«وزگەرىستەردىڭ سارۋارلارى» جوباسىنىڭ ءبىرىنشى جىلىنىڭ قورىتىندىسى بويىنشا 120 جوبانىڭ ىشىنەن 20 ۇزدىك الەۋمەتتىك باستاما ىرىكتەلدى. اكسەلەراسيا بارىسىندا جوبالار ءوز تاجىريبەلەرىن ايماقتارعا كەڭەيتۋ ءۇشىن ساراپتامالىق قولداۋ الدى.
سولاردىڭ ءبىرى – «وتباسىلىق اۋلا كلۋبى». «زامانداس 21» قوعامدىق قورى جۇزەگە اسىراتىن بۇل جوبانىڭ ارقاسىندا وتباسىن قولداۋ، بالالار مەن اتا-انالاردى تارتۋ ارقىلى بالالاردىڭ بوس ۋاقىتىن ءتيىمدى وتكىزۋگە بايلانىستى كەشەندى جۇمىستار جۇرگىزىلگەن.
قور جەتەكشىلەرىنىڭ ايتۋىنشا، مۇنداي جوبا بۇگىندە ەلىمىزدە بىرەۋ-اق. ياعني، شىعارماشىلىق، تەحنيكالىق ۇيىرمەلەردە، سپورت سەكسيالارىندا جانە تىلدىك كۋرستار ءار بالاعا قولجەتىمدى. سونداي-اق، قوردا اتا-انالارعا ارنالعان «باقىتتى وتباسى» كلۋبى، بالالارعا ارنالعان «جاس كوشباسشى» پسيحولوگيالىق-تۇزەتۋ توبى جانە جاسوسپىرىمدەرگە ارنالعان كلۋبتار بار.
«زامانداس 21» قوعامدىق قورىنىڭ جەتەكشىسى ءلاززات الشىنوۆانىڭ ايتۋىنشا، الەۋمەتتىك جوبالار اكسەلەراسياسى ولارعا جوبا مودەلىن ودان ءارى جاقسارتۋعا مۇمكىندىك بەرگەن.
– ءبىز ماسشتابتاۋ جاعدايىندا جوبانى كەزەڭ-كەزەڭىمەن ەنگىزۋ الگوريتمىن ەگجەي-تەگجەيلى پىسىقتادىق. اسىرەسە كوماندانى وقىتۋ پايدالى بولدى. بولاشاقتاعى جوسپارلارىمىز وزگەرگەن جوق. ياعني، رەسپۋبليكا كولەمىندە دامىپ، وڭىرلەرگە شىعۋدى كوزدەيمىز، – دەپ اتاپ ءوتتى ءلاززات الشىنوۆا.
ازىرگە جوبا نۇر-سۇلتاندا عانا جۇزەگە اسىرىلىپ وتىر. ءبىراق كەلەسى جىلى قوسىمشا ەكى كلۋب اشۋ جوسپارلانۋدا. رەسپۋبليكا بويىنشا جەتى وتباسىلىق اۋلا كلۋبى جۇمىس ىستەيتىن بولادى. بۇل تۇرعىدا اتىراۋ، الماتى جانە قاراعاندى قالالارىندا قىزىعۋشىلىق تانىتقان.
اكسەلەراسيا باعدارلاماسىنىڭ تاعى ءبىر جوباسى – «سالاماتتى بولاشاق». جوبانى «Samruk-Kazyna Trust» الەۋمەتتىك جوبالاردى دامىتۋ قورىنىڭ اياسىنداعى «تەڭ مۇمكىندىكتەر الەمى» قوعامدىق قورى بجۇزەگە اسىرىپ وتىر.
ولار دەنە شىنىقتىرۋ جانە سپورت ارقىلى مۇگەدەك بالالاردى الەۋمەتتىك وڭالتۋمەن اينالىسادى. وسى ورايدا 2016 جىلدان باستاپ نۇر-سۇلتان قالاسىندا ينكليۋزيۆتى جانە بەيىمدەلەتىن الەۋمەتتىك سەكسيالار جەلىسى ۇيىمداستىرىلدى. جوبانىڭ ارقاسىندا 2020 جىلى ەلىمىزدىڭ 9 قالاسىندا 560 بالا سپورتتىڭ 10 ءتۇرى بويىنشا جىل بويى جاتتىعۋلار وتكىزدى.
«تەڭ مۇمكىندىكتەر الەمى» قورىنىڭ ديرەكتورى نۇرگۇل ۇلجەكوۆانىڭ سوزىنە سۇيەنسەك، اكسەلەراسيا باعدارلاماسىنان ءوتۋ ناتيجەسىندە جوبا كومانداسى فاندرايزينگ، الەۋمەتتىك جەلىلەر ءۇشىن كونتەنت-جوسپار قۇرۋ، الەۋمەتتىك كاسىپكەرلىك، جوبالىق مەنەدجمەنت، تۇراقتىلىقتى قامتاماسىز ەتۋ، كومپانيانىڭ بەدەلىن باسقارۋ جانە باق-پەن جۇمىس ماسەلەلەرى بويىنشا بىلىمدەرىن جەتىلدىرگەن ەكەن.
– جوبانى ايماقتارعا كەڭەيتۋ ءۇشىن بىزگە قۇقىقتىق ماسەلەلەر بويىنشا ساراپشىلاردىڭ كەڭەسى قاجەت بولدى. ويتكەنى، رەسپۋبليكالىق ماسشتابقا ءوتۋ ءۇشىن ءبىز قوعامدىق بىرلەستىكتى قوعامدىق قور رەتىندە قايتا قۇرۋىمىز قاجەت. سونداي-اق، اكسەلەراسيا بارىسىندا جوبانى باسقارۋ، CRM جۇيەسىن ەنگىزۋ جانە فرانچايزينگ ماسەلەلەرى بويىنشا دا بىلىمدەرىمىزدى كەڭەيتتىك، – دەدى ءوز كەزەگىندە ۇلجەكوۆا.
كەلەسى جىلى اقتاۋ قالاسىندا مۇگەدەك بالالارعا ارنالعان سپورت سەكسيالارى اشىلادى جانە CRM جۇيەسىن ازىرلەۋدىڭ ارقاسىندا «رۋحاني جاڭعىرۋ» قازاقستاندىق قوعامدىق دامۋ ينستيتۋتىمەن بىرلەسىپ جوبانى باسقارۋ ءۇشىن يننوۆاسيالىق تەحنولوگيالار ەنگىزىلەدى دەپ جوسپارلانۋدا.
انىقتاما: جىل باسىندا «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ بازاسىندا «وزگەرىستىڭ سارۋارلارى» الەۋمەتتىك جوبالاردى قولداۋ باعدارلاماسى قولعا الىنىپ، وعان قاتىسۋ ءۇشىن ارنايى كونكۋرس وتكىزىلدى. وعان 120 جوبادان ءوتىنىش ءتۇستى. ولاردىڭ 46-سى ءۇش ايلىق قىسقا مەرزىمدى اكسەلەراسيادان ءوتىپ، 39-ى سەرتيفيكاتتارعا يە بولدى. سونىڭ ىشىندە 20 جوبا وڭىرلەرگە ماسشتابتالۋعا ىرىكتەلىپ، اكسەلەراسيانىڭ تولىق باعدارلاماسىنان ءوتتى. ايتا كەتەيىك، 20 جوبانىڭ بەسەۋى ءبىلىم بەرۋ، 5ء-ى مادەنيەت، 8 جوبا ينكليۋزيا جانە ەكەۋى ەكولوگيا باعىتىنداعى جوبا.
