"اقجولدىقتار" ءوز مالىمدەمەسىندە "بولاشاق" باعدارلاماسىن جۇزەگە اسىرۋشىلاردىڭ جۇمىسى سۇيىلىپ كەتكەن جاسىرماپتى.
– ءبىزدىڭ "بولاشاققا" قاتىستى سۇراعىمىز كوپ. بۇگىندە ماجىلىستە جاڭا "الەۋمەتتىك كودەكس" تالقىلانۋدا. وسى زاڭنامانى تالقالاۋ كەزىندە ەلىمىزگە الداعى ۋاقىتتا وزەكتى ماسەلەلەردى شەشۋ ءۇشىن وزگە ەلدەردەن 200 عىلىمي قىزمەتكەرلەر مەن مامانداردى تارتۋ كەرەك ەكەن.
ءدال وسى ساتتە ءبىزدىڭ "بولاشاقپەن" شەتەلدە وقىپ كەلگەن ماماندار قايدا دەگەن زاڭدى سۇراق تۋىندايدى. راسىمەن دە ءبىزدىڭ ماماندار قايدا؟
30 جىلدا 12 مىڭنان استام مامان داياارلانعان. ءبىراق ەلىمىزدە مامان تاپشىلىعى ءالى جويىلعان جوق. وسىدان-اق "بولاشاق" باعدارلاماسى وزىنە تاپسىرىلعان مىندەتتى تولىق ورىنداماعانىن بايقايمىز، – دەپ اقجولدىقتار ماسەلەنى ۇكىمەتكە قابىرعاسىنان قويىپتى.
ايتسا ايتقاندا 30 جىل بويى "بولاشاق" باعدارلاماسى بويىنشا مامان دايىنداساق تا، مامان تاپشىلىعى جويىلعان جوق.
ءبىراق بيلىكتىڭ ۇشار باسىنداعى جاۋاپتى قىزمەتتەرگە تاعايىندالىپ جاتقان جاس كادرلاردى ءبارىنىڭ "بيوگرافياسىنا" قاراساڭىز، امەريكا مەن باتىس ەلدەرىنىڭ ايدىك ۋنيۆەرسيتەتتەرىندە ءبىلىم العان بىلىكتى مامان ەكەنىن بايقاۋعا بولادى.
ءبىراق ەشقايسىڭ سول العان ماماندىقتارى بويىنشا عىلىممەن اينالىسىپ، عىلىمدا جەتىستىككە جەتپەگەن.
شەتەلدە وقىپ كەلگەن جاستاردىڭ ءبارى بيلىكتىڭ جالىنا جارماسىپ، شەنەۋنىك بولۋعا قۇمار. وسىدان كەيىن كەز كەلگەن ادامنىڭ كوكەيىندە "بولاشاقتىقتاردىڭ" كوپشىلىگى شەندى بولۋ ءۇشىن شەتەلدە وقىعان با دەگەن سۇراق تۋىندايدى.
حالىققا "بولاشقپەن" وقىپ كەلگەندەردىڭ باسشى-قوسىشى، اگەنتتىك ءتوراعاسى، اكىم ورىنباسارى بولعانىنىڭ نە كەرەگى بار؟
ەگەر جاعداي وسىلاي جالعاسا بەرەتىن بولسا، "بولاشاق" باعدارلاماسىن جابا سالۋ كەرەك قوي. بيلىك باسىنا بارعان "بولاشاقتىقتاردىڭ" ەل ءۇشىن تاۋ قوپارىپ، تاس جارعانىن دا كورمەدىك.
"بولاشاقتىڭ" العاشقى تۇلەگى بيشىمبايەۆتىڭ جەمقورلىققا شاتىلىپ، اباقتىعا قامالعانىن جۇرتتىڭ ءبارى بىلەدى. سوندىقتان "اق جول" پارتياسىنىڭ ماجىلىستەگى وكىلدەرىنىڭ ماسەلە كوتەرۋى وتە ورىندى.
– سوڭعى ۋاقىتتارى "بولاشاق" ستەپەندياتتارىنىڭ ءارقايسىنىڭ جۇمسالاتىن شىعىننىڭ 30 پايىزى كۇماندى اگەنتتىك كوميسسياسىنا جۇمسالاتىنىن قۇلاعىمىز شالىپ قالدى. مۇنى بريتاندىق ۋنيۆەرسيتەتتەر ءمالىم ەتكەن بولاتىن.
بۇدان باسقا "بولاشاق" باعدارلاماسىنا باعىتتالعان قارجىنى ورتالىق قىزمەتكەرلەرى بانك دەپوزيتتەرىنە سالىنىپ، 3 ملرد تەڭگەنى جوق قىلعانىن دا بىلەمىز.
ال 2018 جىلى «استانا بانكى» بانكروت بولعاندا حالىقارالىق باعدارلامالار ورتالىعى بيۋدجەتىنىڭ 7%-ىن جوعالتقانىن قالاي ۇمىتۋعا بولادى؟ بۇل از دەسەڭىزدەر، 2019 جىلى انتيكور ورتالىقتى تەكسەرۋ جۇرگىزگەندە قارجىعا قاتىستى كوپتەگەن كەلەڭسىزدىكتەردى انىقتاعان.
ايتالىق، قارجىنى دۇرىس باسقارماۋ، ستەپەندياتتارعا تولەم جاساۋدا ورتاق ءتارتىپتىڭ بولاۋى، جۇمىستىڭ تيىمسىزدىگى سىندى ماسەلەلەر سۋ بەتىنە قالقىپ شىقتى، – دەپ "اق جول" پارتياسى اششى شىندىقتى جايىپ سالدى.
ەندى "بولاشاقتىڭ" تۇلەگى ق ر عىلىم جانە جوعارعى ءبىلىم ءمينيسترى ساياسات نۇربەك ءدال وسى ماسەلەگە قاتىستى تۇسىنىكتەمە بەرۋى كەرەك.
