جامبىل وبلىسىنداعى اسكەري بولىمدە بولعان جارىلىسقا ايىپتى دەپ تانىلعان ساربازداردىڭ جازا مەرزىمى تاعى ۇزاردى. مۇنداي شەشىم سوتتالعاندار اپەللياسيالىق شاعىم تۇسىرگەننەن كەيىن قابىلداندى، دەپ حابارلايدى Dalanews.kz.
ەسكە سالايىق، قايعىلى وقيعا وسىدان ەكى جارىم جىل بۇرىن بولعان ەدى. سوت ۇكىمىنە سايكەس، قاتارداعى جاۋىنگەرلەر ەربولات تۇرانوۆ پەن اسەت ءاشىرباي ماتانى ورتەپ، وق-دارىلەر تۇرعان قويماعا تەرەزەدەن ادەيى لاقتىرىپ جىبەرگەن. وسىلايشا ەكەۋى كومانديرلەرىنەن كەك العىسى كەلگەن. ناتيجەسىندە بىرنەشە جارىلىس ورىن الدى. قايعىلى وقيعادان 18 ءورت ءسوندىرۋشى مەن اسكەري قىزمەتكەر قازا تاۋىپ، 100-گە جۋىق ادام جاراقات العان بولاتىن. 20 جاستاعى جىگىتتەر باستاپقىدا كىناسىن مويىنداعانىمەن، كەيىن سوزدەرىنەن باس تارتتى.
شىمكەنت اسكەري سوتى ولاردى توعىز جىلعا باس بوستاندىعىنان ايىردى.
كتك ارناسىنىڭ مالىمەتىنشە، اسكەريلەر سوتقا اپەللياسيالىق شاعىم تۇسىرگەن. وسىعان بايلانىستى باسقارما جاڭا شەشىم قابىلداپ، سوتتالعانداردىڭ باستاپقى جازالارىنا ءتورت جىل قوسىلدى. بۇرىنعى بولىمشە كومانديرى مەن وق-دارىلەردى ساقتاۋ ءبولىمى باستىعىنىڭ ۇكىمى دە وزگەرتىلدى. ولار بۇعان دەيىن جازادان جالتارعان ەدى. ەندى جاڭا سوت ۇكىمىنە سايكەس، ەكەۋى قارۋ-جاراق ۇستاۋ ەرەجەسىن بۇزعانى ءۇشىن بەس جىلعا باس بوستاندىعىنان ايىرىلدى.
