الماتىدا «جاس قانات. بالالار-2024» اتتى ەكىنشى رەسپۋبليكالىق بالالار شىعارماشىلىعى بايقاۋى ءوتتى. «ازيا داۋىسى» حالىقارالىق فەستيۆالىنىڭ قوعامدىق قورى ۇجىمى قالا اكىمدىگىنە بالالار بايقاۋىن وڭتۇستىك استانادا وتكىزۋ يدەياسىنا قولداۋ كورسەتكەنى ءۇشىن العىس ءبىلدىردى.
ايتا كەتەيىك، بۇل بايقاۋ – الەۋمەتتىك جوبا. كورەرمەندەرگە ارنالعان بيلەتتەر دە، قاتىسۋشىلار ءۇشىن دە بايقاۋعا قاتىسۋ تەگىن بولدى. بيىل كونكۋرسقا قازاقستاننىڭ تۇكپىر-تۇكپىرىنەن دارىندى بالالاردان 130 ءوتىنىم كەلىپ تۇسكەن. سولاردىڭ ىشىنەن 17 ۇمىتكەر فينالعا ءوتتى. ال كورەرمەندەرگە فيناليستەر ونەرىن تاماشالار الدىندا ولارمەن الدىن الا Instagram جەلىسىندەگى @zhas.qanat.official جانە @voice_of_asia_official پاراقشالارى ارقىلى تانىسۋ مۇمكىندىگى بەرىلدى. سونىمەن قاتار، وسى پلاتفورمالاردا كورەرمەندەر اراسىندا داۋىس بەرۋ ۇيىمداستىرىلدى.
بيىلعى بايقاۋعا قاتىسۋشىلار دەڭگەيى وتە جوعارى بولعاندىقتان كاسىبي قازىلار القاسى جەڭىمپازدى انىقتاۋ بارىسىندا ءبىراز قينالدى. «جاس قانات. بالالار-2024» بايقاۋىنىڭ قازىلار قۇرامىندا ەلىمىزدىڭ اتاقتى ونەر جۇلدىزدارى قازاقستان رەسپۋبليكاسىنىڭ ەڭبەك سىڭىرگەن قايراتكەرلەرى نۇرلان ابدۋللين، ايگۇل بابايەۆا جانە ءجاميلا سەركەبايەۆا، كومپوزيتور ارتىق توقسانباي، ءانشى، پروديۋسەر، «جاس قانات» بايقاۋىنىڭ 2000 جىلعى لاۋرەاتى نۇرگۇل نۇعىمانوۆا، ەسترادا جۇلدىزى پارۆيز نازاروۆ جانە قازاقستان رەسپۋبليكاسىنىڭ ەڭبەك سىڭىرگەن ءارتىسى، قازاقستان كومپوزيتورلار وداعىنىڭ مۇشەسى مەدەۋ ارىنبايەۆ بار.
زالداعى اتموسفەرا ەرەكشە سەزىلدى. قاتىسۋشىلاردى قولداۋعا ولاردىڭ دوستارى، تۋىستارى مەن ارنايى قولداۋ توپتارى كەلدى. سونىمەن بايقاۋدىڭ ناتيجەسى بويىنشا ءۇشىنشى ورىنعا قاراعاندى قالاسىنان كەلگەن 13 جاستاعى انسار ابدۋراحمان يە بولدى. ال ەكىنشى ورىندى 13 جاسار الماتىلىق سوفيا بالعازينا جەڭىپ الدى. ءبىرىنشى ورىن تالدىقورعان قالاسىنان كەلگەن 12 جاستاعى ءىنجۋ ەسىمجانعا بۇيىردى. ونى ماماندار ءقازىردىڭ وزىندە بولاشاق بيبىگۇل تولەگەنوۆا دەپ اتاپ وتىر. ال «جاس قانات. بالالار-2024» بايقاۋىنىڭ باس جۇلدەسىن الماتى قالاسىنىڭ تۇرعىنى، 13 جاستاعى ازات سۇندەتبەك جەڭىپ الدى.
سونداياق بايقاۋ اياسىندا بىرنەشە ارنايى نوميناسيالاردىڭ جەڭىمپازدارى مەن ديپلومانتتارى انىقتالدى. «ءۇمىت» ارنايى جۇلدەسى الماتىلىق قۋانىش بايمۇحامبەتوۆكە تابىستالدى. ۇلتتىق داستۇرلەردى ساقتاعانى ءۇشىن «ازيا داۋىسى» قورىنىڭ ارنايى سىيلىعىن الماتى تۇرعىنى حانشايىم پىشان يەلەندى. دارىندى شىعارماشىلىعى مەن اۆتورلىق ءاندى ۇزدىك ورىنداعانى ءۇشىن داۆيد چارلين دە ماراپاتتالدى. ول بايقاۋ بارىسىندا ءوز تۋىندىسىن ورىندادى. Instagram ارقىلى داۋىس بەرۋ ناتيجەسىندە قاراعاندىدان كەلگەن انسار ابدۋراحمان «كورەرمەندەر كوزايىمى» جۇلدەسىن الدى. الماتى قالاسىنىڭ اكىمى اتىنان ارنايى سىيلىق قاراعاندىلىق اجار ابدىشيەۆاعا بەرىلدى. بۇل سىيلىققا 200 مىڭ تەڭگە كولەمىندە اقشالاي سىياقى قوسىلدى. ەرەكشە ديپلومدارمەن اجار ابدىشيەۆا (قاراعاندى)، ءمادى نۇربوتالى (الماتى) جانە قاۋسار بەكبوسىن (شىمكەنت) ماراپاتتالدى. ەرەكشە اتاقتارعا يە بولعان بارلىق ديپلومانتتارعا 50 مىڭ تەڭگەدەن سىياقى بەرىلدى.
قازىلار القاسى مۇشەلەرى دە نازاردان تىس قالعان جوق. مەدەۋ ارىنبايەۆقا وتاندىق مادەنيەتتى دامىتۋعا قوسقان ۇلەسى ءۇشىن مۇرات يرعالييەۆ پەن الەكساندر پونوماريەۆ اتىنداعى ارنايى جۇلدە تابىستالدى.
«جاس قانات. بالالار-2024» تەك ءان بايقاۋى عانا ەمەس، بالالار شىعارماشىلىعىنىڭ مەرەكەسى! بايقاۋ اياسىندا جاس موبيلوگرافتاردىڭ كونكۋرسى ءوتتى. ولاردىڭ جۇمىستارىن @zhas.qanat.official رەسمي پاراقشاسىنان كورۋگە بولادى. بايقاۋ جەڭىمپازدارى TECNO mobile كومپانياسىنىڭ سىيلىقتارىن – جاڭا سمارتفوندار مەن فيرمالىق مەرچتەردى الدى. جەڭىمپازدار: 1 ورىن – نۇراي بەكەن (تالدىقورعان)، 2 ورىن – ابزال بەيسەمبايەۆ (قاراعاندى)، 3 ورىن – كەربەز توقتارباي (جاركەنت). سونىمەن قاتار، «جاس قانات. بالالار-2024» اياسىندا ءداستۇرلى «بالالار «جاس قانات» پەن «ازيا داۋىسى» سۋرەتتەرىن سالادى» كونكۋرسى ۇيىمداستىرىلدى. بۇل بايقاۋدىڭ جەڭىمپازدارىن ديزاينەرلەر، سۋرەتشىلەر، يلليۋستراتورلار مەن انيماتورلاردان قۇرالعان كاسىبي قازىلار القاسى انىقتادى. قازىلار القاسىنىڭ تۇراقتى ءتورايىمى – «By ArT» ستۋدياسىنىڭ نەگىزىن قالاۋشى جانە الماتىداعى بالالاردى دامىتۋ ورتالىعىنىڭ جەتەكشىسى اجار تولەۋبايەۆا. بايقاۋعا ەلىمىزدىڭ تۇكپىر-تۇكپىرىنەن 206 جۇمىس قاتىسىپ، ونىڭ 126-سى فينالعا ءوتتى. ناتيجەسىندە 3 لاۋرەات جانە 11 نوميناسيا بويىنشا جەڭىمپازدار انىقتالدى. جۇمىستار شىعارماشىلىق ويلاۋ، وزىندىك ەرەكشەلىك، ءتۇس قانىقتىعى، ورىندالۋ شەبەرلىگى مەن ۇلتتىق كولوريتتى بەينەلەۋ سياقتى كريتەرييلەر بويىنشا باعالاندى. 1 دارەجەلى لاۋرەات – پاۆلودارلىق تايسيا چەريەۆكو، 2 دارەجەلى لاۋرەات – ورالدان كەلگەن ارۋجان بيسەنوۆا، 3 دارەجەلى لاۋرەات – الماتىلىق انيسا فارراح. بارلىق ديپلومانتتار مەن جۇلدەگەرلەر دەمەۋشىلەردىڭ سىيلىقتارى مەن ديپلومدارىن يەلەندى. ۇزدىك جۇمىستاردى الماتى قالاسىنداعى قازاقستان رەسپۋبليكاسىنىڭ ۇلتتىق كىتاپحاناسىنىڭ فويەسىندە جىلدىڭ سوڭىنا دەيىن كورۋگە بولادى.
ەرەكشە اتاپ وتەرلىگى، بيىلعى سۋرەت بايقاۋىنا العاش رەت دەمەۋشى تابىلدى. D&D beauty and Cosmetology ستۋدياسىنىڭ نەگىزىن قالاۋشى داۋرەن اياپوۆ لاۋرەاتتاردىڭ الماتىعا جانە كەرى باعىتتاعى جول شىعىندارىن تولىقتاي وتەپ، بايقاۋعا قارجىلاي قولداۋ كورسەتتى. تولىق اقپارات @zhas.qanat.official پاراقشاسىندا.
«جاس قانات» جاس ورىنداۋشىلاردىڭ 30 جىلدىق مەرەيتويلىق بايقاۋى تۋرالى اقپارات كەيىنىرەك بەرىلەدى. قوعامدىق قوردىڭ پرەزيدەنتى، «ازيا داۋىسى» حالىقارالىق فەستيۆالىنىڭ جەتەكشىسى يرينا كوۆىرياكونىڭ ايتۋىنشا، بۇل بايقاۋ مىندەتتى تۇردە وتپەك.
