كيىز ۇيدە جارتىلاي جالاڭاش بيلەگەن جاستاردىڭ ۆيدەوسى قوعامدا داۋ تۋعىزدى. دەپۋتاتتار دا وسى ماسەلەگە وراي قۇزىرلى ورگاندارعا جۇگىندى، - دەپ حابارلايدى Dalanews.kz.
دەپۋتات سامات مۇسابايەۆ ساۋالىن باس پروكۋرور بەرىك اسىلوۆقا، ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆقا جولدادى.
"بابادان قالعان ەڭ قاستەرلى مۇرامىزدىڭ ءبىرى كيىز ءۇي ەدى. سان عاسىر بويى حاندارىمىزعا ەڭسەسى بيىك اق وردا، حالقىمىزعا قۇت ۇيالاعان باسپانا بولعان سول كيىز ۇيگە جانە باسقا دا قۇنىدىلىقتارىمىزعا اقپاراتتىق شابۋىل دا باستالدى. كۇنى كەشە ويۋلاعان كيىز ۇيدە ۇلتتىق كيىم كيىپ، جارتىلاي جالاڭاشتانىپ ويقاستاعان ۇشەۋدىڭ الەۋمەتتىك جەلىنى شارلاعان بەينەروليگى ءيسى قازاقتىڭ اشۋ-ىزاسىن تۋدىرىپ وتىر. حالىقتىڭ بۇعان نارازىلىعى ابدەن ورىندى"، - دەدى مۇسابايەۆ.
ونىڭ ايتۋىنشا، ەڭ اياۋلى دۇنيەڭدى اياققا تاپتاسا، ۇلتتىق كيىممەن جالاڭاشتانسا، تورىڭدە اۋرەتىن اشىپ تايراڭداسا – بۇل بۇكىل ۇلتتى، دەنى قازاق، رۋحى بيىك ەلىمىزدى قورلاۋمەن پارا-پار.
"ەڭ سوراقىسى – الگى جىن-ويناقتاعى ءۇش ۇزىننىڭ ورتاداعى "سيراقتى پريماسى" ەز ەكەن. بۇل – حالقىمىزعا قارسى مىسىق تىلەۋلى، تەرىس نيەتتىلەردىڭ الدىن الا جەتە ويلاستىرىپ، قازاقى دۇنيەنى، ۇلتتىق قۇندىلىقتاردى قۇنسىزداندىرۋعا، مازاق ەتۋگە باعىتتالعان قاساقانا جاۋلىق ارەكەتى دەپ بىلەمىز. تال تۇستە تورىمىزدە تايراڭداعانى – ناعىز باسىنعاندىق. ولار بۇگىن تورىمىزدە تايراڭداسا، ەرتەڭ توبەمىزدە ويناماسىنا كىم كەپىل؟! سوندىقتان بۇعان كوز جۇمىپ قاراپ، جاي قالدىرا سالۋعا بولمايدى.
"الباستى قاباققا قاراپ باسادى" دەگەن. بۇل بىرىنشىدەن، قوعامنىڭ وسى ارەكەتكە قالاي ءۇن قاتاتىنىن بايقايىن دەگەن استىرتىن سىر تارتۋ ءتاسىلى بولسا، ەكىنشىدەن، لگبت ناسيحاتىنا توسقاۋىل قويماق تالاپقا دەگەن اشىق قارسىلىق، ۇشىنشىدەن، وسكەلەڭ بۋىندى ءوز ۇلتتىق قۇندىلىقتارىنان جەرىندىرۋ ارەكەتى"، - دەدى ول.
سونىمەن قاتار، مۇسابايەۆ بۇل ماسەلەنى ءبىر توپ دەپۋتات بىلتىر ءماجىلىس مىنبەرىنەن كوتەرىپ، پلاتفورمالاردا، الەۋمەتتىك جەلىلەردە ۇلتتىق مادەنيەتىمىزگە سايكەس كەلمەيتىن اقپاراتتىق ونىمدەردى تاراتۋعا تىيىم سالۋدى، تەرىس اعىمداردى ناسيحاتتايتىن اقپارات كوزدەرىنەن ساقتايتىن زاڭ نورمالارىن ازىرلەۋدى ۇسىنعاندارىن جەتكىزدى.
ال تاياۋدا قوعام بەلسەندىلەرى لگبت ناسيحاتىنا قارسى پەتيسيا جاريالاعان ەدى. نەبارى 2 اپتادا وسى تالاپتى قولداپ، 50 مىڭ قول جينالعان.
"بۇل – لگبت-نىڭ ەلىمىزگە قاجەتسىز ءارى جات قۇبىلىس ەكەندىگىنىڭ، وعان حالىقتىڭ اشىق قارسىلىعىنىڭ انىق كورىنىسى. الدا وتەتىن پەتيسيا قورىتىندىسىن قاراۋ وتىرىسىنا قوعام بەلسەندىلەرىن، ۇلت جاناشىرلارىن بەلسەنە قاتىسۋعا شاقىرامىن. بەينەروليكتەگى ۇلتتىق قۇندىلىقتارىمىزدى قورلاۋ كورىنىسى – ابدەن شەكتەن شىققاندىق. سوندىقتان قۇقىق قورعاۋ ورگاندارى وسى ماسەلە بويىنشا ناقتى قۇقىقتىق باعاسىن بەرۋى ءتيىس. بۇدان بىلاي ۇلتتىق قۇندىلىقتارىمىز – دومبىرا، قوبىز، كيىز ءۇي، ۇلتتىق كيىم، ۇلتتىق تاعام سەكىلدى اسىل جادىگەرلەرىمىزدى قانداي-دا تەرىس ماقساتتا پايدالانۋ، مازاق ەتۋ – ۇلت نامىسىنا قول سۇعۋ، ۇلتتىڭ بەدەلىن تۇسىرۋگە باعىتتالعان قىلمىستىق ارەكەت دەپ باعالانىپ، قىلمىستىق جاۋاپتىلىقپەن جازالانۋى ءتيىس.
قورىتا كەلە، قازاقستان رەسپۋبليكاسىنىڭ باس پروكۋراتۋراسىنا، ۇلتتىق قاۋىپسىزدىك كوميتەتىنە اتالعان بەينەروليك بويىنشا قۇقىقتىق باعا بەرىپ، وعان قاتىستى ناقتى شارا قولدانۋدى سۇرايمىز. اتا داستۇرىمىزگە قول سۇعۋ – ۇلتتىق قاۋىپسىزدىگىمىزگە نۇقسان كەلتىرۋ، ۇلتتىق قۇندىلىقتاردى تۇبىرىمەن جويۋمەن تەپە-تەڭ"، - دەدى دەپۋتات.
