«پاتشالار جازىعىنداعى» (كاتونقاراعاي اۋدانى، بەرەل) ارحەولوگيالىق قازبا جۇمىستارى جۇرگەن ورىنعا ءا.مارعۇلان اتىنداعى ارحەولوگيا ينستيتۋتىنىڭ باس عىلىمي قىزمەتكەرى، پرفەسسور ز.ساماشيەۆتىڭ جەتەكشىلىگىمەن وبلىس اكىمى دانيال احمەتوۆ بولدى. عالىم ايماق باسشىسىنا سەنساسيالىق جادىگەرلەر تۋرالى ايتىپ بەردى دەپ حابارلادى اكىمنىڭ باسپا ءسوز قىزمەتى.
جاڭادان اشىلعان جادىگەردىڭ ءمانى مىناداي: بيىلعى جازدا دالالىق زەرتتەۋ بارىسىندا ب.ز.د. IV عاسىردىڭ سوڭىنا تيەسىلى ەر ادام مەن قۇرباندىققا شالىنعان جەتى جىلقىنىڭ قالدىقتارى تابىلدى. ەر ادام اعاش كولوننانىڭ ىشىنە سالىنعان، ونىڭ قالدىقتارى ءالى زەرتتەلمەدى. بارلىق جىلقى سكيفتىك اڭ ستيلىندە اشەكەيلەنگەن. جەتى جىلقىنىڭ بىرەۋى ءمىنىس جىلقىسى بولعانعا ۇقسايدى: ونىڭ اشەكەيلەرى التىننان جاسالعان جانە مايىتكە جاقىن ورنالاسقان. جىلقى اشەكەيلەرىندەگى ءبىر ەرەكشەلىك، ەجەلگى كوشپەلى حالىق مادەنيەتىندە سيرەك كەزدەسەتىن اتەش وبرازىندا جاسالعان. جانە ۇلكەن ساز بالشىقتان جاسالعان قۇمىرا تابىلعان.
زەينوللا ساماشيەۆتىڭ ايتۋىنشا، قورعاندى زەرتتەۋ ءارى قاراي جالعاسادى جانە وزگە دە جادىگەرلەر تابىلىپ قالۋى مۇمكىن.
ايماق باسشىسى ارحەولوگتاردىڭ №2 قورىم ۇستىنە كەلۋشىلەردىڭ بىرەگەي ارحەولوگيالىق قۇندىلىقتاردى جاقىننان كورۋىنە مۇمكىندىك بەرەتىن شىنى ساركوفاگ سالۋ تۋرالى ۇسىنىسىن قولدادى.
جاقىن كۇندەرى قىركۇيەك ايىنىڭ باسىنا دەيىن ساركوفاگ قۇرىلىسى ءۇشىن 40 ميلليون تەڭگە كولەمىندە اقشا بولىنەدى.
دەرەككوزى: inform.kz
