گۇلميرا ساتىبالدى تاعى ءبىر قىلمىستىق ىسكە كۇدىكتى رەتىندە تانىلدى، دەپ حابارلايدى Dalanews.kz قازتاگقا سىلتەمە جاساپ.
«ساتىبالدى گ.ك. جانە وزگە دە تۇلعالارعا قاتىستى Vostochka كوپفۋنكسيالى تۇرعىن ءۇي كەشەنىنىڭ قۇرىلىسى كەزىندە زاڭسىز ارەكەتتەر جاساۋ دەرەگى بويىنشا قىلمىستىق ءىس تەرگەلىپ جاتىر»، – دەيدى انتيكور.
ايتا كەتەيىك، بۇعان دەيىن الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا گۇلميرا ساتىبالدى مەن ونىڭ كومەكشىسىنە قاتىستى سوت ۇكىمى شىقتى.
الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى گۇلميرا ساتىبالدىنى 12 جىلعا باس بوستاندىعىنان ايىرۋ جازاسىنا تاعايىندادى، ال كومەكشىسى ءمادي باتىرشايەۆتى 9 جىل باس بوستاندىعىنان ايىرىلدى.
بۇدان بۇرىن بولعان سوت جارىسسوزىندە گۇلميرا ساتىبالدىنىڭ كولىك جۇرگىزۋشىسى ءارى كومەكشىسى ءمادي باتىرشايەۆ بۇل قىلمىستىق ىسكە ەش قاتىسى جوعىن ايتىپ، سۋديادان ءادىل تورەلىك جاساۋدى ءوتىندى.
ەسكە سالايىق، 2023 جىلى گۇلميرا ساتىبالدىعا ەكى رەت سوت ۇكىمى شىققان ەدى. 2023 جىلى ماۋسىمدا قىزىلوردا سوتى "بوتەننىڭ مۇلكىن يەمدەنۋ جانە جىمقىرۋ" بابى بويىنشا ايىپتالعان گۇلميرا ساتىبالدىنى 8 جىلعا باس بوستاندىعىنان ايىرعان ەدى. ونىڭ الدىندا استانا سوتى "ادام ۇرلاۋ" (125-باپ) جانە "وزىنشە بيلىك ەتۋ" (339-باپ) باپتارى بويىنشا ايىپتالعان گۇلميرا ساتىبالدىنى 7 جىلعا سوتتاعان.
