92 جىلدىق تولاسسىز تاريحى بار اكەم تەاتردىڭ جاڭا باسشىسى اسحات ماقسىم ۇلى ءازىربايجان مامبەتوۆ سەكىلدى تەاتردىڭ مارتەبەسىن ارتتىرۋدى قولعا العاندىعىن العا تارتادى. «التىن ءداۋىردىڭ» اينالىپ كەلۋى ءۇشىن ءبىلىمى مەن بىلىكتىلىگىن بارىن سالاتىنىن العا تارتتى. سول ءۇشىن دە حالىقارالىق دەڭگەيدە قازاقتىڭ بار بولمىسىن ناسيحاتتايتىن قويىلىمداردى كوپتەپ شىعارۋعا بەل بۋىپ وتىرعانىن دا ايتتى. كوپتەن بەرى ساحنالانباي قالعان سپەكتاكلدەردى ارتىستەر قۇرامى الداعى ايدا قايتىپ سومداماق نيەتتە.
– شىڭعىس ايتماتوۆتىڭ دا «انا جەر انا» حالىقتىق تۇرعىداعى كەڭ ەپيكالىق تىنىستى ۇلكەن پولوتنو بار. وسى پولوتنونى قايتادان ورالتۋ. ءسۇيىنباي بابامىز تۋرالى جازىلعان بەلگىلى دراماتۋرگ مەملەكەتتىك سىيلىقتىڭ يەگەرى يران عايىپتىڭ «ءسۇيىنباي» دەگەن دراماسى بار. وسى ءسۇيىنبايدى ساحنالاۋ وسى ماۋىسىمداعى ءبىزدىڭ جۇمىسىمىز بولادى، – دەدى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى اسحات ماەميروۆ.
«الاتاۋدان سارىارقاعا سالەم!» وسىنداي ۇرانمەن قارا شاڭىراق ەلوردانىڭ 20 جىلدىق تويىنا ارنايى گاسترولدىك ساپارمەن بارۋدى دا جوسپارلاپ قويىپتى.
«تەاتر كوكتەمى» فەستيۆالى دە ءداستۇرلى تۇردە جالعاسىن تاپپاق. وسى جولى حالىق ءارتىسى ءانۋار مولدابايەۆتىڭ رۋحىنا باعىشتاۋدى قۇپ كورگەن. قاليبەك قۋانىشبايەۆ سىندى ساڭلاق اكتەردىڭ 125 جىلدىق مەرەيتويىنا وراي، ناۋرىز ايىندا ارنايى «اباي» قويىلىمى ساحنالانباقشى.
اسحات ماقسىم ۇلى جاڭا قىزمەتكە تاعايىنداۋ تۋرالى بۇيرىق شىققاننان كەيىن، ۇلى تۇلعالاردىڭ باسىنا بارىپ زيارات ەتكەنىن دە جاسىرمادى. ال ونەردە ارىپتەس، ومىردە دوسى تەاتردىڭ بۇرىنعى باسشىسى ەرلان ءبىلالدىڭ قارا شاڭىراقتىڭ ساحناسىنداعى جۇمىسىن جالعاسترا بەرەتىنىن دە جەتكىزدى. ويتكەنى، ەرلان بىلالدەن باسقا اكتەر سومداي المايتىن ونىڭ وزىندىك رولدەرى بار.
– ەرلان وسى تەاترداعى نەگىزگى رەپەرتۋارلاردى باستى كەيىپكەرلەردى سومدايدى. ول مۇحتار اۋەزوۆتىڭ «اباي جولىنداعى» اباي، ونى ەرلاننان باسقا ەشكىم ويناي المايدى. ول دۋلات يسابەكوۆتىڭ «جاۋ جۇرەگىندەگى» بالۋان شولاق، يسرايل ساپاربايەۆتىڭ «سىعان سەرەناداسىنداعى» ءشامشى بەينەسى، اكىم تارازيدىڭ «اقىن پەرىشتە ماحابباتتاعى» مۇقاعالي بەينەسى. ەرلاننىڭ ءبىرىنشى اللا تاعالا بەرگەن تالانتى، ارتيستيزم، كاسىبي شەبەرلىگى، ناعىز ونەردەگى تۇلعا. سوندىقتان تۇلعا تەاتردان ءبولىنىپ ەشقايدا كەتپەيدى، – دەدى تەاترىدىڭ جاڭا ديرەكتورى.
– ءبىزدىڭ تەاتردىڭ تاريحىندا بۇنداي بولماعان نارسە. تۇڭعىشباي دا وسىنداي ابىرويسىزدىققا ۇشىراپ قالىپ، قانشا حالىق ءسوز ايتتى، قانشاما رەنىشتەر بولدى، قانشاما رەت اقتالدى. جالپى اقتالۋ دەگەن ول بەيشارالىق. مىناۋ ەكىنشى جاعداي، مىنەكەي. ويىمىزدا جوق نارسە، قولايسىز جاعداي بولدى، – دەدى قازاقستاننىڭ حالىق ءارتىسى ءسابيت ورازبايەۆ.
اكەم تەاتردىڭ جاڭا باسشىسى اسحات ماقسىم ۇلىنىڭ ءاربىر قادامى كوپشىلىكتىڭ نازارىندا بولماق. تۇڭعىشباي جامانقۇلوۆ پەن ەرلان ءبىلالدىڭ كەبىن كيسە، جۇرتتىڭ «جاڭىلمايتىن جاق، سۇرىنبەيتىن تۇياق بولمايدى» دەپ ايتۋى ەندى ەكىتالاي. ودان دا، قارا شاڭىراقتى مامبەتوۆتاي مارتەبەگە كوتەرۋ ويى ىسكە اسسا، قازاق ونەرىنىڭ بيىككە سامعاۋىنا سەپ بولماق.
https://www.youtube.com/watch؟time_continue=45&v=qZsvVMEvzd0
