دەپۋتات نارتاي سارسەنعالييەۆ ءماجىلىس مىنبەرىندە "قازاق اسكەرىندەگى قازىرگى ادامشوشىرلىق احۋالدى" كوتەردى، - دەپ حابارلايدى Dalanews.kz.
كەيىنگى كەزدە اسكەردەگى قايعىلى جاعدايلاردىڭ قاتارى سيرەمەي تۇر. دەپۋتاتتىڭ سوزىنشە، سوڭعى 3 جىلدا 270 اسكەري قىزمەتكەر اجال قۇشقان.
"جاۋىردى جابا توقىعانمەن جارانىڭ جازىلمايتىنى بەلگىلى، ونىڭ ايعاعى بەيبىت كۇندە ساربازدارىمىز ءتۇرلى دەنە جاراقاتىن الىپ، كەيبىرەۋى قايتىس بولۋدا. بۇل ءبىر ەمەس، بىرنەشە رەت قايتالانعان جاعداي. وسىنىڭ سالدارىنان ايىپپۇل سالماق تۇگىلى ايىپ تاقساڭدا ەشكىم باۋىر ەتى بالاسىن جاستار جان تاپسىرعان ورتا – اسكەر قاتارىنا جىبەرگىسى كەلمەيدى.
ماسەلەن، سوڭعى ءۇش جىلدا قازاقستاندا 270 اسكەري قىزمەتكەر قايتىس بولعان، ال سوڭعى ءتورت جىلدا اسكەردە 86 سۋيسيد تىركەلگەن، 20 اسكەري ادام وز-وزىنە قول سالۋعا وقتالعان. بۇل – اسكەري پروكۋراتۋرا مالىمدەگەن رەسمي سان"، - دەدى ول.
دەپۋتات بۇعان دەيىنگى داۋلى ىستەردى ءتىزىپ، ءدۇيىم ەل نازارىن تىگىپ وتىرعان ۇلتتىق ۇلان جاۋىنگەرى ەربايان مۇحتاردىڭ جاعدايىنا دا توقتالدى.
"2023 جىلعى تامىزدا اسكەري بولىمشەلەردىڭ بىرىندە كوماندير اسكەرگە جاڭادان كەلگەن ساربازدى ورىندىقپەن ۇرىپ، سوققىعا جىققان. ارتى نەمەن ءبىتتى دەيسىز عوي، ءىس تاراپتاردىڭ بىتىمگە كەلۋىمەن جابىلىپ قالعان. 2024 جىلدىڭ ماۋسىم ايىندا جامبىل وبلىسىنىڭ ءبىر اسكەري بولىمشەسىندە اسكەرگە كەلگەنىنە 1-اق اي بولعان سارباز ەس-تۇسسىز جانساقتاۋ بولىمىنە تۇسكەن.
ال تاياۋدا ورىن العان جاعداي بۇكىل وتانداسىمىزدىڭ اشۋ-ىزاسىن تۋعىزدى. ۇلتتىق ۇلاننىڭ جاۋىنگەرى ەربايان مۇحتار باسىنان العان جاراقاتتان بەس اي بويى ەس-تۇسسىز جاتىر. جاۋاپتىلار «ەربايان دارەتحاناعا قۇلاپ، جاراقاتتاندى» دەيدى. بۇعان كىم سەنەدى؟ جاراقاتتىڭ سالدارىنان ساربازدىڭ باسىنىڭ جارتىسىن الىپ تاستاۋعا تۋرا كەلگەن. ەندى وعان تۇراقتى كۇتىم قاجەت. ءقازىر اتا-اناسى ەرباياندى شەتەلگە ەمگە اكەتۋگە قام جاساۋدا"، - دەدى ول.
سونداي-اق، جۋىردا اقتاۋداعى گارنيزونىندا كوز جۇمعان سارباز مارات بارقۇلوۆقا قاتىستى وقيعانى ايتتى.
"ونى وفيسەر اتىپ تاستاعان. بۇل قاساقانا جاسالعان ارەكەت، جوق پا؟ اتالعان سۇراقتىڭ جاۋابىن تەرگەۋ ورىندارى ءادىل زەرتتەپ، ناتيجەسىن قوعامعا اشىق تۇردە جەتكىزۋى كەرەك.
مەملەكەت باسشىسى بيىلعى جولداۋىندا «ءار اتا-انا اسكەرگە كەتكەن بالاسىن مەملەكەتكە سەنىپ تاپسىرادى. سوندىقتان ساربازداردىڭ دەنساۋلىعى مەن قاۋىپسىزدىگىنە، ەڭ الدىمەن، ارميا باسشىلىعى جانە قۇقىق قورعاۋ مەكەمەلەرىنىڭ باسشىلارى جاۋاپتى»، - دەپ اتاپ ءوتتى. وكىنىشكە قاراي، ارمياداعى جاعداي بۇعان مۇلدەم كەرەعار بولىپ تۇر"، - دەدى دەپۋتات.
نارتاي ارالباي ۇلىنىڭ ايتۋىنشا، بىلتىر قورعانىس مينيسترلىگى اسكەري بولىمدەردە 50 مىڭنان استام بەينەكامەرا بار دەگەن. الايدا اسكەردەگى سۇمدىق جايتتار بۇل مالىمەتكە كۇمان تۋعىزادى.
دەپۋتات قورعانىس ءمينيسترى رۋسلان جاقسىلىقوۆقا ءبىرقاتار ۇسىنىس جاسادى:
- ەلىمىزدىڭ ارمياسىنداعى اتالعان كەلەڭسىزدىكتى تىيۋ جانە الدىن الۋ بويىنشا ناقتى شارالاردى قابىلداۋدى.
- اسكەريلەردىڭ الەۋمەتتىك جاعدايىن جاقسارتۋعا باعىتتالعان جوبالادى قولعا الىپ، ولاردىڭ ىسكە اسۋىن جەدەلدەتۋدى ۇسىندى.
