قۋاندىق بيشىمبايەۆتىڭ اتا-اناسى تۋىستارى كايرات كەمەلوۆتى سوتقا بەرىپ، وزدەرىنىڭ ار-نامىسى مەن قادىر-قاسيەتىنە نۇقسان كەلتىرەتىن پىكىرلەر ءۇشىن جاۋاپكەرشىلىككە تارتۋدى تالاپ ەتكەن ەدى. استانا قالاسىنىڭ ازاماتتىق ىستەر جونىندەگى اۋدانارالىق سوتى بۇل تالاپتى جارتىلاي قاناعاتتاندىردى، دەپ حابارلايدى Dalanews.kz.

داۋدىڭ تۋىنداۋىنا كەمەلوۆتىڭ 2025 جىلعى 14 قاڭتاردا YouTube-تەگى «ايران» ارناسىنا بەرگەن سۇحباتى سەبەپ بولعان. وندا ول بيشىمبايەۆتار وتباسىنا قاتىستى ەكى داۋلى پىكىر ايتقان:

«سول كۇنى اڭگىمە بولدى، ولار مەنى ءمايىتحاناعا بارىپ، مەنىڭ سوتمەديسيناداعى ارىپتەستەرىمنەن قۋاندىق بيشىمبايەۆتىڭ پايداسىنا قورىتىندى بەرۋدى سۇراۋعا شاقىردى»؛

«ءيا، ەگەر بىرەۋ جالعاندىققا بارامىن دەسە، ولار وعان قوماقتى سوما بەرۋگە دايىن بولدى».

سوت وسى ەكى پىكىردى شىندىققا جاناسپايدى جانە بيشىمبايەۆتاردىڭ ابىرويىنا نۇقسان كەلتىرەدى دەپ تانىپ، كەمەلوۆتى ءدال سول YouTube-ارنادا – «ايراندا» – رەسمي تۇردە ولاردى تەرىسكە شىعارۋعا مىندەتتەدى.

مورالدىق وتەماقى دا تاعايىندالدى. ۆاليحان بيشىمبايەۆ پەن الميرا نۇرلىبەكوۆا ءارقايسىسى 100 000 تەڭگەدەن الادى. بۇعان قوسا، كەمەلوۆ تالاپكەرلەردىڭ سوتتاعى وكىلدىك جانە قوسىمشا شىعىندارىن وتەۋى ءتيىس: بيشىمبايەۆقا – 200 مىڭ تەڭگە مەن 4 932 تەڭگە مەملەكەتتىك باج، نۇرلىبەكوۆاعا – 200 مىڭ تەڭگە، 75 مىڭ تەڭگە نوتاريۋس قىزمەتى جانە سونداي-اق 4 932 تەڭگە باج. وسىلايشا، كەمەلوۆتىڭ جالپى تولەيتىن سوماسى 610 مىڭ تەڭگەنى قۇرايدى.

ايتا كەتەيىك، تالاپكەرلەر باستاپقىدا ءارقايسىسى ءۇشىن 8 ميلليون تەڭگەدەن، جالپى 16 ميلليون تەڭگە وتەماقى سۇراعان بولاتىن. ءبىراق سوت بۇل سومانى شەكتەپ، ارىزدى ءىشىنارا عانا قاناعاتتاندىردى.

بۇل شەشىمگە ءبىر اي ىشىندە اپەللياسيالىق شاعىم تۇسىرۋگە نەمەسە پروكۋروردىڭ نارازىلىق بىلدىرۋىنە بولادى. شاعىمدار استانا قالالىق سوتىنىڭ ازاماتتىق ىستەر جونىندەگى سوت القاسىندا قارالادى. سوتقا قاتىسپاعان تۇلعالار ءۇشىن بۇل مەرزىم شەشىم كوشىرمەسىن العان كۇننەن باستالادى.