ونىڭ ايتۋىنشا، ەلباسى، پارتيا ءتوراعاسى نۇرسۇلتان نازاربايەۆتىڭ تاپسىرماسىمەن قىركۇيەكتەن باستاپ بارلىق دەڭگەيدەگى ءماسليحاتتارداعى «Nur Otan» فراكسياسىنىڭ دەپۋتاتتارىن كەشەندى تۇردە باعالاۋ بويىنشا ەلەكتروندى پلاتفورما العاش رەت پيلوتتىق رەجيمدە ىسكە قوسىلدى.
بۇعان دەيىن ۇلكەن دايىندىق جۇمىسى جۇرگىزىلگەن. دەپۋتاتتار رەيتينگىسىن قالىپتاستىرۋ ەرەجەسى ازىرلەنىپ، ول ساياسي كەڭەس بيۋروسىنىڭ شەشىمىمەن بەكىتىلدى، اقپاراتتىق جۇيە جاسالدى، دەرەكتەر بازاسى سيرفلاندىرىلعان.
رەيتينگتى ەندىرۋ بيلەۋشى پارتيادان سايلانعان دەپۋتاتتاردىڭ قىزمەتىن جانداندىرۋعا، حالىقپەن كەرى بايلانىستى كۇشەيتۋگە جانە جەرگىلىكتى جەرلەردە سايلاۋالدى ۋادەلەردىڭ ىسكە اسىرىلۋ تيىمدىلىگىن ارتتىرۋعا جۇيەلى سەرپىن بەرگەنىن ايتقان باۋىرجان بايبەك، 217 سايلاۋالدى باعدارلاماعا قوعامدىق-پارتيالىق مونيتورينگ جۇرگىزۋگە 2،7 مىڭ دەپۋتات دەربەس جاۋاپ بەرەتىنىن ەسكە سالدى.
– ەلباسى، پارتيا ليدەرى ن.ءا. نازاربايەۆ اتاپ وتكەندەي، «بۇگىندە قوعامنىڭ دەپۋتاتتارعا قوياتىن تالابى ەرەكشە: ولار ازاماتتاردىڭ مۇددەسى مەن ەركىن قورعاپ، قوعام مەن مەملەكەت اراسىنداعى «كوپىر» بولۋى ءتيىس». سوندىقتان ايماقتارعا ساپار اياسىندا وڭىرلىك سايلاۋالدى باعدارلامالاردىڭ ورىندالۋ جانە رەيتينگ جۇيەسىن ەندىرۋ بارىسىن تالقىلاۋ ءۇشىن «Nur Otan» دەپۋتاتتارىمەن توپتىق جينالىستار وتكىزدىم. وڭىرلەردەن تۇسكەن ۇسىنىستاردى ەسكەرە وتىرىپ، رەيتينگتى جەتىلدىرۋ بويىنشا وزگەرىستەر پاكەتى ازىرلەندى. بۇگىن «Nur Otan»-نىڭ ساياسي كەڭەسى بيۋروسىنىڭ شەشىمىمەن پىسىقتالعان ەرەجە بەكىتىلدى، – دەدى ول.
پارتيا ءتوراعاسىنىڭ ءبىرىنشى ورىنباسارى اتاپ وتكەندەي، ەندى رەيتينگ «Nur Otan» دەپۋتاتتارىن، ءماسليحاتتارداعى حاتشىلار مەن فراكسيالار باسشىلارىن قىزمەتىنىڭ ايقىندىعى مەن ەسەپتىلىگىنە باعىتتالعان مەديا بەلسەندىلىككە جانە جۇمىستىڭ تۇپكىلىكتى ناتيجەلەرىنە باعدارلايدى.
– كەلەسى جىلدىڭ اقپان ايىنان باستاپ نۇروتاندىق دەپۋتاتتاردىڭ رەيتينگىسى جاريا فورماتتا جۇرگىزىلەدى. كەز كەلگەن ادام قالاۋىنشا ناقتى ۋاقىت رەجيمىندە حالىق قالاۋلىلارىنىڭ جۇمىسىمەن تانىسىپ، وزەكتى ماسەلەلەردى شەشۋ ءۇشىن سۇراقتار قويىپ، جاۋاپ الا الادى. بۇل قادام مەملەكەت باسشىسى ق.ك. توقايەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن ناقتى ىسكە اسىرۋعا جانە مەملەكەتتىك جۇيەنىڭ ارى قارايعى اشىقتىعى مەن جاريالىلىعى باعدارىنا جول اشاتىن بولادى، – دەپ تۇيىندەدى باۋىرجان بايبەك.
