«حابار» ارناسىنىڭ «تالقى» باعدارلاماسى جۇرگىزگەن ساۋالناماعا سايكەس، قازاقستاندىقتاردىڭ 70 پايىزى ەلتاڭبانى اۋىستىرۋعا قارسىلىق تانىتقان، دەپ حابارلايدى Dalanews.kz.
ال جوبا قوناعى پارلامەنت ءماجىلىسىنىڭ دەپۋتاتى ەركىن ءابىلدىڭ پايىمىنشا، مەملەكەتتىك ءرامىزدى اۋىستىرۋ ءۇشىن الدىمەن ونىڭ شىعىنىن ەسەپتەپ الۋىمىز كەرەك.
«مەن وسى ماسەلە جونىندە دەپۋتاتتىق ساۋال جولداعانمىن. بۇل ورايدا، اۋىستىرۋدى قولدايتىنداردىڭ عانا ەمەس، وعا قارسى شىققانداردىڭ دا ارگۋمەنتتى پىكىرلەرى نازارعا الىنۋ قاجەتتىگىن العا تارتتىم. بۇل – ءبىرىنشى. ەكىنشى، ەلتاڭبانى وزگەرتۋگە قارسى شىعىپ جاتقان ەكسپەرتتەردىڭ دەنى قارجىلىق شىعىندى قوزعايدى. سوندىقتان ءبىز ۇكىمەتكە وسى تالاپتى قويدىق. ناقتى شىعىندى انىقتاپ الۋ قاجەت. سوندا عانا وسىنداي تالقىلاۋدى باستاۋعا بولادى»، - دەدى ماجىلىسمەن.
ونىڭ سوزىنشە، قارجى شىعىنىن انىقتاپ العان سوڭ، وزگەرتەمىز بە، وزگەرتپەيمىز بە دەگەن ساۋالدى تالقىلايمىز. ەگەر وزگەرتۋ كەرەك دەپ شەشسەك قانا، جاڭا ەلتاڭبانىڭ نوبايى قانداي بولۋ قاجەتتىگىنە قاتىستى ۇسىنىستارىمىزدى بىلدىرە الامىز.
«نەگىزى، قازىرگى ەلتاڭبانى شيكى دەپ ايتۋعا بولمايدى. تەك مۇنداعى كومپوزيسيا كەڭەس زامانىنان قالعان. 1992 جىلى جانداربەك اعامىز كەڭەستىك گەربتىڭ ەلەمەنتتەرىن وزگەرتىپ، جالپى كومپوزيسياسىن قالدىردى. بۇل بىزگە عانا ءتان دۇنيە ەمەس، كسرو قۇرامىندا بولعان بارلىق مەملەكەتتە سونداي. مىسالى، ونداعى قاناتتاردىڭ ورنىنا بيدايدىڭ ماساعىن قويدىق، بالعا مەن وراقتىڭ ورنىنا شاڭىراقتى ىلدىك، كۇندى كوتەرىپ، كەرەگە قىلدىق، جۇلدىزدى سول كۇيى قالدىردىق. مۇنى شيكىلىك دەۋگە بولمايدى، سول كەزدەن قالعان گەرالديكالىق ءداستۇر»، - دەدى دەپۋتات.
ال اقىن، قازاقستان جازۋشىلار وداعىنىڭ مۇشەسى جۇلدىز تويبەكتىڭ سوزىنشە، تاۋەلسىزدىك العاننان كەيىن 294 ۇمىتكەر ەلتاڭبانىڭ ىشىنەن تاڭداپ الىنعان وسى ءرامىزىمىز جارقىراپ تۇرا بەرگەنى دۇرىس.
«بۇل ەلتاڭبادا ءبىزدىڭ ۇلتىمىز ءۇشىن قاسيەتتى دۇنيەلەر كورىنىس تاپقان. مىسالى، شاڭىراقتىڭ ءوزى ەلىمىزدە قونىس تەپكەن ونداعان ۇلت پەن ۇلىستىڭ ءبىر شاڭىراق استىنا ۇيىسقانىن بىلدىرەدى. قاناتتى پىراق ساق زامانىنان سىر تارتادى، تاريحىمىزدىڭ تەرەڭدە ەكەنىن ايشىقتايدى. مۇنى شەتەلدىكتەر تانىماسا، ءبىز تانىتايىق، ناسيحاتتايىق. ال ەلىمىزدىڭ شەجىرەسىن بىلگەن ادام مۇنى تەز تۇسىنەدى. جۇلدىزدى كەڭەس زامانىنا تەلىپ جۇرگەندەر بار، مۇنداي جۇلدىزدى اقش، تۇركيا سياقتى الدىڭعى قاتارلى ەلدەردىڭ تۋىنان دا كورەمىز. بۇل ىقىلىم زاماننان بار»، - دەپ ءتۇسىندىردى سپيكەر.
ونىڭ پايىمىنا قاراعاندا، ەلتاڭبانى وزگەرتۋ تۋرالى باستاما كوتەرىپ جۇرگەن جاستار ەلىمىزدىڭ كەشەگىسىن بىلمەيدى، وتكەنىن تانىمايدى.
