بۇرىنعى مەجٸلٸس دەپۋتاتى, قازاقستاننىڭ ەڭبەك سٸڭٸرگەن ەرتٸسٸ بەكبولات تٸلەۋحان جۋرناليست امان تاسىعانعا بەرگەن سۇحباتىندا وتباسى مەن ٷش جارى تۋرالى پٸكٸر بٸلدٸردٸ, دەپ حابارلايدى dalanews.kz.
سۇحبات بارىسىندا ول باستاپقىدا جەكە ٶمٸرٸ, جۇبايلارى مەن بالالارى تۋرالى كەڭٸنەن ەڭگٸمەلەگٸسٸ كەلمەگەنٸن ايتتى. دەگەنمەن جۋرناليستٸڭ ساۋالدارىنا قىسقاشا جاۋاپ بەردٸ.
بەكبولات تٸلەۋحاننىڭ ايتۋىنشا, اناسى ونىڭ ٷشٸنشٸ جارىن كٶرمەگەن, ياعني ونىمەن تانىسىپ ٷلگەرمەگەن.
«تٶسەگٸمدەگٸ ەڭگٸمەنٸ ايتپاي-اق قويايىقشى. راۋشان, كەنجە, جانار – مەنٸڭ بالالارىمنىڭ انالارى. مەن ولاردى قۇرمەتتەيمٸن. بٸر نەرسە ايتسام, بالامنىڭ دا, ولاردىڭ دا, تۋىستارىنىڭ دا كٶڭٸلٸنە تيٸپ كەتۋٸ مٷمكٸن», – دەدٸ ول.
جۋرناليست ودان ٶمٸرگە قايتا كەلسە, تاعى دا ٷش رەت ٷيلەنەر مە ەدٸ دەگەن سۇراق قويعان.
بەكبولات تٸلەۋحان بۇعان ٶز ٶمٸر جولىن تاعدىرمەن بايلانىستىرا جاۋاپ بەردٸ.
«بۇل – مەنٸڭ تاعدىرىم. ەكٸنشٸ رەت ٶمٸرگە كەلسەم دە وسى جولمەن جٷرەر ەدٸم دەگەن سٶز بار عوي. اللا تاعالا يماندى, قازاقتىڭ جاقسى قىزدارىن ماعان جار ەتتٸ. ەرقايسىنىڭ ٶز ورنى بار», – دەدٸ ول.
سۇحبات بارىسىندا ەكس-دەپۋتات بالالارىنىڭ ٶزگە ۇلت ٶكٸلٸمەن شاڭىراق كٶتەرۋٸنە قارسى ەمەس ەكەنٸن دە ايتتى. الايدا ونىڭ پٸكٸرٸنشە, بولاشاق جارىنىڭ مۇسىلمان بولعانى ماڭىزدى.
سونىمەن قاتار ول بالانىڭ ماماندىق تاڭداۋىنا نەمەسە دٸني كٶزقاراسىنا اتا-انانىڭ تولىق ىقپال ەتۋٸ مٷمكٸن ەمەس ەكەنٸن مويىندادى.
