بيشىمبايەۆ پەن بايجانوۆ اپەللياسيالىق شاعىم بەردى: ءوتىنىش قاشانعا دەيىن قارالادى؟

ساعىنىش سارداروۆا 14 ماۋ. 2024 12:01 245868

ءبىراز ۋاقىت بۇرىن بيشىمبايەۆ پەن بايجانوۆ اپەللياسيالىق شاعىم تۇسىرگەنى بەلگىلى بولدى. بۇگىن ماجىلىستە جوعارعى سوتتىڭ قىلمىستىق ىستەر جونىندەگى سوت القاسىنىڭ ءتوراعاسى نازگۇل راحمەتۋللينا بۇل شاعىم قانشا ۋاقىتقا دەيىن قارالۋى مۇمكىن ەكەنىن ايتتى، - دەپ حابارلايدى Dalanews.kz.

ءماجىلىس كۋلۋارىندا جوعارعى سوت وكىلى سوتقا القابيلەر قاتىسسا دا سوتتالۋشىلار شاعىمدانا الاتىنىن مالىمدەدى.

"القابيلەردىڭ قاتىسۋىمەن شىعارىلعان ۇكىمگە تاراپتار شاعىمدانا الادى. ول ءۇشىن اپەللياسيالىق ساتى بار. كەلىسپەسە، شاعىمدانۋعا قۇقىلى"، - دەدى سوت القاسىنىڭ ءتوراعاسى.

راحمەتۋللينانىڭ سوزىنشە، اپەللياسيا ءبىر اي ىشىندە قارالادى. ءبىراق بۇعان كەيبىر جايتتار اسەر ەتۋى مۇمكىن.

"اپەللياسيالىق ورگاندار قاراۋعا ۇلگەرمەي جاتقان جاعدايلاردا ۇزارۋى مۇمكىن. مىسالى، ادۆوكاتتار بەلگىلى ءبىر كۇندەرى قاتىسا الادى جانە ت.ب. زاڭ بويىنشا سوتتالعانداردىڭ اپەللياسيالىق ساتىداعى سوتقا قاتىسۋى سوت تەرگەۋى قايتادان جۇرگىزىلگەن كەزدە مىندەتتى سانالادى. ياعني، كەيبىر قوسىمشا دالەلدەمەلەردى زەرتتەگەندە عانا، باسقا جاعدايلاردا سوتتالۋشىنىڭ قاتىسۋى قاجەت ەكەنىن نەمەسە قاجەت ەمەس ەكەنىن اپەللياسيالىق ورگان ءوزى شەشەدى"، - دەدى ول.

ايتا كەتەيىك، بيشىمبايەۆ 24 جىلعا، بايجانوۆ 4 جىلعا سوتتالعان ەدى.


ۇسىنىلعان
سوڭعى جاڭالىقتار