الماتىدا "Dauletten قايىرىمدىلىق قورى" ۇيىمداستىرعان قايىرىمدىلىق كەشتە ديماش قۇدايبەرگەننىڭ كوستيۋمى اۋكسيوندا 2 000 000 تەڭگەگە ساتىلدى، دەپ حابارلايدى Dalanews.kz.
"Dauletten" قايىرىمدىلىق قورىنىڭ مالىمەتىنشە، اتالمىش كوستيۋمدى تانىمال ءانشى اللا پۋگاچيەۆانىڭ ماسكەۋدە وتكەن مەرەيتويىنا وراي ۇيىمداستىرىلعان "پوداروك دليا اننى" اتتى شىعارماشىلىق كەشىندە كيگەن. وندا ديماش يگور كرۋتويدىڭ "ليۋبوۆ، پوحوجايا نا سون" ءانىن ورىندادى. كوستيۋم ديزاينەرى – Atelier Leka.
قايىرىمدىلىق قورى تاراپىنان ۇيىمداستىرىلعان اۋكسيوندا العاشقى لوتتىڭ باعاسى 500 000 تەڭگەدەن باستالدى. اۋكسيون سوڭىندا كوستيۋم 2 000 000 تەڭگەگە ساتىلدى. بۇل لوتتى قازاقستاندىق كاسىپكەر، قارجىلىق ساۋاتتىلىق بويىنشا مەنتور ەركەبۇلان ءارىپباي ساتىپ الدى.
"مەن بۇل كوستيۋمدى ىنىمە سىيلايمىن. ول 11-سىنىپتى اياقتايىن دەپ جاتىر. ءوزى دە ديماش قۇدايبەرگەنگە ۇقسايدى. تۋىستارىمىزدىڭ ءبارى ونى ديماشقا ۇقساتادى"، - دەدى ول.
بۇل اتالمىش كەشتە 2 000 000 تەڭگەگە باعالانعان ەڭ ۇلكەن لوت بولدى. سونداي-اق، قايىرىمدىلىق كەشىندە "GGG فۋتبولكا" 1 000 000 تەڭگەگە، قازاقستاندىق ميني-فۋتبوليست، قايرات جانە قازاقستان قۇراماسىنىڭ شابۋىلشىسى سەرىك جامانقۇلوۆ كيگەن فۋتبولكا 300 000 تەڭگەگە، "ورداباسى" فۋتبول كلۋبىنىڭ جانە قازاقستان ۇلتتىق قۇراماسىنىڭ كاپيتانى اسحات تاعىبەرگەننىڭ فۋتبولكاسى 300 000 تەڭگەگە ساتىلدى. اۋكسيوندا مۇستافا وزتۇرىكتىڭ قولى قويىلعان كىتاپ تا بولدى.
ايتا كەتۋ كەرەك، "Dauletten قورى" تاراپىنان ۇيىمداستىرىلعان بۇل كەشتە جيىنى 7 000 000 تەڭگە جينالدى. اۋكسيوننان جينالعان قاراجات قايىرىمدىلىققا جۇمسالماق. ەلىمىزدە بولىپ جاتقان سۋ تاسقىنى سالدارىنان زارداپ شەككەن وڭىرلەرگە گۋمانيتارلىق كومەك كورسەتىلەدى.
