الەۋمەتتىك جەلىدە “اتىراۋ مۇناي وڭدەۋ زاۋىتى” ج ش س جۇمىسشىلارىنىڭ ۇجىمدىق ۇندەۋى پايدا بولدى، دەپ حابارلايدى Dalanews.kz.
قىزمەتكەرلەردىڭ باستى تالابى - ادىلدىككە قول جەتكىزۋ. ۇندەۋدە ولار جوسپارسىز جانە جۇمىس ونىمدىلىگىنە كەدەرگى كەلتىرەتىن تەكسەرىستەرگە شاعىمداناتىندارىن جەتكىزەدى. بۇعان سەبەپ ءبىرىنشى جاعداي – اتىراۋ مۇناي وڭدەۋ زاۋىتىنىڭ بۇرىنعى باس ديرەكتورى شۋحرات دانبايعا قاتىستى ءىس. ەكس-باسشىنىڭ ءىسى بويىنشا قىزمەتكەرلەردەن ارنايى جاۋاپ الىنعان. ءوز كەزەگىندە ولار مورالدىق قىسىمدى باستان وتكەرەدى. كاسىپورىندا جازاتايىم وقيعالارعا جول بەرىلمەگەنىمەن، بوپسالاۋعا ۇقساس ىستەر ورىن العان كورىنەدى. بۇل تۋرالى "اج" باسىلىمى جازادى.
بۇل ءىس قالاي باستالدى؟
الدىمەن “سوت كابينەتى” جۇيەسىندە جالپىعا قولجەتىمدى ش.دانباي مەن ق.سەيدۋالييەۆكە قاتىستى قىلمىستىق ءىس بويىنشا قازاقستان رەسپۋبليكاسى جوعارعى سوتىنىڭ قىلمىستىق ىستەر جونىندەگى سوت القاسىنىڭ №2ۋپ-331-23 قاۋلىسىنا كوز جۇگىرتىپ كورەيىك.
سوت ش.دانباي مەن “AVC Grouر” ج ش س اراسىندا قالىپتاسقان ءوزارا ءتيىمدى قارىم-قاتىناستى انىق كورسەتەدى. كاسىپورىن شەنەۋنىك باسشىلىق ەتكەن كەزەڭدە “پاۆلودار مۇناي-حيميا زاۋىتى” اق-تى جابدىقتاۋمەن اينالىسىپ، ەنشىلەس كومپانيالارمەن بىرگە “پاۆلودار وبلىسىنىڭ بوكس فەدەراسياسى” ۇەۇ جانە اتىراۋ وبلىسى بويىنشا “وڭىرلىك اۋەسقوي بوكس فەدەراسياسى” ۇكىمەتتىك ەمەس ۇيىمىنىڭ ەسەپشوتىنا 200 ميلليون تەڭگە اۋدارعان. بۇل كەزدە دانباي باسشىلىقتا ەدى.
"AVC Group" ج ش س ءوندىرۋشىنىڭ رەسمي وكىلى "ABB" جشس-نەن 82،2 ميلليون تەڭگەگە 4 حروماتوگرافتى ساتىپ الادى. ءبىراق كونسورسيۋمنىڭ كەپىلدىگىمەن جەتكىزۋ سوماسىن 495،5 ميلليوننان اسىرىپ كورسەتىپ، ءدال وسىنداي حروماتوگرافتاردى اتىراۋ مۇناي وڭدەۋ زاۋىتىنا 577،7 ميلليون تەڭگەگە جەتكىزگەن.
2019 جىلى زاۋىت كونسورسيۋمنان (قىتايلىق Sinopec Engineering كومپانياسى، جاپوندىق Marubeni Corporation جانە "NGSC KazStroService" اق) مۇنايدى تەرەڭ وڭدەۋ كەشەنىن (كەلىسىمشارت سوماسى 555،6 ملرد تەڭگە) قابىلدايدى.
2016 جىلى كونسورسيۋم اتىراۋ مۇناي وڭدەۋ زاۋىتىنا ەلەكتر ەنەرگياسىن وندىرۋگە ارنالعان م-0151 تۋربوكەڭەيتكىشىن بەرەدى. ول ءۇشىن زاۋىت Sinopec Engineering كومپانياسىنا 4،1 ملرد تەڭگە اۋدارادى. ءبىراق جابدىقتان اقاۋ شىعادى. ءبىر رەتتەن ساتىپ الۋ ارقىلى 2020 جىلدىڭ 24 قىركۇيەگىندە اتىراۋ مۇناي وڭدەۋ زاۋىتى "ەون ەنەرگو" جشس-مەن شارت جاساسادى. ول ءوز كەزەگىندە "AVC Group" ج ش س اففيلييرلەنگەن "AVC Production" جشس-مەن جوندەۋ جانە ىسكە قوسۋ بويىنشا كەلىسىم-شارتقا وتىرادى. اقشا تولەنەدى، ءبىراق دەتاندەر جۇمىس ىستەمەيدى.
2018 جىلى كونسورسيۋم ءبىرىنشى R-1301 رەاكتورىنىڭ PI-244 جەڭىل نافتاسىن Parisom يزومەرلەۋىنە ارنالعان جابدىقتى جەتكىزەدى. وعان اتىراۋ مۇناي وڭدەۋ زاۋىتى 1،5 ملرد تەڭگە تولەيدى. زاۋىتتى ىسكە قوسۋ كەزىندە كاتاليزاتور تەرميالىق سوققىنىڭ اسەرىنەن سوندىرىلەدى. دانباي بۇل كاتاليزاتوردى جەتكىزۋدى 2021 جىلعا ارنالعان ساتىپ الۋ جوسپارىنا ەنگىزسە، ودان كەيىنگى باس ديرەكتور ا.قايىردەنوۆ “NOVUS Energy” جشس-نەن 1،7 ملرد تەڭگەگە ساتىپ الادى.
ش.دانباي دا اقاۋى بار جابدىقتى قابىلدايدى. ال 728 ميلليون تەڭگەگە الىنعان قۇرال-جابدىققا زاۋىت باسشىلىعى تاراپىنان ەشقانداي شارا جاسالماعان. 2022 جىلى جۇرگىزىلگەن تەكسەرىس ناتيجەسى - سۇزگىلەر مەن سۋسپەنزيا سەپاراتورىنىڭ جۇمىس ىستەمەيتىنىن كورسەتتى.
مۇنداي ءىستىڭ زاردابى اتىراۋ مۇناي وڭدەۋ زاۋىتىنىڭ جۇمىسشىلارىنا ايتارلىقتاي اسەر ەتىپ، ولار مورالدىق تۇرعىدان اۋىر سوققىعا جىعىلادى. ال مۇنداي كاسىپورىنداردا كەز كەلگەن بىلىق ۇجىمدىق تۇردە جاسالادى. وسى تۇستا زاۋىتتىڭ مۇددەسىن قورعاۋ بويىنشا دانباي مەن سەيدۋالييەۆكە ءبىرقاتار قىزمەتكەر كومەكتەسكەن بولىپ شىقتى.
بۇل قاتاردا 2022-2024 جىلدارى اتىراۋ مۇناي وڭدەۋ زاۋىتىنىڭ باس ديرەكتورى قىزمەتىن اتقارعان مۇرات دوسمۇراتوۆ تا بار.
قازاقستان رەسپۋبليكاسىنىڭ قارجى مونيتورينگى اگەنتتىگى "اتىراۋ مۇناي وڭدەۋ زاۋىتى" ج ش س باسشىلىعىنا قاتىستى مەملەكەتكە اسا ءىرى كولەمدە زالال كەلتىرۋ تۇرىندەگى اۋىر زارداپتارعا اكەپ سوققان لاۋازىمدىق وكىلەتتىكتەرىن اسىرا پايدالانعانى ءۇشىن سوتقا دەيىنگى تەرگەۋ امالدارىن جۇرگىزۋدە. دوسمۇراتوۆتىڭ جانە باسقا دا زاۋىت قىزمەتكەرلەرىنىڭ ءىسىن سوت انىقتايدى.
"ا.ز." جوعارىدا اتالعان ۇندەۋگە قول قويعان كەيبىر قىزمەتكەرگە وسى حاتقا تۇسىنىكتەمە بەرۋدى وتىنگەن. الايدا ولار زاۋىتتا جۇمىستى جالعاستىرعىسى كەلەتىندەرىن جانە قىسىمعا ۇشىراۋدان قورقاتىندارىن العا تارتىپ، تۇسىنىكتەمە بەرۋدەن باس تارتادى.
ەسكە سالايىق،كۇنى كەشە اتىراۋ مۇناي وڭدەۋ زاۋىتىنىڭ بۇرىنعى باس ديرەكتورى مۇرات دوسمۇراتوۆ ءۇيقاماققا الىنعانى حابارلانعان بولاتىن. بۇل تۋرالى "اج" باسىلىمىنا دەرەككوز مالىمدەگەن.
بۇعان دەيىن ب ا ق مۇرات دوسمۇراتوۆتىڭ قىزمەتتىك وكىلەتىن اسىرا پايدالانعانى ءۇشىن 72 ساعاتقا قاماۋعا الىنعانىن حابارلاعان بولاتىن. شەنەۋنىكتىڭ ۇستالۋىنا باس ديرەكتور عالىمجان جۋسانبايەۆ پەن ونىڭ ورىنباسارى، باس ينجەنەر ادىلەت شوشانباسوۆ تاياۋدا قىزمەتىنەن بوساتىلعان اتىراۋ مۇناي وڭدەۋ زاۋىتىنداعى سوڭعى وقيعالارعا قاتىسى جوق ەكەنى اتاپ وتىلگەن.
وسىعان قاتىستى قازاقستان رەسپۋبليكاسى قارجى مونيتورينگى اگەنتتىگى قىلمىستىق ءىس بويىنشا تەرگەۋ جۇرگىزىلىپ جاتقانى تۋرالى مالىمدەمە جاساعان ەدى.
"اتىراۋ مۇناي وڭدەۋ زاۋىتى" ج ش س باسشىلىعىنا قاتىستى مەملەكەتكە اسا ءىرى كولەمدە زالال كەلتىرۋ تۇرىندەگى اۋىر زارداپتارعا اكەپ سوققان لاۋازىمدىق وكىلەتتىكتەرىن تەرىس پايدالانعانى ءۇشىن سوتقا دەيىنگى تەرگەپ-تەكسەرۋدى وڭىرلىك پروكۋراتۋرانىڭ ۇيلەستىرۋىمەن اتىراۋ وبلىسى بويىنشا قما دەپارتامەنتى باستادى"، - دەلىنگەن بولاتىن حابارلامادا.
