الماتىداعى ەڭ ءزاۋلىم «ريتس كارلتون» قوناق ءۇيىنىڭ 30-شى قاباتىندا «ەير استانا» اۋە كومپانياسى قازاق جۋرناليستەرىمەن كەزدەسىپ الداعى جىلداعى جوسپارلارىمەن ءبولىستى.
اتاپ ايتساق، اۋە كومپانياسىنىڭ بۇقارامەن بايلانىس جونىندەگى مەنەدجەرى تىلەك ءابدىراحىموۆ كومپانيانىڭ بيىلعى جىلعى اتقارعان جۇمىستارىنا توقتالىپ ءوتتى. ونىڭ ايتۋىنشا، ازىرگى كۇنى «ەير استانانىڭ» قاراماعىنداعى ۇشاقتاردىڭ بارلىعى سوڭعى ۇلگىدەگى ۇشاقتار، ولاردىڭ ورتاشا جاسى 5،3 جىلدى قۇرايدى.
ايتا كەتەلىك، جاقىندا عانا وتاندىق اۋە كومپانياسى AirTransportWorld باسىلىمىنىڭ «اۆياسيا نارىعىنىڭ كوشباسشىسى 2015» جۇلدەسىن جەڭىپ العان بولاتىن. ال بۇل بايقاۋ بويىنشا اۋە تاسىمالداۋشىلاردىڭ جۇمىس ساپاسى حالىقارالىق ۇلگىدەگى قاۋىپسىزدىگى جانە بورتتاعى ءمىنسىز قىزمەتىنە قاراي باعالانعان.
تىلەك ءابدىراحىموۆ ايتىپ وتكەندەي، «ەير استانا» نەبارى 3 جىلدىڭ ىشىندە 21 جاڭا ۇشاقپەن تولىققان جانە 19 جاڭا باعىتپەن جاڭارتىلىپتى. «بۇل ءوز كەزەگىندە كومپانيانى ەۋرازيا قۇرلىعىنداعى ءىرى اۋە تاسىمالداۋشىنىڭ بىرىنە اينالدىرىپ وتىر. ازيانى بەتكە العان تمد جولاۋشىلارىنىڭ 60 پايىزىنا كومپانيانىڭ وڭتايلاندىرعان باعىتتارى وڭ سەپتىگىن تيگىزدى. وسىنىڭ ناتيجەسىندە ترانزيتتىك جولاۋشىلار سانى 2010 جىلداعى 10 مىڭ ادامنان 2014 جىلعى 200 مىڭعا ادامعا جەتتى» دەدى ول ءوز كوزىندە. ال اتالعان باسىلىمنىڭ جۇلدەسىن بۇدان بۇرىن EtihadAirways،TurkishAirlines جانە KLM سىندى الەمنىڭ ۇزدىك اۋە تاسىمالداۋشىلارى يەلەنگەن بولاتىن
«ريتس كارلتون» قوناق ءۇيىنىڭ 30-شى قاباتىندا وتكەن وسىناۋ ءىس شارانىڭ اياسىندا ءتۇرلى بايقاۋلار ۇيىمداستىرىلىپ، اقپارات قۇرالدارى جاڭا جىل قارساڭىندا اۋە كومپانياسىنىڭ سىيلىقتارىنا يە بولدى. ۇيىمداستىرۋشىلار بەللا تورمىشيەۆا، تىلەك ءابدىراحىموۆ جانە اۋە كومپانياسىنىڭ الەۋمەتتىك جوبالار جونىندەگى ۇيلەستىرۋشىسى ساۋلە سەرعازى جۋرناليستەردى جاڭا جىلمەن قۇتتىقتاپ، بىزدەرمەن جۇمىس ىستەۋگە ءاردايىم ءازىر ەكەندىگىن ايتتى.
دۋمان بىقاي
سۋرەتتى تۇسىرگەن، جەڭىس ىسقاباي
