مەملەكەت باسشىسى قاسىم-جومارت توقايەۆ ىشكى ىستەر ءمينيسترى ەرجان سادەنوۆتى قابىلدادى. ۆەدومستۆو باسشىسى ەلىمىزدەگى كريمينوگەندىك احۋال تۋرالى مالىمەت بەردى، دەپ حابارلايدى Dalanews.kz.

ىشكى ىستەر ءمينيسترىنىڭ مالىمەتىنشە، جىل باسىنان بەرى قىلمىس دەڭگەيى تومەندەگەن. ۇرلىق، توناۋ، قاراقشىلىق، بۇزاقىلىق، سونداي-اق تۇرمىستىق زورلىق-زومبىلىق، ماس كۇيىندە جانە كوشەلەردە جاسالاتىن قۇقىق بۇزۋشىلىقتاردىڭ سانى ايتارلىقتاي ازايعان.

سادەنوۆ قىلمىسكەرلەردى ىزدەستىرۋ جۇمىسىنىڭ ناتيجەسى تۋرالى باياندادى. جىل باسىنان بەرى 782 ادام، ونىڭ ىشىندە 79 ازامات شەتەلدە ۇستالعان. ىزدەۋدە جۇرگەن 16 ادام ەلگە ەكستراديسيالانعان.

سونىمەن قاتار ادام كوپ جينالاتىن جەرلەردە ازاماتتاردىڭ قاۋىپسىزدىگىن قامتاماسىز ەتۋ جونىندە اقپارات بەردى. تەرروريستىك ارەكەت تۇرعىسىنان العاندا وسال ەكى مىڭنان استام نىسان، سونىڭ ىشىندە مەكتەپتەر، جوعارى وقۋ ورىندارى، ساۋدا جانە ويىن-ساۋىق ورتالىقتارى، كونسەرت زالدارى مەن باسقا دا تاريحي-مادەني عيماراتتار تەكسەرىلگەن؛

مينيستر كوشى-قون ءىسىن باقىلاۋ جۇمىستارى جايىندا ەسەپ بەردى. جىل باسىنان بەرى ەلىمىزگە 4،2 ميلليون شەتەل ازاماتى كەلىپ، ونىڭ 4 ميلليونعا جۋىعى شەكارادان كەرى شىققان. ولاردىڭ 90 پايىزى – تمد ازاماتتارى.

سونداي-اق ۇيىمداسقان، كيبەر جانە ەسىرتكى قىلمىستارىنا قارسى ءىس-قيمىل جونىندەگى، سونداي-اق قۇقىق بۇزۋشىلىقتاردىڭ، ونىڭ ىشىندە تۇرمىستىق زورلىق-زومبىلىقتىڭ الدىن الۋ، سۋ تاسقىنى سالدارىن جويۋ، جول قاۋىپسىزدىگىن قامتاماسىز ەتۋ، كەزەكتەن تىس اتتەستاسيالاۋ باعىتتارىنداعى تاپسىرمالارىنىڭ ورىندالۋ بارىسىن تانىستىردى.

ۆەدومستۆو باسشىسى كوشەلەردەگى قاۋىپسىزدىك دەڭگەيىن ارتتىرۋ جانە قۇقىق بۇزۋشىلىقتارعا مۇلدە توزبەۋشىلىك قاعيداتىن قامتاماسىز ەتۋ ءۇشىن قابىلدانىپ جاتقان شارالار تۋرالى ايتتى.

قاسىم-جومارت توقايەۆ ەلىمىزدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ جونىندە ءبىرقاتار تاپسىرما بەردى.