الەۋمەتتىك جەلىدە قازاقتىڭ باس ءبيى ومار جالەلدىڭ قىزدارمەن بيلەپ جۇرگەن ۆيدەوسى تاراعان بولاتىن. بۇعان قاتىستى جۇرتتىڭ پىكىرى ەكى جارىلدى. اتىشۋلى ماسەلەگە ومار جالەلدىڭ ءوزى پىكىر بىلدىرۋگە ءماجبۇر بولدى.

– مەنىڭ وسىندا بيلەگەن ءبيىمدى مانسۇر دەگەن جىگىت Tik tok جەلىسىنە جۇكتەگەن ەكەن. سودان ينتەرنەتتىڭ ءبارى شۋلاپ كەتتى.

«باس ءبيىمىزدىڭ ءتۇرىن قارا؟»، «تولە بي، قازىبەك، ايتەكە بيلەر كورسە جۇرەگى جارىلىپ ولەر ەدى» دەگەن پىكىرلەر كەتىپ جاتىر.

سوندا ادام بيلەۋگە بولماي ما؟ كونستيتۋسيادا تىيىم سالىنباعان، سالت-داستۇردە شەكتەۋ قويىلماعان.

اتاقتى شاشۋباي قوشقارباي ۇلى 80 جاسقا دەيىن بيلەگەن. قازاقتاردا بۇرىن سال-سەرىلەردىڭ ءبارى بيلەگەن. «اققۋ»، «قۇس ءبيى»، «بۇركىت ءبيى» دەگەن بيلەر بولعان. ءقازىر ءبىز ءوز ناداندىعىمىزدان ءبيدى جوققا شىعارىپ تۇرمىز. بي – قۇدايمەن بايلانىسقا شىعۋ، – دەيدى ومار جالەل.

ايتا كەتەيىك. بىلتىر تۇركىستان وبلىسىنىڭ تۇلكىباس اۋدانىنداعى ماشات اۋىلىندا وتكەن جيىندا توعىز وبلىستان كەلگەن بيلەر ءبىراۋىزدان توبە بي رەتىندە ومار جالەلدى سايلاعان بولاتىن. كەيىن بي بولىپ سايلانعان فيلوسوفقا بەلگىلى ءبىر كەزەڭدەردە اتقارعان ىسىنە ەسەپ بەرىپ وتىرۋى مىندەتتەلدى.