بۇگىن شەرزات بولاتتى ولتىرگەندەردىڭ ءىسى قايتادان قارالادى، دەپ حابارلايدى Dalanews.kz.

بۇل تۋرالى جابىرلەنۋشى تاراپتىڭ ادۆوكاتى مەيىرمان شەكەيەۆ حابارلادى. 

ياعني 18 تامىزدا قونايەۆ قالاسىندا شەرزات پولاتتى ولتىرگەنى ءۇشىن سوتتالعانداردىڭ اپەللياسيالىق شاعىمى قارالادى. 

"ءبىز كوماندامىزبەن سوتقا دايىندالىپ وتىرمىز. 18 تامىزدا 8 سوتتالۋشىنىڭ اپەللياسيالىق شاعىمى الماتى وبلىستىق سوتىنىڭ عيماراتىندا قونايەۆ قالاسىندا قارالادى. سونىمەن قاتار، توبەلەس بولعان وقيعا ورنىندا جۇرگەن ەكى قىز – ەلميرا نۇربەكوۆا مەن دانا جاقسىگەلدى قاتىستى ءىس، ودان قالسا، كۋاگەر يۋلداش روزىباكييەۆ پەن ارلان قازىكەنوۆكە قاتىستى شىققان ءبىرىنشى ساتىنىڭ جەكە قاۋلىسىنا كەلتىرىلگەن جاقسىگەلدى دانانىڭ جەكە شاعىمى سول سوت وتىرىسىندا قارالادى"، - دەيدى شەكەيەۆ. 

شەرزات بولاتتىڭ ءولىمى تۋرالى نە بەلگىلى؟

ەسكە سالايىق، بىلتىر تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم شەرزات بولات كوز جۇمدى.

كامەلەتكە تولماعان بالانى ءولتىرۋ دەرەگى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى. سونداي-اق، ولاردىڭ ءۇيى ورتەنىپ كەتتى.

كوپ ۇزاماي، ياعني 9 جەلتوقساندا مارقۇم شەرزات بولاتتىڭ اعاسى نۇرعانات عايىپبايەۆ اجال قۇشتى. پوليسيا دەپارتامەنتى الدىن الا دەرەكتەر بويىنشا ول سۋيسيد جاساعانىن مالىمدەدى. وعان دالەل رەتىندە پوليسەيلەر نۇرعاناتتىڭ تۋىسىنا مەسسەندجەر ارقىلى جازعان حاتىن جاريا ەتتى. 

ال مارقۇم شەرزاتتىڭ اكەسى باۋىرى نۇرعانات عايىپبايەۆتى جەر قوينىنا تاپسىرعاننان كەيىن بۇقارالىق اقپارات قۇرالدارىمەن كەزدەسۋدى تالاپ ەتىپ، كوشەگە شىقتى. الايدا اراعا ۇزاق ۋاقىت سالماي قارجاۋباي نۇرىموۆتى پوليسيا قىزمەتكەرلەرى ۇستاپ اكەتتى. ارتىنشا شەرزات بولاتتىڭ اپكەسى قاماۋعا الىندى. كەيىن قارجاۋباي نۇرىموۆ 15 تاۋلىككە اكىمشىلىك قاماۋعا الىندى.

جۋىردا وسى ءىس بويىنشا سوت شەشىمى شىقتى. تەرگەۋ مالىمەتىنشە، شەرزاتقا پىشاق جاراقاتىن سالعان باستى ايىپتالۋشى ابزال شىناسىل 23 جىلعا باس بوستاندىعىنان ايىرىلدى. راۆيل ساكييەۆ 20 جىلعا سوتتالدى.

قالعان ايىپتالۋشىلار 7 جىلدان 15 جىلعا دەيىن باس بوستاندىعىنان ايىرىلدى. كامەلەتكە تولماعان دۋمان ىسقاق 1،5 جىلعا باس بوستاندىعىنان ايىرىلدى.