بەلگىلى ساياساتتانۋشى عازيز ابىشيەۆ تالعارداعى توبەلەس كەزىندە قازا تاپقان شەرزات بولاتتىڭ ءۇيىنىڭ ورتەنىپ كەتۋىنە قاتىستى ويىن ايتتى، دەپ حابارلايدى Dalanews.kz.
"مۇنىمەن بىرەۋ مەملەكەتكە ءبىر نارسەنى ىمداپ وتىرعان سياقتى: مەملەكەتتىڭ قولىنان تۇك كەلمەيدى، مەملەكەتتىك ەشكىم قۇرمەتتەمەيدى، ەلدە ءتارتىپ ساقتالماي جاتقانىن جانە ءبارى بىرتىندەپ ىدىراپ جاتىر دەگەندى جەتكىزگىسى كەلىپ وتىرعان سياقتى.
بۇگىن ءۇي ورتەندى. ەرتەڭ يتاليالىق مافيالار تۋرالى فيلمدەردەگىدەي سۋديالارمەن، كوميسسارلار مەن شەنەۋنىكتەرمەن توبەلەس باستالا ما؟ الداعى كۇندەرى قىلمىسكەرلەردىڭ قازاقستاننىڭ قاۋىپسىزدىك اپپاراتىنىڭ مۇمكىندىكتەرىنە قانشالىقتى دۇرىس باعا بەرگەنىن كورەمىز"،- دەيدى ابىشيەۆ.
ايتا كەتەيىك، 12 قازانعا قاراعان ءتۇنى تالعار تراگەدياسىندا قازا تاپقان شەرزات بولاتتىڭ ءۇيى ورتەنىپ كەتتى. بۇل تۋرالى الەۋمەتتىك جەلىدە حابارلانا باستادى.
زارداپ شەككەندەر مەن قازا تاپقاندار جوق. كۋاگەرلەردىڭ سوزىنشە، ءۇي تۇتاس ورتەنىپ كەتكەن.
بۇل دەرەككە پوليسيا دەپارتامەنتى جاۋاپ بەردى. 12 قازانعا قاراعان ءتۇنى ەڭبەكشىقازاق اۋدانى ازات اۋىلىنداعى ۇيلەردىڭ بىرىندە ءورت بولدى.
بوتەننىڭ مۇلكىن قاساقانا جويۋ دەرەگى بويىنشا پوليسيا قىلمىستىق ءىس قوزعادى.
تەرگەۋ اياسىندا كۋاگەرلەردەن جاۋاپ الىنىپ جاتىر، سونداي-اق بەينەباقىلاۋ كامەرالارىنىڭ جازبالارى زەرتتەلىپ جاتىر.
قازىرگى ۋاقىتتا وقيعانىڭ ءمان-جايى انىقتالىپ جاتىر.
ەسكە سالايىق، بۇعان دەيىن تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم كوز جۇمدى. جانجال جىگىتتىڭ وتباسى جالعا الاتىن دۇكەننەن باستالعان. تۋىستارىنىڭ ايتۋىنشا، ساۋدا نۇكتەسىنە كەلگەن ساتىپ الۋشى سىرا الىپ، اقشاسىن تولەۋدەن باس تارتقان. وسى جاعدايدان كەيىن توبەلەس باستالعان.
كامەلەتكە تولماعان بالانى ءولتىرۋ فاكتىسى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى.
قازىرگى تاڭدا كىنالى دەپ تانىلعان 7 ادام ۇستالىپ، ۋاقىتشا ۇستاۋ يزولياتورىنا قاماۋعا الىنعان.
