قازاقستاندا زەينەتاقى جيناقتارىمەن ءتىس ەمدەۋگە باقىلاۋ كۇشەيتىلدى. ەندى ناۋقاس ەمدەۋدىڭ ءار كەزەڭىندە دارىگەرلىك كەڭەس بەرۋ كوميسسياسىنان ءوتۋ كەرەك، - دەپ حابارلايدى Dalanews.kz 31-ارنانىڭ ينفورمبيۋرو جاڭالىقتار باعدارلاماسىنا سىلتەپ.
زەينەتاقى جيناعىن ەمگە پايدالانۋ ەرەجەلەرى وزگەردى. ەندى ءتىس دارىگەرلەرىنەن كومەك الۋ ءۇشىن بۇرىنعىداي تەك دارىگەرلىك كوميسسيا ەمەس، دارىگەرلىك-كونسۋلتاسيالىق كوميسسيانىڭ قورىتىندىسىن الۋ قاجەت. سومالارى كورسەتىلگەن ەكى كەزەڭدى ەمدەۋ جوسپارى ستوماتولوگيالىق ەمحانامەن كەلىسىمشارتقا قوسىلۋى كەرەك. ءبىرىنشى كەزەڭ – حيرۋرگيالىق، ەكىنشىسى – ورتوپەديالىق. ءبىرجولعى زەينەتاقى تولەمدەرى ارقىلى تولەۋ ەمدەۋ باستالعانعا دەيىن جۇزەگە اسىرىلادى.
“ءبىرىنشى جانە ەكىنشى كەزەڭدە دە دارىگەرلىك-كونسۋلتاسيالىق كوميسسيا ءۇشىن ءتىس رەنتگەنىن تۇسىرەدى. كەيىن enpf-otbasy.kz پلاتفورماسىنا بەكىتۋ ءۇشىن ءاربىر كەزەڭ ءۇشىن بولەك ەكى رەت كوميسسيا قورىتىندىسىن الۋ قاجەت بولادى. بۇل شارالار اشىقتىقتى، قاۋىپسىزدىكتى جانە زەينەتاقى جيناقتارىنىڭ شىعىستارىن نەگىزدەۋدى جاقسارتۋ ءۇشىن ەنگىزىلەدى”، – دەلىنگەن حابارلامادا.
كوميسسيا قۇرامىندا ءتىس دارىگەرى بولۋى كەرەك. دەنساۋلىق ساقتاۋ مينيسترلىگى مۇنداي جاڭاشىلدىق تولەمدەردى قولما-قول اقشاعا اينالدىرۋ كوبەيۋىنە بايلانىستى دەپ ءتۇسىندىردى.
“كوپتەگەن ءتىس دارىگەرى كەڭسەلەردى جالعا الادى، بۇكىل ەمحانالاردى جالعا الادى، ءبىر مەكەمەگە ليسەنزيانى ءبىر جەردەن الادى، ءبىراق شىن مانىندە ولار باسقا جەردە ناۋقاستاردى قابىلداپ، ەمدەيدى. جەكەمەنشىك ەمحانالاردى ەشكىم تەكسەرمەگەن. بۇل ليسەنزيالاۋ ماسەلەسىن ءبىرىنشى رەت كوتەرىپ وتىرعان جوقپىز. ول ليسەنزيادان كەيىنگى بولۋى كەرەك”، – دەدى "AL-DENTA" ستوماتولوگيالىق ەمحاناسىنىڭ ديرەكتورى سۆەتلانا الەكسەيەۆا.
ساراپشىلار دا بۇل ىسكە دارىگەرلىك-كونسۋلتاسيالىق كوميسسيانى تارتۋدىڭ قاجەتى جوق دەپ ەسەپتەيدى.
"ءىستى قيىنداتىپ، ءوز اقشاڭىزدى الۋعا كەدەرگى جاساۋدىڭ قاجەتى جوق"، – دەدى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى گۇلنار وماروۆا.
ايتا كەتەيىك، قازاقستاندىقتار كوبىنە زەينەتاقى جيناقتارىن ستوماتولوگيالىق قىزمەتتەرگە اقى تولەۋگە جۇمسايدى، ويتكەنى ءتىس ەمدەۋ مىندەتتى مەديسينالىق ساقتاندىرۋ جۇيەسى ارقىلى تولەنبەيدى.
