بۇل تۋرالى ازاتتىق راديوسى حابارلايدى.
قاماۋدا ەكى اي وتىرعان بەلسەندى ايىبىن مويىنداپ، سوت زالىنان بوساپ شىقتى. ورال قالالىق سوتى سۋدياسى رۋسلان جۇماعۇلوۆ وقىعان ۇكىم بويىنشا، جانات ەسەنتايەۆ بۇل مەرزىم ىشىندە قارسىلىق اكسيالارىنا، ميتينگ پەن فلەشموبقا، شەرۋ مەن پيكەتكە، حالىقارالىق ۇيىمداردىڭ سەمينارلارى مەن ترەنينگتەرىنە قاتىسا المايدى، كونسەرت قويا المايدى، قوعامدىق-ساياسي جانە الەۋمەتتىك-ەكولوگيالىق تاقارىپتا پوست جازا المايدى. جانات ەسەنتايەۆ پەن ونىڭ قورعاۋشىلارى (ابزال قۇسپان، لاريسا سيمونەنكو مەن ايجان ەسەنتايەۆا) بۇل شارتتارمەن تولىق كەلىستى.
قازاقستان بيلىگىن سىنايتىن اندەرىمەن تانىمال جانات ەسەنتايەۆ قازاقستانداعى جەر ماسەلەسىنە قاتىستى ميتينگىلەر تۇسىندا «الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني الاۋىزدىق تۋدىرۋ» دەگەن ايىپپەن 17 مامىردا ەكى ايعا قامالعان. وعان "Facebook پاراقشاسىندا ازاماتتاردىڭ ۇلتتىق قادىر-قاسيەتىن قورلاپ، ارازدىق تۋدىراتىن جازبالار جاريالاعان" دەگەن دە ايىپ تاعىلعان.
30 ماۋسىمدا ەسەنتايەۆ تەرگەۋمەن پروسەسسۋالدى كەلىسىم جاساپ، تاعىلعان ايىپتاردى مويىنداعان. ال 9 شىلدەدە ينتەرنەتتە جاريالانعان حاتىندا بەلسەندى "اعايىن ورىس حالقىنان" كەشىرىم سۇراپ، ءوزىنىڭ الەۋمەتتىك جەلىلەردەگى جازبالارىن "ەموسيا" دەپ اتاعان.
