڭبەك ماۋسىمىنا ساتتىلىك تىلەپ، ارنايى ۇيىمداستىرىلعان كونسەرتتىك باعدارلامانى تاماشالادى دەپ حابارلايدى وقو اكىمدىگىنىڭ باسپا ءسوز قىزمەتى.

ايتا كەتەيىك، ەلباسى ن.ءا.نازاربايەۆتىڭ باستاماسىمەن 2005 جىلى ەلىمىزدىڭ ەكولوگيالىق جاعدايىن جاقسارتۋعا، جاستاردىڭ وتانعا دەگەن پاتريوتتىق سەزىمدەرىن وياتۋعا جانە ستۋدەنتتەر مەن جۇمىسسىز جاستاردىڭ جۇمىسپەن قامتۋ ماسەلەلەرىن شەشۋگە باعىتتالعان «جاسىل ەل» جاستار ەڭبەك جاساقتارى قۇرىلعان بولاتىن.

وسىناۋ 12 جىل ىشىندە كۇنگەيلىك 13 مىڭنان اسا جاس وبلىسىمىزدىڭ  كوگالداندىرۋ-كورىكتەندىرۋ جۇمىستارىنا جۇمىلدىرىلىپ، ءبىرقاتار شارۋالاردىڭ اتقارىلۋىنا سەبەپشى بولعان ەدى.

بيىل دا بۇل جۇمىستار ماۋسىم ايىنان باستاپ قازان ايىنا دەيىن جالعاسىن تاپپاق. بۇل جىلى «جاسىل ەل» ەڭبەك جاساقتارىنىڭ قۇرامىندا 1275 جاس جۇمىس ىستەپ، ەڭبەك ەتەدى دەپ كۇتىلۋدە. ال ولاردىڭ وتاشا ەڭبەك جالاقىسى 45-50 مىڭ تەڭگە كولەمىندە بولادى.