مۇنداي مەموراندۋمعا الماتى قالاسىنىڭ اكىمى باۋىرجان بايبەك، «دامۋ» كاسىپكەرلىكتى دامىتۋ قورى» اق باسقارما ءتوراعاسى قانىش تۋلەۋشين جانە شاھاردىڭ بيزنەس وكىلدەرى قاتىسقان ىسكەرلىك كەڭەستىڭ وتىرىسىندا قول قويىلدى.
قاراجات قالانىڭ تۋريزم، يننوۆاسيا جانە تاماق ونەركاسىبى سالاسىن قارجىلاندىرۋعا باعىتتالادى. الماتى قالالىق اكىمشىلىگى مەن «دامۋ» قورىنىڭ پاريتەتتى نەگىزدەگى بىرلەسكەن قارجىلاندىرۋى ەكىنشى دەڭگەيلى بانكتەر ارقىلى جۇزەگە اسىرىلادى.
- تۋريزم سالاسىنداعى كاسىپكەرلەرگە «الماتى تۋريزم» باعدارلاماسى بويىنشا قويىلاتىن تالاپتار:
جالپى قارجى كولەمى – 2 ملرد تەڭگە. الماتى قالالىق اكىمشىلىگى 1 ملرد تەڭگە، «دامۋ» قورى 1 ملرد تەڭگە بولەدى.
نەسيە مولشەرلەمەسى جىلىنا 8،5%؛
ءبىر كاسىپكەردىڭ قولىنا تيەتىن قارجى شەگى 100 ملن تەڭگە؛
نەسيە 84 ايعا دەيىن بەرىلەدى؛
ماقساتى – ينۆەستيسيا جانە اينالىم قاراجاتىن تولىقتىرۋ.
- تاماق ونەركاسىبى سالاسىنداعى كاسىپكەرلەرگە «الماتى ءونىم» باعدارلاماسى بويىنشا قويىلاتىن تالاپتار:
جالپى قارجى كولەمى 1 ملرد تەڭگە. الماتى قالالىق اكىمشىلىگى 500 ملن تەڭگە، «دامۋ» قورى 500 ملن تەڭگە بولەدى.
نەسيە مولشەرلەمەسى جىلىنا 8،5%؛
ءبىر نەسيە الۋشىعا 100 ملن تەڭگەگە دەيىن بەرىلەدى؛
نەسيە نەگىزگى قۇرال جابدىقتار ساتىپ الۋ جانە جاڭارتۋعا دەپ 84 ايعا دەيىن، اينالىم قاراجاتىن تولىقتىرۋعا 36 ايعا دەيىن بەرىلەدى؛
ماقساتى – تاماق ونىمدەرى مەن الكوگولسىز سۋسىندار ءوندىرىسى.
- يننوۆاسيالىق سالالاردا قىزمەت ەتەتىن كاسىپكەرلەرگە «الماتى يننوۆاسيالار» باعدارلاماسى بويىنشا قويىلاتىن تالاپتار:
جالپى قارجى كولەمى 1 ملرد تەڭگە. الماتى قالالىق اكىمشىلىگى 500 ملن تەڭگە، «دامۋ» قورى 500 ملن تەڭگە بولەدى.
نەسيە مولشەرلەمەسى جىلىنا 8،5%؛
ءبىر نەسيە الۋشىعا 100 ملن تەڭگەگە دەيىن بەرىلەدى؛
نەسيە 84 ايعا دەيىن بەرىلەدى؛
ماقساتى – ينۆەستيسيا جانە اينالىم قاراجاتىن تولىقتىرۋ.
مۇنىمەن قاتار ەكى تاراپ ءۇش باعدارلاما بويىنشا بولىنگەن قاراجاتتىڭ كەم دەگەندە 25%-ى start-up جوبالارعا بەرىلۋى كەرەك دەپ كەلىستى.
«الماتى قالاسى رەسپۋبليكانىڭ ىسكەرلىك ورتالىعى بولىپ سانالادى. شاھار شاعىن جانە ورتا كاسىپكەرلىك نىساندارى جاعىنان العاشقى ورىندا. مۇندا 182 شوب كاسىپورىندارى بار. بۇل رەسپۋبليكالىق كورسەتكىشتىڭ 15% قۇرايدى. جۇمىسپەن قامتىلعان حالىق سانى جاعىنان دا ءبىرىنشى ورىندا. 570 مىڭعا جۋىق ادام كاسىپكەرلىك سالاسىندا قىزمەت ەتەدى. بۇل رەسپۋبليكا بويىنشا 17%-دى قۇرايدى. سونداي-اق شوب كاسىپورىندارى شىعارعان ءونىم كولەمى جاعىنان دا ءبىرىنشى ورىندا. ولار 4 ملردتان استام تەڭگەنىڭ ءونىمىن شىعارعان. بۇل رەسپۋبليكا بويىنشا شىعارىلعان ءونىمنىڭ 26% قۇرايدى. دەگەنمەن جەڭىلدىكپەن نەسيەلەندىرۋدى قاجەت ەتەتىن سالالار دا بار. ول – تۋريزم، تاماق ونەركاسىبى جانە يننوۆاسيالىق سالالار. مىسالى «الماتى تۋريزم» باعدارلاماسى بويىنشا ءبىز قولونەر شەبەرلەرىن ەرەكشە كادەسىيلار جاساۋعا ىنتالاندىرعىمىز كەلەدى. بۇل الداعى 2017 جىلعى ۋنيۆەرسيادا مەن ەكسپو-2017 كەزىندە ماڭىزدى. «الماتى ءونiم» باعدارلاماسى بويىنشا كاسىپكەرلەر تاماق پەن الكوگولسىز سۋسىن شىعارۋعا جەڭىلدىكتى نەسيەگە، فەرمەرلەر ءوز ونىمدەرىن وتكىزەتىن نارىققا قول جەتكىزەدى. ەڭ باستىسى - بولىنگەن قاراجاتتىڭ 25% جاڭا كاسىپورىندار مەن جاڭا باعىتتاردى قولعا الاتىن start-up جوبالارعا بولىنەتىنى. اكىمشىلىك ءۇشىن بۇل قالا بيۋدجەتىنە تۇسەتىن سالىق پەن جاڭا جۇمىس ورىندارى»،- دەدى «دامۋ» قورىنىڭ باسقارما ءتوراعاسى قانىش تۋلەۋشين.
