باۋىرساق ەرتەگٸسٸ
- كەمپٸر, كەمپٸر, قامبانىڭ تٷبٸن قاقساڭشى, ەلەۋٸشپەن ەلەشٸ, قارنى اشقان شالىڭا, باۋىرساق پٸسٸرٸپ بەرسەڭشٸ, - دەپتٸ.
كەمپٸرٸ قالاقشا قولعا الىپتى, قامبانىڭ تٷبٸن قاعىپتى, ەلەۋشپەن ەلەپتٸ, تاباقشاعا سالىپتى, ەكٸ ۋىس ۇن بولىپتى.
قايماققا ۇندى يلەپتٸ, دٶڭگەلەكتەپ الىپتى, ىستىق مايعا سالىپتى, باۋىرساقتى پٸسكەن سوڭ, اتاي باپپەن جەيدٸ دەپ, سۋىتۋعا قويىپتى.
باۋىرساق سۋىپ جاتىپتى, جاتىپ ويعا باتىپتى, قاشايىن دەپ وسى ٷيدەن, بٸر ويعا ناق بەكٸپتٸ. جاقتاۋدان تٷستٸ سەكٸگە, سەكٸدەن تٷستٸ ەدەنگە, تابالدىرىقتان سەكٸرٸپ, جەتٸپ باردى سەنەككە. سەنەكتەن سىرتقا بەتتەدٸ, اۋلاعا شىعىپ كەتەدٸ, اۋلاعا شىعىپ العان سوڭ, دومالاپ سوقپاق جولمەنەن, ۇزاي-ۇزاي كەتەدٸ.
جول بويىمەن دومالاپ, كەلە جاتسا باۋىرساق, قارسى الدىنان تاپ كەلدٸ, ۇزىن قۇلاق قوياناق. سوندا قويان باۋىرساققا:
– باۋىرساق, باۋىرساق, مەن سەنٸ جەيمٸن, - دەپتٸ.
باۋىرساق وعان بىلاي دەيدٸ:
– جەي كٶرمە مەنٸ, قويانىم, ەن ايتىپ بەرەم, تىڭداعىن, - دەيدٸ.
– جارايدى, ەندەشە, ايتا عوي, - دەيدٸ قويان.
مەنٸڭ اتىم – باۋىرساق,
قىزارىپ پٸستٸم – كٶڭلٸم شات.
قامبانىڭ تٷبٸن قىرناعان,
ەلەۋٸشپەن ەلەگەن.
قايماقپەنەن يلەگەن,
كٷيدٸرمەي مايعا پٸسٸرگەن.
اتايدان دا قۇتىلدىم,
ەجەيدەن دە سىتىلدىم,
قويان سەنەن قۇتىلۋ,
قيىن ەمەس – بۇل ماعان!
وسىلاي دەپ, باۋىرساق دومالادى, اڭقاۋ قويان اڭىرىپ تۇرىپ قالدى.
باۋىرساق زىر دومالاپ جٶنەلەدٸ, زىر دومالاپ باۋىرساق كەلە جاتسا, الدىنان سۇرى قاسقىر كەزدەسەدٸ.
– باۋىرساق, باۋىرساق, مەن سەنٸ جەيمٸن, - دەيدٸ قاسقىر.
– سۇرى قاسقىر, مەنٸ جەمەشٸ, ەن سالىپ بەرەم, تىڭداشى, - دەپ باۋىرساق ەندەتە جٶنەلەدٸ.
مەنٸڭ اتىم – باۋىرساق,
قىزارىپ پٸستٸم – كٶڭلٸم شات.
قامبانىڭ تٷبٸن قىرناعان,
ەلەۋٸشپەن ەلەگەن.
قايماقپەنەن يلەگەن,
كٷيدٸرمەي مايعا پٸسٸرگەن.
اتايدان دا قۇتىلدىم,
ەجەيدەن دە سىتىلدىم,
قوياننان دا قۇتىلدىم,
قاسقىر سەنەن سىتىلۋ,
قيىن ەمەس – بۇل ماعان!
باۋىرساق ارى قاراي دومالادى, اڭىرىپ سۇرى قاسقىر جولدا قالدى .
دومالاپ باۋىرساق تاعى جٶنەلەدٸ, الدىنان ايۋ سوندا كەز كەلەدٸ:
– باۋىرساق, باۋىرساق, مەن سەنٸ جەيمٸن, - دەپتٸ ايۋ.
– جەي كٶرمە, ايۋ اتايىم, تىڭداشى ساعان ايتايىن, - دەپ باۋىرساق ەنٸن باستايدى:
مەنٸڭ اتىم – باۋىرساق,
قىزارىپ پٸستٸم – كٶڭلٸم شات.
قامبانىڭ تٷبٸن قىرناعان,
ەلەۋٸشپەن ەلەگەن.
قايماقپەنەن يلەگەن,
كٷيدٸرمەي مايعا پٸسٸرگەن.
اتايدان دا قۇتىلدىم,
ەجەيدەن دە سىتىلدىم,
قوياننان دا قۇتىلدىم,
قاسقىردان دا قۇتىلدىم,
ايۋ سەنەن سىتىلۋ,
قيىن ەمەس – بۇل ماعان!
وسىلاي دەپ, باۋىرساق دومالادى, اڭىرىپ ايۋ مايماق جولدا قالدى.
باۋىرساق دومالاۋمەن كەلە جاتتى, وسىلاي تالاي-تالاي بەلدەن استى, دومالاپ جول ٷستٸندە كەلە جاتسا, قۋ تٷلكٸ جىلماڭ ەتٸپ كەلە قاپتى.
– باۋىرساق, دومالاپ قايدا باراسىڭ, - دەپتٸ سوندا تٷلكٸ.
– جول جٷرٸپ كەتٸپ بارامىن, - دەپتٸ باۋىرساق.
– باۋىرساق, باۋىرساق, مەن سەنٸ جەپ قويام! - دەپتٸ تٷلكٸ,
– جەمەشٸ, تٷلكٸ, ەن سالىپ بەرەم مەن ساعان! – دەپتٸ باۋىرساق.
باۋىرساق سوندا:
مەنٸڭ اتىم – باۋىرساق,
قىزارىپ پٸستٸم – كٶڭلٸم شات.
قامبانىڭ تٷبٸن قىرناعان,
ەلەۋٸشپەن ەلەگەن.
قايماقپەنەن يلەگەن,
كٷيدٸرمەي مايعا پٸسٸرگەن.
اتايدان دا قۇتىلدىم,
ەجەيدەن دە سىتىلدىم,
قوياننان دا قۇتىلدىم,
قاسقىردان دا قۇتىلدىم,
ايۋدان دا سىتىلدىم,
تٷلكٸ سەنەن قۇتىلۋ,
قيىن ەمەس – بۇل ماعان!
– ەنٸڭ جاقسى-اق, باۋىرساق, ناشار ەدٸ بۇل قۇلاق, تۇمسىعىما شىعىپ اپ, ايتىپ بەرشٸ قايتالاپ, داۋىستاپ بٸر قاتتىراق, - دەپتٸ سوندا قۋ تٷلكٸ.
ماقتاعانعا مەز بولدى, تۇمسىعىندا تٷلكٸنٸڭ, باۋىرساق سولاي ەن سالدى.
سوندا تٷلكٸ:
– تاماشا ەكەن ٷنٸڭ دە, تاعى بٸر رەت ايتشى تىڭدايىن, وتىرىپ الىپ تٸلٸمدە! – دەپتٸ.
باۋىرساق تٷلكٸنٸڭ ويىن تٷسٸنبەدٸ, ويلانباستان تٸلٸنە سەكٸرەدٸ, «اپ!», - دەگەندە باۋىرساق قۋ تٷلكٸنٸڭ, ازۋىندا ەپ سەتتە كٷتٸرلەدٸ. ماقتانشاقتىق – جاقسى ەمەس ەي, بالالار, - دەگەن ويمەن بٸتٸردٸك ەرتەگٸنٸ.
ورىس تٸلٸنەن اۋدارعان اسىلبەك بايتانۇلى
دەرەككٶزٸ: adebiportal.kz
