«ەگەر مەنىڭ جۇرەگىمدى اشىپ كورسەڭىزدەر، مۋزىكانى كورەر ەدىڭىزدەر. ميىمدى اشساڭىزدار دا، مۋزىكانى كورەسىزدەر. مەن مۋزىكادان جارالعانمىن. مەن جاي عانا ەڭبەكقور اداممىن» دەگەن ەدى ديماش ءبىر سۇحباتىندا.

تۇرىكتىڭ  BAYAN YANI جۋرنالى ديماش جايلى ماقالا جاريالادى، - دەپ حابارلايدى stan.kz.

«ادام مۇمكىندىگىنەن تىس تەحنيكانى يگەرگەن ءبىر-اق ادام بار، ول – ديماش. پوپ-مۋزىكادا دا، وزگە جانردا دا ءوزىن مويىنداتقان انشىلەر جەتەرلىك. نە دەگەنمەن قازىرگى انشىلىگىنەن وتىرىكشىلىگى باسىم، فونوگراممامەن ۇيالماي ءان ايتىپ تۇرمىن دەپ ويلايتىنداردىڭ، اسپاپتى ۇستاپ الىپ دۇرىس نوتاعا تۇسە الماي تۇراتىن جالعان اسپاپشىلاردىڭ، بەت-اۋزىن جىبىرلاتىپ قانا ءان ايتاتىنداردىڭ زامانىندا ديماش ءان الەمىنە ەرەكشە قۇبىلىس بولىپ كەلدى. ول انشىلىكتىڭ قانداي بولاتىنىن كورسەتتى.

ديماشتىڭ داۋىس دياپازونى 6 وكتوۆانى ۇستاي الادى. تومەن نوتادان جوعارىعا بىردەن سەكىرە الادى. ءبىر ۋاقىتتا ەكى ادامنىڭ داۋسىن سالا الادى. ونى كورمەي تىڭداعان ادام ەكى ادام ءان سالىپ تۇرعانىنا كامىل سەنەر ەدى.

ونىڭ دارىنىنان بولەك، قاجىماس ەڭبەكقورلىعى دا بار. 7 اسپاپتا ويناپ ۇيرەنىپ، جان تانىمەن مۋزىكانى بويىنا ءسىڭىرىپ وسكەن.

ءبىر جوبادا باقتالاسى ونىڭ سۋىنا ۇيىقتاتاتىن ءدارى دە سالىپ جىبەرىپتى (بەلورۋسسياداعى «سلاۆيان بازارى» حالىقارالىق بايگەسىندە - اۆت). بۇل تۋرالى ديماشتىڭ ءوزى ايتادى. «ميكروفوندى قاتتى قىسىپ الدىم. بۇكىل كۇشىمدى وسىلاي جيناپ، ءاندى سوڭىنا ارەڭ جەتكىزدىم» – دەيدى ول.

ديماشتىڭ ءان الەمىنە كەلۋى قۇر شىڭعىرۋ مەن ناعىز داۋىستىڭ ارا-جىگىن اجىراتىپ بەردى. ميكروفوندى ۇستاپ بوسقا شىڭعىراتىندار ءۇشىن ساباق بولدى. سوندىقتان عاجايىپ داۋىس يەسى ديماشتى قازىرگى زاماننىڭ فەنومەنى دەۋگە بولادى»، – دەپ جازادى تۇرىك جۋرنالى.

 

https://dalanews.kz/32873