كەلىسىمگە سايكەس، الداعى ۋاقىتتا قازۇۋ اتالعان ينستيتۋتپەن بىرلەسىپ، ماگيستراتۋرا جانە دوكتورانتۋرا باعدارلامالارى بويىنشا ۆيرۋسولوگ ماماندارىن دايارلاماق.
كوروناۆيرۋس ىندەتى كەزىندە قازاقستاندا ەپيدەميولوگيا جانە ۆيرۋسولوگيا سالاسىنداعى ماماندار تاپشىلىعى سەزىلگەنى جاسىرىن ەمەس. وسى ولقىلىقتىڭ ورنىن تولتىرۋ ماقساتىندا ەلىمىزدەگى جەتەكشى جوعارى وقۋ ورنى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىمەن بىرلەسىپ، بىلىكتى ماماندار دايارلاۋدى قولعا الدى.
كەزدەسۋ بارىسىندا تاراپتار وسى باعىتتاعى ىنتىماقتاستىقتى ارتتىرۋدىڭ ماڭىزىنا توقتالىپ، الداعى جوسپارلارمەن ءبولىستى.
– ەلىمىزدە العاش رەت قازۇۋ-دىڭ بيولوگيا جانە بيوتەحنولوگيا فاكۋلتەتىندە ۆيرۋسولوگ ماماندارى دايارلاناتىن بولادى. سونىمەن قاتار كادرلاردى دايىنداۋعا بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ ارنايى زەرتحانالارى دا ۇلەس قوسادى. بۇل باستاما – سالاداعى ءبىرقاتار تۇيىتكىلدى ماسەلەلەردى وڭتايلى شەشۋگە ءوز سەپتىگىن تيگىزبەك، – دەپ اتاپ ءوتتى قازۇۋ رەكتورى جانسەيىت تۇيمەبايەۆ.
وسى ورايدا ايتا كەتەيىك، «ۆيرۋسولوگيا» ءبىلىم بەرۋ باعدارلاماسى پراكتيكالىق وقۋعا باسىمدىق بەرەدى. وقۋ پروسەسىنىڭ باسىم بولىگى زەرتحانالىق جاعدايدا جۇمىس جاساۋعا بەيىمدەلگەن. بولاشاق ماماندار ءبىلىم الۋ بارىسىندا جاڭا ۆيرۋستاردىڭ تۇرلەرىن، ولاردى زەرتتەۋ ادىستەرى مەن ءتۇرلى سيپاتتارىن انىقتاۋعا ماشىقتانادى. سونداي-اق زەرتحانادا بىلىمگەرلەر دياگنوز جاساۋعا جانە زەرتتەۋگە داعدىلانباق.
ءوز كەزەگىندە بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى تۇلەكتەردى جۇمىسپەن قامتاماسىز ەتىپ، جاس مامانداردى ۆيرۋسولوگيا، بيولوگيا جانە بيوتەحنولوگيا سالالارى بويىنشا بىلىكتىلىكتى ارتتىرۋ كۋرستارىنان وتكىزەدى.
– الداعى ۋاقىتتا ءبىزدىڭ عىلىمي-زەرتتەۋ ينستيتۋتىنىڭ جانىنان ارنايى ديسسەرتاسيالىق كەڭەستەر اشىلادى. سونداي-اق عىلىمي-زەرتتەۋ جۇمىستارىن جان-جاقتى جۇرگىزۋگە جانە ءبىلىم الۋشىلارعا ادىستەمەلىك كومەك كورسەتۋگە شەتەلدىك عالىمدار تارتىلاتىن بولادى. ءوز كەزەگىندە بۇل باستاما كادر تاپشىلىعىن جويۋمەن قاتار، بىلىكتى دە ءبىلىمدى ماماندار مەكتەبىنىڭ قالىپتاسۋىنا ىقپال ەتەتىن بولادى، – دەيدى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا.
