TEDx Talks ەركىن فورماتىندا وتككەن پەداگوگيكالىق كەڭەستە استانا قالاسى ءبىلىم باسقارماسى باسشىسىنىڭ ورىنباسارى مارجان كايربايەۆا، «اكەلەر وداعى» رەسپۋبليكالىق قوعامدىق بىرلەستىگىنىڭ ءتوراعاسى ماقسۇتبەك ايتماعانبەت، كوشباسشىلىق جانە موتيۆاسيا بويىنشا جاتتىقتىرۋشى، «جاڭا ۇرپاق» رەسپۋبليكالىق كوشباسشىلىق مەكتەبىنىڭ نەگىزىن قالاۋشى اسحات ابجانوۆ، «قوعامنىڭ جاڭارۋى» قوعامدىق بىرلەستىگىنىڭ باسشىسى ۆلاديمير ەۆدوكيموۆ، «ءبىلىم-يننوۆاسيا» حالىقارالىق قوعامدىق قورىنىڭ تاربيە ءبولىمىنىڭ باسشىسى سامات سماقوۆ، ق.ساتبايەۆ اتىنداعى «BINOM SCHOOL» مەكتەپ-ليسەيىنىڭ ديرەكتورى قۇرالاي بايتاجيكوۆا جانە №37 مەكتەپ-ليسەيىنىڭ پەداگوگى مەدەت ءبىلال ءسوز الىپ، تاجىريبەلەرىمەن ءبولىستى. ولار اتا-انا مەن بالا، ۇستاز بەن وقۋشى اراسىنداعى قارىم-قاتىناس تاقىرىبىندا وي ءوربىتتى.
مۇنداي فورماتتا پەداگوگيكالىق كەڭەس استانادا العاش رەت ءوتىپ وتىر. جيىن وتباسى مەن مەكتەپتىڭ ىنتىماقتاستىعىنا، وتباسىلىق تاربيەگە باعىتتالدى.
– مەن ەڭ الدىمەن، پەداگوگ رەتىندە دە، اتا-انا رەتىندە دە بالا تاربيەسى ءبىرىنشى كەزەكتەگى مىندەت ەكەنىن، بۇل اتا-انالاردىڭ دا، تاربيەشىلەردىڭ دە ءوزارا جاۋاپكەرشىلىگى ەكەنىن ايتقىم كەلەدى. وزدەرىڭىز بىلەسىزدەر، اتا-انا مەن بالا اراسىنداعى سەنىمدى قارىم-قاتىناستى قۇرۋ ءۇشىن قوعامداعى اكەلەر مەن انالاردىڭ ءرولىن ارتتىرۋ ولاردى مەكتەپ ومىرىنە جۇمىلدىرۋعا، تابىستى وتباسىلاردىڭ تاجىريبەسىن تاراتۋعا باعىتتاۋ ءۇشىن ەلوردانىڭ «اكەلەر كەڭەسى» مەن «انالار مەكتەبىن» قۇرعان بولاتىنبىز. قازىرگى تاڭدا ەكى ۇيىم دا بەلسەندى جۇمىس ىستەيدى، – دەدى استانا قالاسى ءبىلىم باسقارماسى باسشىسىنىڭ ورىنباسارى مارجان جامبىل قىزى.
پەداگوگيكالىق كەڭەس بارىسىندا بالالار مەن جاسوسپىرىمدەردى تاربيەلەۋدىڭ، اتا-انا ءرولىنىڭ، ەرەسەكتەر مەن بالالار اراسىنداعى قارىم-قاتىناستى جولعا قويۋدىڭ ماڭىزدى ماسەلەلەرى كوتەرىلدى.
– بۇل – جاڭا جوبا. وزدەرىڭىز بايقاعانداي، ەركىن فورماتتا وتەدى. پەداگوگيكالىق كەڭەستە تەك اتقارىلعان جۇمىس بويىنشا ەسەپپەن شەكتەلمەۋ قاجەت. سپيكەرلەردى دە ارنايى ىرىكتەپ الدىق. ولار ءبىلىم بەرۋ ۇيىمدارىنىڭ وكىلدەرىنە موتيۆاسيالىق ءارى تاربيەلىك تۇرعىدا بالا تاربيەسىنە قاتىستى ماڭىزدى اقپاراتتارىمەن ءبولىستى. بارىمىزگە بەلگىلى، بالاعا اۋەلى تاربيە بەرۋ كەرەك. ودان كەيىن ءبىلىم بەرۋ قاجەت. بۇگىن 200-دەن اسا اتا-انا، 600-دەن اسا سىنىپ جەتەكشىسى، 200-دەن اسا ءبىلىم بەرۋ ۇيىمىنىڭ باسشىسى، 200-دەن اسا مەكتەپ ديرەكتورىنىڭ ورىنباسارى جانە مەكتەپ پسيحولوگتارى مەن الەۋمەتتىك پەداگوگتار قاتىستى، – دەدى استانا قالاسى ادىستەمەلىك ورتالىعىنىڭ باسشىسى سىندار داۋەشوۆا.
سونداي-اق، بۇگىنگى پەداگوگيكالىق كەڭەستەگى ديالوگ مەكتەپتەر قىزمەتىنىڭ باعىتتارىن، اتا-انالاردىڭ بالالارىن تاربيەلەۋ تۋرالى كوزقاراستارىن قايتا قاراۋعا مۇمكىندىك بەرەدى، جاڭا ىس-ارەكەتتەرگە بەلگىلى ءبىر باستاما بولادى.
ەستەرىڭىزگە سالا كەتەيىك، مەملەكەت باسشىسى ءوز جولداۋلارى مەن تاپسىرمالارىندا ەلىمىزدەگى ادامي كاپيتالدى دامىتۋ قاجەتتىلىگىنە ۇنەمى نازار اۋدارادى، بۇل ءوز كەزەگىندە ءبىلىم بەرۋ جۇيەسىن جان-جاقتى دامىتۋدى كوزدەيدى. اتالعان ىستە اتا-انا مەن ۇستازدىڭ ىنتىماقتاستىعىنىڭ ءرولى وراسان ەكەنى انىق.
