اكىمشىلىك-ىسكەرلىك ورتالىقتا 7، 9 جانە 12 قاباتتى جالپى اۋدانى 350 مىڭ ش.م. بولاتىن 82 تۇرعىن ءۇيدىڭ قۇرىلىسى مەملەكەتتىك بيۋدجەت ەسەبىنەن جۇرگىزىلۋدە. 800-گە جۋىق پاتەر يپوتەكا ارقىلى جانە كەزەكتە تۇرعان وتباسىلارعا ۇيلەستىرىلىپ جاتىر.
12 قاباتتى 10 تۇرعىن ءۇي الداعى قىركۇيەك، قازان ايلارىندا پايدالانۋعا بەرىلەدى. تۇركىستان وبلىسىنىڭ اكىمى ءومىرزاق شوكەيەۆتىڭ توراعالىعىمەن وتكەن اپتالىق اپپارات وتىرىسىندا ايماق باسشىسىنا تۇرعىن ءۇي تۋرالى سوڭعى مالىمەتتەر باياندالدى.
تۇركىستان قالاسىنىڭ اكىمى نۇربول تۇراشبەكوۆ سالىنىپ جاتقان كوپقاباتتى تۇرعىن ۇيلەردىڭ جاعدايى مەن قۇرىلىس جۇمىستارىنىڭ بارىسى تۋرالى ايتتى.
وبلىس ورتالىعىنداعى 2 مىڭنان استام پاتەرلى 12 قاباتتى 29 تۇرعىن ءۇي قىركۇيەك-قاراشا ايلارىندا قابىلداۋدان وتەتىن بولادى. قۇرىلىس باسىندا مىڭنان استام قۇرىلىسشى ەڭبەك ەتۋدە.
شاھاردا جالپى سانى 48 تۇرعىن ءۇي جەكە ينۆەستورلار ەسەبىنەن بوي كوتەردى. 12 قاباتتى 6 تۇرعىن ءۇي جىل سوڭىنا دەيىن ەل يگىلىنە بەرىلمەك. جەتى قاباتتى 15 ءۇيدىڭ قۇرىلىسى دا قارقىندى. سونىمەن قاتار، 9 قاباتتى 5 تۇرعىن ءۇيدىڭ قۇرىلىسى كەلەر جىلدىڭ باسىندا تولىق اياقتالماق.
جينالىستا تۇركىستان قالاسىندا سالىنىپ جاتقان نىساندار مەن ينجەنەرلىك ينفراقۇرىلىم جۇيەلەرىنىڭ جاعدايى تۋرالى باياندالدى. وبلىس اكىمى 20-دان استام جاڭا نىسانداردىڭ قۇرىلىس بارىسى تۋرالى سوڭعى مالىمەتتەرمەن تانىستى. جاۋاپتى باسشىلارعا قۇرىلىستى بەلگىلەنگەن كەستەگە سايكەس اياقتاۋدى تاپسىردى.
