جابايى جارنامامەن كٷرەس
ەكٸ اي بۇرىن وبلىس ەكٸمٸ دانيال احمەتوۆ جول جيەگٸندەگٸ ۋچاسكەلەردٸ جٶنگە كەلتٸرۋ تۋرالى تاپسىرما بەرگەن ەدٸ. ٸسكە بٸلەك سىبانا كٸرٸسكەن بەلسەندٸلەر وسى ارالىقتا سەمەيدٸڭ بٸر ٶزٸندە 47 جارناما كونسترۋكتسيياسىن جاڭارتىپ, كٶشە بويىنان 50 جارناما قۇرىلىسى مەن كەرگٸلەردٸ الىپ تاستادى. ٶسكەمەننٸڭ ٶڭٸن قاشىرعان, زاڭسىز ورناتىلعان سىرتقى «جار سالعىشتار» قاتارى دا كٶشتەن قالار ەمەس.
– سەمەي مەن ٶسكەمەن كٶشەلەرٸن قاجەتسٸز جارنامالاردان بوساتۋ كەرەك. نە قازٸرگٸ زامان ٷردٸسٸنە ساي ەمەس, نە قالاعا كٶرٸك بەرٸپ تۇرعانى شامالى. قاراساڭىزدار, جولدىڭ ەكٸ جيەگٸندە تولىپ تۇرعان كەسٸپكەرلەردٸڭ جارناماسى. بيزنەسمەندەر قوعامدى سىيلاۋى كەرەك. بٸز ولارعا ەركەز بارىنشا قولداۋ كٶرسەتەمٸز, بٸراق ىڭعايلارىنا جىعىلمايمىز, – دەدٸ كەڭەيتٸلگەن اپپارات وتىرىسىندا سٶز العان وبلىس ەكٸمٸ دانيال احمەتوۆ.
جول جيەگٸن سىرتقى جارنامالاردان تازارتۋعا باعىتتالعان ٸستٸڭ بارىسىن وبلىس ەكٸمٸنٸڭ ورىنباسارى سەرٸك اقتانوۆ باياندادى. ايتۋىنشا, جارناما قۇرىلىسى مەن كەرگٸلەردٸ الىپ تاستاماس بۇرىن رۇقسات قاعازدارىنىڭ بار-جوعى, ستاندارت تالاپتارى مەن «تٸل تۋرالى» زاڭنىڭ ساقتالۋى قاتاڭ تٷردە تەكسەرٸلەدٸ. كەي جاعدايدا, تٸپتٸ, سوتقا جٷگٸنۋگە تۋرا كەلەدٸ. ايتا كەتۋ كەرەك, بۇل جۇمىستى اۋدان ورتالىقتارىندا دا جالعاستىرۋ جوسپاردا تۇر.
شقو ەكٸمٸنٸڭ باسپاسٶز قىزمەتٸ
https://dalanews.kz/30625
