بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ءوڭىرىمىزدىڭ ارداگەر ۇستازدارى مەن ءبىلىم سالاسىنىڭ ماماندارىن ءتول مەرەكەلەرىمەن قۇتتىقتاپ، ماراپاتتادى.



– ۇستازدار كاسىبي مەرەكەسى – بۇكىل حالىقتىق مەرەكە. الەمدەگى ءار ادامعا ءبىلىم بەرىپ، ماماندىق تاڭداۋمەن قاتار ءومىر جولىنا باعىت بەرەتىن – ۇستاز. ەندەشە، ءتول مەرەكەلەرىڭىز قۇتتى بولسىن، قۇرمەتتى ۇستازدار! ەلباسىمىز اتاپ وتكەندەي، قازاقستاندىقتاردىڭ ەشقاشان بۇلجىمايتىن ەكى ەرەجەسىنىڭ ءبىرىنشىسى - ۇلتتىق كود پەن ۇلتتىق مادەنيەتتىڭ ساقتالىپ، رۋحاني جاڭعىرۋدى ىسكە اسىرۋدا ۇستازداردىڭ ءرولى ءبىرىنشى كەزەكتە تۇرعانى انىق. بالا جۇرەگىنە جول تابا بىلەتىن، رۋحاني ازىق بەرەتىن دە -  ۇستاز. تەك ناعىز ۇستاز عانا ەگەمەن ەلگە لايىقتى ۇرپاق تاربيەلەي الادى. بۇعان وبلىس ۇستازدارىنىڭ بۇگىنگى تاڭداعى شىنايى ەڭبەكتەرى دالەل. ۇستازدارىمىزدىڭ ەڭبەك جولى - ءاردايىم جاستارىمىز ءۇشىن وشپەس ۇلگى! – دەدى ج.تۇيمەبايەۆ.

بۇدان كەيىن وبلىس اكىمى ۇستازدارمەن تاقىرىپتىق اڭگىمە، سۇراق-جاۋاپ، جاڭارتىلعان ءبىلىم باعدارلاماسى مەن تاجىريبە الماسۋ سىندى تاقىرىپتاردا سۇحباتتاستى. ارداگەر ۇستازدار دا ءوز پىكىرلەرىن ءبىلدىرىپ، ايماق باسشىسىنىڭ قۇتتىقتاۋىنا العىس ءبىلدىردى.«بۇكىل ۇستازدار قاۋىمىن مەرەكەلەرىمەن قۇتتىقتايمىن! بىزدە ءبىلىم بەرۋگە بارلىق جاعداي جاسالعان. مۇمكىندىكتەر قاراستىرىلعان. بالاباقشالار دا، مەكتەپتەر مەن كوللەدج، جوعارى وقۋ ورىندارى دا جەتكىلىكتى، – دەدى ارداگەر ۇستاز سايلاكۇل باراحوۆا. – مىقتى ماماندارىمىز دا بار. تەك ەندى جاس ۇرپاققا ساپالى ءبىلىم بەرىپ، سانالى ۇرپاق تاربيەلەپ شىقساق بولعانى. ارينە، ۇستاز بولۋ وڭاي ەمەس. بالالاردى دا وقىتۋ كەرەك، ساپالى ءبىلىم بەرۋ ءۇشىن ءوزىڭ دە وقۋ كەرەكسىڭ. دەگەنمەن، ءبىلىم مينيسترلىگىن باسقارعان ازامات وبلىسىمىزدى باسقارىپ وتىرعاندا جامان جۇمىس ىستەۋگە قۇقىعىمىز جوق» – دەپ قوستى سايلاۋكۇل جاپبار قىزى.

جيىن بارىسىندا جانسەيىت قانسەيىت ۇلى 9 ارداگەر ۇستاز بەن 26 ءمۇعالىمدى العىس حاتپەن ماراپاتتادى.

ايتا كەتەيىك، بۇگىندە وقو-دا 638 مىڭ وقۋشىعا 70 مىڭعا جۋىق ءمۇعالىم ساباق بەرەدى. وبلىس دەڭگەيىندەگى ءبىلىم سالاسىندا ىلگەرىلەۋشىلىك بار. ءوڭىردىڭ دارىندى وقۋشىلارى رەسپۋبليكالىق، حالىقارالىق دەڭگەيدەگى ءبىلىم سايىستارىندا جۇلدەگەر اتانۋدا. جالپى ءبىلىم بەرەتىن پاندەردەن رەسپۋبليكالىق وليمپيادادا وبلىس كومانداسى بىرنەشە جىل بويى «ەڭ ۇزدىك وليمپيادالىق كوماندا» اتالىمى مەن I، III جۇلدەلى ورىنداردى يەلەندى. بيىلعى تامىز كەڭەسىندە تاجىريبەلى ۇستازدارعا پاتەر كىلتتەرى مەن ءبىلىم جانە عىلىم مينيسترلىگىنىڭ العىس حاتتارى، قۇرمەت گراموتالارى تاپسىرىلدى. سونىمەن قاتار ماقتاارال اۋدانىنداعى «دارىن» مەكتەپ-ينتەرناتى مەن قازىعۇرت اۋدانىنداعى ج.قاپپاروۆ اتىنداعى فيزيكا-ماتەماتيكالىق مامانداندىرىلعان مەكتەپ-ينتەرناتى رەسپۋبليكاداعى ەڭ ۇزدىك ءبىلىم ۇيىمدارىنىڭ وندىعىنا ەندى.



وقو اكىمىنىڭ باسپا ءسوز قىزمەتى