پرەمەر-مينيستر ولجاس بەكتەنوۆ «دەرەكتەردى وڭدەۋ ورتالىقتارى القابى» جوباسىنىڭ ۇلتتىق قۇرىلتايدىڭ V وتىرىسىندا پرەزيدەنت قويعان مىندەتتەر شەڭبەرىندە جۇزەگە اسىرىلۋ بارىسى قارالعان جيىن وتكىزدى، دەپ حابارلايدى Dalanews.kz
وندا پرەمەر-مينيستردىڭ ورىنباسارى – جاساندى ينتەللەكت جانە سيفرلىق دامۋ ءمينيسترى جاسلان مادييەۆ، «قازاقتەلەكوم» اق باسقارما ءتوراعاسى باعدات مۋسين جوبانىڭ بيىلعى قاڭتار ايىندا پاۆلودار وبلىسى ەكىباستۇز قالاسىندا ىسكە قوسىلعاننان بەرگى اتقارىلعان جۇمىستار تۋرالى باياندادى.
ورتالىق ازياداعى ەنەرگەتيكالىق الەۋەتى 1 گۆت-قا دەيىن جەتەتىن ەڭ ءىرى كامپۋستى قۇرۋ جونىندەگى «ءدوو القابى» جوباسى بۇگىنگى تاڭدا قارقىندى تۇردە جۇزەگە اسىرىلۋدا. ۇكىمەت ءتيىستى ينفراقۇرىلىمدىق جانە قۇقىقتىق جاعدايلاردى جاساۋدا. اتاپ ايتقاندا، جالپى اۋدانى 1،4 مىڭ گەكتار جەر تەلىمى ءبولىندى. اۋقىمدى جوبانى جۇزەگە اسىرۋ ءۇشىن قوسالقى ستانسا ساتىپ الۋ، سونداي-اق ينۆەستورلار مەن جوباعا قاتىسۋشىلاردى مەملەكەتتىك قولداۋدىڭ قوسىمشا تەتىكتەرىن ازىرلەۋ بويىنشا جۇمىستار جۇرگىزىلۋدە.
قۇرىلاتىن ينفراقۇرىلىمنىڭ ماڭىزدى ەلەمەنتى حالىقارالىق سەرىكتەستەردى تارتۋعا ارنالعان Greenfield ايماعى بولماق. سونداي-اق ودان ءارى كەڭەيتە ءتۇسۋ مۇمكىندىگى بار 100 مۆت-عا دەيىنگى قۋاتتار دايىندالدى. ينفراقۇرىلىم ەنەرگيا تيىمدىلىگى كوەففيسيەنتى PUE 1.25 بولاتىن Tier III حالىقارالىق ستاندارتىنا سايكەس كەلمەك.
تەلەكوممۋنيكاسيالىق ينفراقۇرىلىم سالاسىنداعى ەڭ ءىرى hyperscale جانە BigTech كومپانيالارىنىڭ تالاپتارىن قاناعاتتاندىرۋ ءۇشىن جەلىلىك كىدىرىس 80-نەن 57 ميلليسەكۋندقا دەيىن تومەندەتىلەدى، بۇل – نەگىزگى ەۋروپالىق ترافيك الماسۋ ورتالىقتارىمەن تەڭ دەڭگەي.
بۇدان ءارى ەسەپتەۋ ينفراقۇرىلىمىن كەزەڭ-كەزەڭمەن ۇلعايتۋ، ءارقايسىسى 50 مۆت-تان ءجي-دوو-نىڭ ءتورت كەزەڭىن سالۋ كوزدەلگەن.
تۇتاستاي العاندا، «ءدوو القابىن» ىسكە قوسۋ قازاقستاندا سيفرلىق ينفراقۇرىلىم مەن ەسەپتەۋ قۋاتتىلىعىنىڭ وڭىرلىك ورتالىعىن قالىپتاستىرۋعا، $30 ملرد-قا دەيىن ينۆەستيسيا تارتۋعا جانە 500-دەن استام جوعارى بىلىكتى جۇمىس ورىندارىن اشۋعا مۇمكىندىك بەرەدى.
جيىن قورىتىندىسى بويىنشا پرەمەر-مينيستر ولجاس بەكتەنوۆ سالالىق مينيسترلىكتەر مەن جاۋاپتى ۇيىمدارعا جۇمىستىڭ بارلىق كەزەڭدەرىن ۋاقتىلى جۇزەگە اسىرۋدى قامتاماسىز ەتۋدى جانە قاجەتتى نورماتيۆتىك شەشىمدەردى قابىلداۋدى جەدەلدەتۋدى تاپسىردى.
