ۆيدەو ارقىلى كەڭەس بەرۋشى ماماننىڭ كومەگىن الۋ ءۇشىن پايدالانۋشى باستى بەتتىڭ وڭ جاق تومەنگى بۇرىشىنداعى «ۆيرتۋالدى اسسيستەنت» تۇيمەسىن باسۋى كەرەك. اشىلعان تەرەزەدە بەينەكامەرا بەلگىسىن تاڭداۋ قاجەت. جۇيە پايدالانۋشىدان بەينەكامەرا مەن ميكروفوننىڭ قوسىلۋىنا رۇقسات سۇرايدى. بىرنەشە سەكۋند ىشىندە حقو وپەراتورى كليەنتپەن بايلانىسقا شىعادى. ەكرانداعى ارەكەتتى كورسەتۋ ءۇشىن قىزمەت الۋشى «ەكران دەمونستراسياسى» تۇيمەسىن، سودان كەيىن «ءبولىسۋ» باتىرماسىن باسۋى كەرەك.
وسىلايشا، حقو وپەراتورى ابونەنتتىڭ مونيتورىن كورە الادى جانە وعان egov.kz پورتالىندا كەز كەلگەن قىزمەتتى، ونىڭ ىشىندە ەسق-نى قاشىقتان راسىمدەۋگە كومەكتەسىپ، ءموبيلدى ازاماتتار بازاسىنا تىركەي الادى.
«ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسقارما ءتورايىمى اسەمگۇل بالتاشيەۆانىڭ ايتۋىنشا، ەكراندى «ءبولىسۋ» سەرۆيسى وپەراتور مەن كليەنتتىڭ اراسىنداعى بايلانىستى ايتارلىقتاي جەڭىلدەتتى، ويتكەنى قىزمەتتەردى ۇسىنۋ پروسەسىندە 1414 تەلەفونى ارقىلى كەڭەس بەرۋ ءتيىمدى بولعانىمەن، قاشاندا ىڭعايلى بولا بەرمەيدى.
– بۇرىن ءبىزدىڭ وپەراتورلار كليەنتتەن قاي سىلتەمەنى، قاي ءبولىم مەن قىزمەتتى اشقانىن ۇنەمى سۇراپ وتىراتىن. ەندى ءبىز ەكراندا بولىپ جاتقان بارلىق ارەكەتتى كورە الامىز جانە كليەنتتى قاندايدا ءبىر قىزمەتتى الۋ جولدارى بويىنشا بىردەن باعىتتاي الامىز. بۇل سەرۆيس ازاماتتارىمىزدىڭ سيفرلىق ساۋاتىن قاشىقتان ارتتىرۋعا دا مۇمكىندىك بەرەدى، – دەدى ول.
ەستەرىڭىزگە سالا كەتەيىك، كوروناۆيرۋس ينفەكسياسىنىڭ تارالۋ ءقاۋىپىنىڭ ساقتالۋىنا بايلانىستى، حقو ارقىلى تەك «قاعاز» جۇزىندە كورسەتىلەتىن قىزمەتتەردى الۋعا بولادى. Egov.kz پورتالى ارقىلى قولجەتىمدى قىزمەتتەردى ۇيدەن نەمەسە اكىمدىكتەردە، ءبىلىم بەرۋ جانە مەديسينا ۇيىمدارىندا ت.س.س. جەرلەردە ورنالاساتىن وزىنە-وزى قىزمەت كورسەتۋ سەكتورلارىندا الۋ كەرەك. مەملەكەتتىك قىزمەتتەردى ەلەكتروندى تۇردە الۋ بويىنشا egov.kz پورتالىنداعى ۆيرتۋالدى اسسيستەنت كەڭەسشىلەرى جانە 1414 ءبىرىڭعاي بايلانىس ورتالىعىنىڭ ماماندارى كومەكتەسە الادى.
ايتا كەتەيىك، قازىرگى ۋاقىتتا قازاقستاندا مەملەكەتتىك قىزمەتتەردىڭ 80% -دان استامى ەلەكتروندى فورماتتا قولجەتىمدى.
