ارىپتەسى ۇرىپ-سوعىپ ايدالادا قالدىرىپ كەتكەن ولجاس ءولىم اۋزىنان امان قالعان. «كۇرشىم اۋرۋحاناسىنداعى بىلىقتى اشىپ ايتپاسام بولمادى. بۇلاردىڭ جاس مامانعا دەگەن كوزقاراسىن ءبىلىپ جۇرىڭىزدەر» دەيدى ول. ونىڭ ءسوزىن قاز-قالپىندا بەرىپ وتىرمىز.
مەن
كۇرشىم اۋداندىق اۋرۋحاناسىندا 2015 جىلدىڭ اقپانىنان بەرى ىستەپ كەلەمىن. بۇل جەرگە وسكەمەندەگى انا مەن بالا ورتالىعىنان اۋىسىپ كەلدىم. گينەكولوگ دارىگەرمىن.
…بۇل وقيعا اقپان ايىنىڭ باسىندا بولدى. كەشكى ساعات 6-لارعا تامان اۋرۋحاناعا ءيىس تيگەن ەكىقابات ايەل ءتۇستى. زاڭ بويىنشا ءيىس تيگەن، جاعدايى اۋىر جۇكتى ايەلدەر بىردەن جان ساقتاۋ بولىمىنە جونەلتىلىپ، سول ارادان ەم-دوم قابىلداپ، باقىلاۋعا الىنۋى ءتيىس. سەبەبى، ءيىس تيگەننىڭ ءوز سالدارى بولادى. اسىرەسە، بالاعا كەرى اسەر ەتەدى. وسى سەبەپتى ايەلدى بىردەن جان ساقتاۋ بولىمىنە جاتقىزدىم. ءارى قاراي ونى تولىق باقىلاۋىما الدىم.
سەبەبى، ءقازىر دارىگەردىڭ جۇمىسى باستى نازاردا. ەڭبەگى ەسكەرىلە بەرمەيدى، ال قاتەلىگىن بىردەن بايقايدى. ءوز باسىم جۇمىسىمدا ساقتىق پەن جاۋاپكەرشىلىكتى قاتار الىپ جۇرەمىن.
كەلمەي قويدى…
زاڭ بويىنشا جان ساقتاۋ بولىمىندە جاتقاندىقتان جۇكتى ايەلگە رەانيماتولوگتىڭ كەڭەسى قاجەت. اۋرۋحانادا ۇيدەن كەلىپ-كەتىپ جۇرەتىن مامان بار-تىن. ءاتى-جونى باۋىرجان قۇمارعالييەۆ.
حابارلاستىق. كەزەكشى دارىگەرگە: «كەلمەيمىن. قارامايمىن» دەپتى. ءوزىم شىقتىم. ماسەلەنىڭ ءمان-جايىن ءتۇسىندىردىم.
«بۇل ايەل كۇرشىمنىڭ ارجاعىنداعى تەرەكتى اۋىلىنان. الىستا تۇرادى. قال-جاعدايىن تەكسەرۋ كەرەك» دەدىم. «ءقازىر دوپ قۋىپ ءجۇرمىن. سودان كەلگەسىن ءبىر-اق قارايمىن» دەدى. قىسقاسى، كونبەدى. كەلمەدى. ال مەن ۇيگە قايتىپ كەتتىم.
ءبىرازدان كەيىن الگى رەانيماتولوگ ءوزى حابارلاستى. «مىناۋىڭ نە ەي؟ مازاق قىپ تۇرسىڭ با؟ كىم كورىنگەندى نەگە رەانيماسياعا تىعاسىڭ. الگى جۇكتى قاتىنىڭ با، ساپ-ساۋ جاتىر انە» دەدى.
«زاڭ بويىنشا ول سوندا جاتۋ كەرەك. ەگەر جاعدايى جاقسى دەسەڭىز، كىتاپشاسىنا جازىپ بەرىڭىز. مەن روددومعا اۋىستىرىپ الامىن» دەدىم. اڭگىمە وسى جەردەن ءبىتتى.
زاڭ بويىنشا بولعان جايتتى ءبىز باس دارىگەرگە جەتكىزۋگە ءتيىستىمىز. باس دارىگەردىڭ ەمدەۋ ءىسى جونىندەگى ورىنباسارىنا حابارلاستىم. قۇمارعالييەۆتىڭ جۇكتى ايەلدىڭ جاعدايىنا قاتىستى شىعارعان شەشىمىن جانە جان ساقتاۋ بولىمىنەن شىعارىپ جىبەرگەنىن ايتتىم. باسى-ارتىق ەشتەڭە جوق.
ءاي، اكەڭنىڭ بالاسى…
بىرەر ساتتەن كەيىن الگى رەانيماتولوگ ماعان قايتا شىقتى. «ءاي، اكەڭنىڭ بالاسى… باس دارىگەرگە نەگە ايتاسىڭ؟ نەگە «جالوۆاتسيا» ەتەسىڭ» دەيدى.
«بۇل شاعىم ەمەس، ءسىزدىڭ جاتقىزباي قويعانىڭىز راس. زاڭ بويىنشا رەانيماسيادا جاتۋ كەرەك ەدى. ءيىس تيگەننىڭ سالدارى جامان. بۇگىن بىلىنبەگەنمەن، كەلەسى كۇنى بايقالۋى مۇمكىن جانە قاتتى سەزىلەدى. ال بۇل جۇكتى ايەل…» دەدىم مەن.
قىسقاسى، تىڭداعان جوق. اكەم بار، شەشەم بار…ءبارىن ءبىر-بىر سىباپ شىقتى. «ءقازىر ۇيىڭە كەلەم. سىرتقا شىق» دەدى. كولىگىنە وتىردىق. ءسوز تۇسىنبەيدى.
«بۇل جۇمىس بارىسى. ءبىر ەمەس، ەكى ەمەس بىرنەشە رەت قايتالانىپ تۇر. ادام ءومىرى ويىنشىق پا، سىزگە؟» دەدىم مەن.
شىنىمەن سولاي. بۇدان بۇرىن تاعى ءبىر جۇكتى ايەلدەن قان كەتكەن كەزدە ارەڭ جاتقىزعان. الگى ايەل قۇداي ساقتاپ امان قالدى. رەانيماسيا بۇل كىسىنىڭ جەكە مەنشىگى ەمەس قوي؟! اربىردەن سوڭ بۇل ادام ءومىرى.
سويلەسىپ وتىرعاندا اڭداماپپىن، كۇرشىمنىڭ شەتىنە الىپ شىعىپتى. «ماشىنەدەن ءتۇس» دەدى. ءتۇستىم. سەنسەڭىز، ەلۋدەن اسقان ەل اعاسى. ەڭگەزەردەي. ەنتەلەپ تۇر. توبەلەسپەكشى. جۇدىرىعىن ءتۇيىپ العان. اكەڭدەي اداممەن توبەلەسپەك تۇگىل، سالعىلاسقاننىڭ ءوزى ۇيات…
وسىنى ايتا بەرگەنىم سول ءبىر قويىپ قالدى. نەمەن ۇرعانىن بىلمەيمىن. ەسىمنەن تانىپ قاپپىن. ويانسام قول-اياعىم سىرقىراپ بارادى. ايدالادا جاتىرمىن. سولاي. ۇرعاننان كەيىن دالادا تاستاپ كەتكەن. ساقىلداعان سارى اياز. بەتى-اۋزىم قان. قايتا ويانعانىمدى ايتىڭىز. مۇنداي سۋىقتا اياق-قولىڭدى ءۇسىتىپ الۋعا ءبىر ساعاتتىڭ ءوزى جەتىپ جاتىر.
سۇيرەتىلىپ پوليسياعا باردىم. ارىز جازدىم. اۋرۋحاناعا جاتقىزدى.
كەلەسى كۇنى قان قىسىمىم كوتەرىلىپ، جاعدايىم اۋىرلاپ كەتتى. تاعى ەسىمنەن تانىپ قالدىم. سويتسەم ميعا قان قۇيىلىپتى. شۇعىل تۇردە وسكەمەنگە الىپ كەتتى.
قىسقاشا ايتسام، باسىمنان وتكەن جاعداي وسى. رەانيماسيادان شىققانىم كەشە عانا.
بۇيتكەن جاس مامانى قۇرىسىن
ءقازىر ارىپتەسىم باۋىرجان قۇمارعالييەۆكە قاتىستى تەرگەۋ امالدارى ءجۇرىپ جاتىر.
قىنجىلتاتىنى، قورلىعى ءوتىپ كەتتى. تۇگى كەتكەن جوق. تايراڭداپ ءجۇر. ولسەم دە وكىنبەس ەدى. اۋدانداعى جۋان بايدىڭ ءبىرى. ءاي دەيتىن، اجە. قوي دەيتىن قوجا جوق وعان. باس دارىگەر ءتىپتى قىزمەتتىك تەكسەرۋ جۇرگىزۋگە دە باتپادى. قۇداي بىلەدى، مەنەن بۇرىن دا تالاي جاس مامانعا اكىرەڭدەگەن بولار.
مەنى جاس مامان رەتىندە كۇرشىمنىڭ باس دارىگەرى مارات بىلەيمەنوۆتىڭ ءوزى وسكەمەننەن شاقىرتىپ العان. جۇمىسىما جاۋاپتى بولدىم. وتباسىن قۇردىم. مىنە، ەكى جىل ءوتتى. بىلتىر اۋرۋحانانىڭ ۇزدىك دارىگەرى اتاندىم. سونىڭ ءبارى نە ءۇشىن؟ جاس مامان رەتىندە ءوزىم بىلمەيتىن وڭىرگە كەلىپ، ومىرىمنەن ايىرىلا جازدادىم.
ءقازىر كەتىپ بارامىن. جاس مامان بولعانىم قۇرىسىن. باسقاسىن بىلمەيمىن، ءبىراق كۇرشىمدەگى جاس مامانعا دەگەن كوزقاراس وسىنداي. وسى بىلىقتى ايتۋ ءۇشىن، سىزدەرگە حات جازدىم» – دەيدى ولجاس.
P.S. بۇعان كۇرشىم اۋداندىق اۋرۋحاناسىنىڭ باس دارىگەرى نە دەر ەكەن؟ جاس مامانعا قاستاندىق جاسالىپتى. جاس ماماندى ءولىمشى قىپ ساباعان ارىپتەسى جۇمىسىنان كەتپەپتى. وسى راس پا؟ جاۋاپ كۇتەمىز.
دايىنداعان، دۋمان بىقاي
