Qýandyq Bishimbaevtyń ata-anasy týystary Kairat Kemelovty sotqa berip, ózderiniń ar-namysy men qadir-qasietine nuqsan keltiretin pikirler úshin jaýapkershilikke tartýdy talap etken edi. Astana qalasynyń azamattyq ister jónindegi aýdanaralyq soty bul talapty jartylai qanaǵattandyrdy, dep habarlaidy Dalanews.kz.
Daýdyń týyndaýyna Kemelovtyń 2025 jylǵy 14 qańtarda YouTube-tegi «Airan» arnasyna bergen suhbaty sebep bolǵan. Onda ol Bishimbaevtar otbasyna qatysty eki daýly pikir aitqan:
«Sol kúni áńgime boldy, olar meni máiithanaǵa baryp, meniń sotmeditsinadaǵy áriptesterimnen Qýandyq Bishimbaevtyń paidasyna qorytyndy berýdi suraýǵa shaqyrdy»;
«Iá, eger bireý jalǵandyqqa baramyn dese, olar oǵan qomaqty soma berýge daiyn boldy».
Sot osy eki pikirdi shyndyqqa janaspaidy jáne Bishimbaevtardyń abyroiyna nuqsan keltiredi dep tanyp, Kemelovty dál sol YouTube-arnada – «Airanda» – resmi túrde olardy teriske shyǵarýǵa mindettedi.
Moraldyq ótemaqy da taǵaiyndaldy. Valihan Bishimbaev pen Almira Nurlybekova árqaisysy 100 000 teńgeden alady. Buǵan qosa, Kemelov talapkerlerdiń sottaǵy ókildik jáne qosymsha shyǵyndaryn óteýi tiis: Bishimbaevqa – 200 myń teńge men 4 932 teńge memlekettik baj, Nurlybekovaǵa – 200 myń teńge, 75 myń teńge notariýs qyzmeti jáne sondai-aq 4 932 teńge baj. Osylaisha, Kemelovtyń jalpy tóleitin somasy 610 myń teńgeni quraidy.
Aita keteiik, talapkerler bastapqyda árqaisysy úshin 8 million teńgeden, jalpy 16 million teńge ótemaqy suraǵan bolatyn. Biraq sot bul somany shektep, aryzdy ishinara ǵana qanaǵattandyrdy.
Bul sheshimge bir ai ishinde apelliatsiialyq shaǵym túsirýge nemese prokýrordyń narazylyq bildirýine bolady. Shaǵymdar Astana qalalyq sotynyń azamattyq ister jónindegi sot alqasynda qaralady. Sotqa qatyspaǵan tulǵalar úshin bul merzim sheshim kóshirmesin alǵan kúnnen bastalady.
