بۇل تۋرالى ق ر باس پروكۋراتۋرانىڭ باسپا ءسوز قىزمەتى حابارلاپ، ارنايى ۆيدەو تاراتتى.
“ق ر باس پروكۋراتۋراسى “قازاقستاننىڭ دەموكراتيالىق تاڭداۋى” اتتى تىركەلمەگەن قوزعالىستىڭ زاڭسىز قىزمەتىن انىقتادى.
ونى قازاقستاندا 20 جىلعا باس بوستاندىعىنان ايىرۋ تۋرالى ۇكىم شىققان مۇحتار ءابليازوۆ قۇرعان.
ءابليازوۆ سوتپەن قىلمىستىق قوعامداستىقتى قۇرعانى، 7،5 ملرد اقش دوللارىن ۇرلاپ، شەتەلگە شىعارعانى ءۇشىن كىنالى بولىپ تانىلعان. قىلمىستىق تابىستاردى زاڭداستىرۋ فاكتىلەرى بويىنشا ءبىرقاتار ەۋروپالىق ەلدەردە ءابليازوۆقا قاتىستى تەرگەۋ جۇرگىزىلۋدە. ۇلىبريتانيادا لوندون قالاسىنىڭ جوعارعى سوتىنىڭ شەشىمىمەن ءابليازوۆ پەن ونىڭ سىبايلاستارىنان 4 ملرد اقش دوللارى وندىرىلگەن”، — دەدى ق ر باس پروكۋراتۋرانىڭ رەسمي وكىلى وكسانا لوسكۋتوۆا.
ونىڭ ايتۋىنشا، ەكس-بانكيردىڭ اشقان ۇيىمىنىڭ ارەكەتتەرى ساياسي ەكسترەميزم رەتىندە تانىلىپ، ەلدىڭ قاۋىپسىزدىگىنە قارسى ارەكەت بولىپ سانالادى. ول ينتەرەنەت جەلىلەر، مەسەندجەرلەر، سونداي-اق ءارتۇرلى الەۋمەتتىك توپتارعا پاراقشالار تاراتۋ ارقىلى قازاقستان ازاماتتارىن قوزعالىسقا قوسىلۋعا شاقىرادى.
سونىمەن قوسا، قازىرگى بيلىكتىڭ جاعىمسىز بەينەسىن قۇراستىرادى.
“وسىلايشا، جوسپارلى تۇردە الەۋمەتتىك ارازدىق پەن الاۋىزدىقتى قوزدىرۋدا. نارازىلىق اكسيالاردىڭ بەيبىتشىلىگى تۋرالى ايتسا دا، قوزعالىس باسشىسى مۇحتار ءابليازوۆ پەن ونىڭ بەلسەندىلەرىنىڭ قىلمىستىق ماقساتى — بيلىكتى قۇلاتىپ، باسىپ الۋ بولىپ تابىلادى. بۇل ارەكەتتەر «ەكسترەميزمگە قارسى ءىس-قيمىل تۋرالى» زاڭ بويىنشا ساياسي ەكسترەميزم بولىپ سانالادى جانە مەملەكەتتىڭ قاۋىپسىزدىگىنە قارسى قىلمىس رەتىندە قۋدالانادى”، — دەلىنگەن باس پروكۋراتۋرانىڭ مالىمدەمەسىندە.
وسىعان بايلانىستى باس پروكۋراتۋرا “پروكۋراتۋرا تۋرالى” زاڭدا كوزدەلگەن وكىلەتتىكتەرىن ىسكە اسىرىپ، سوتقا قوزعالىستى ەكسترەميستىك ۇيىم دەپ تانۋ تۋرالى ارىزبەن جۇگىنگەن.
“2018 جىلعى 13-ناۋرىزدا استانا قالاسىنىڭ ەسىل اۋداندىق سوتىنىڭ شەشىمىمەن اتالعان ارىز تولىق كولەمدە قاناعاتتاندىرىلدى.
سوتپەن قوزعالىستىڭ ارەكەتى ەكسترەميستىك دەپ تانىلىپ، وعان قازاقستان رەسپۋبليكاسىنىڭ بارلىق اۋماعىندا تىيىم سالىندى. سونىمەن قاتار، بۇل ۇيىمنىڭ ارەكەتىن اقپاراتتىق ماتەريالدار، بۇقارالىق اقپارات قۇرالدارى، تەلەكوممۋنيكاسيا، الەۋمەتتىك جەلىلەرى، مەسسەندجەرلەر جانە بەينە-حوستينگتەر ارقىلى تاراتۋعا تىيىم سالىندى.
بۇدان باسقا، الەۋمەتتىك الاۋىزدىقتى قوزدىرۋ، بيلىكتى باسىپ الۋدى ناسيحاتتاۋ جانە وعان جاريا تۇردە شاقىرۋ فاكتىلەرى بويىنشا ۇلتتىق قاۋىپسىزدىك جانە ىشكى ىستەر ورگاندارىمەن سوتقا دەيىنگى تەرگەپ-تەكسەرۋلەر جۇرگىزىلۋدە”، — دەدى لوسكۋتوۆا.
قۇرمەتتى ازاماتتار، باس پروكۋراتۋرا سوت شەشىمىنەن كەيىن “قازاقستاننىڭ دەموكراتيالىق تاڭداۋى” ەكسترەميستىك ۇيىمىنىڭ ارەكەتىنە كەز كەلگەن قاتىسقانى جانە قارجىلاندىرعانى ءۇشىن قىلمىستىق كودەكستىڭ 182، 258 جانە 405-باپتارىنا سايكەس قىلمىستىق جاۋاپكەرشىلىك كوزدەلگەنىن تۇسىندىرەدى. “قاتىسۋ” ارەكەتىنە قوزعالىستىڭ يدەياسىن ۇگىتتەۋ جانە ناسيحاتتاۋ، ونىڭ جاريالانىمدارىن، پاراقشالارىن، پوستتارىن، پىكىرلەرىن جانە باسقا دا اقپاراتتىق ماتەريالدارىن دايىنداۋ، شىعارۋ، كوبەيتۋ جانە تاراتۋ جاتادى. سونىمەن قاتار، “قاتىسۋ” بولىپ قوزعالىستى جانە ونىڭ باسشىسى ءابليازوۆتى قولداۋدا ميتينگىلەردى، شەرۋلەردى، جاريا اكسيالارىن جانە باسقا جاپپاي ءىس-شارالاردى ۇيىمداستىرۋ جانە وتكىزۋ سانالادى.
“قارجىلاندىرۋ” ۇعىمىنا ءابىليازوۆ پەن قوزعالىسقا اقشانى، وزگە دە مۇلىكتى بەرۋ نەمەسە جيناۋ، سىيعا تارتۋ، ايىرباستاۋ، قايىرمالدىق جاساۋ، سپونسورلىق جانە قايىرىمدىلىق كومەك، اقپاراتتىق جانە وزگە دە قىزمەت تۇرلەرىن كورسەتۋ جاتادى. سونىمەن قاتار، ىستەگى زاڭناماعا سايكەس، ەكسترەميستىك توپتىڭ ارەكەتىنە قاتىسۋدى ءوز ەركىمەن توقتاتقان ادام قىلمىستىق جاۋاپتان بوساتىلادى”، — دەلىنگەن مالىمدەمەدە.
https://youtu.be/tRjfr6lMwF8
