كۆي بويىنشا ەپيدەميولوگيالىق احۋال سوڭعى اپتادا ايتارلىقتاي ناشارلادى. 23 شىلدەدەن باستاپ كۆي-دى كۇندەلىكتى تىركەۋ 1مىڭ جاعدايدان استى. ەگەر 23 شىلدەدە 1 080 جاعداي تىركەلسە، 27 شىلدەدە تىركەلگەنى – 1 250. جىل باسىنان بەرى كۆي جاعدايلارىنىڭ جالپى سانى 75153 بولسا، ال شىلدەنىڭ باسىنان بەرى 16911 جاعدايعا جەتتى.
اپتا ىشىندە ناۋقاستار سانى 1،2 ەسەگە ءوستى – 5483 جاعدايدان 6818-گە دەيىن، تاۋلىكتىك ءوسىم 1،3%-دى قۇرادى. سيمپتومدى ناۋقاستاردىڭ ۇلەس سالماعى باياۋلاپ، 90% دەڭگەيىندە قالدى. وسىلايشا، شىلدەدە بازالىق سەناريي بويىنشا بولجانعان 27،5 مىڭ جاعداي تىركەلىپ ەپيدەميولوگيالىق جاعداي راستالدى.
الماتى قالاسىنىڭ تۇرعىندارىن ۆاكسينالاۋمەن قامتۋ 27 شىلدەدەگى جاعداي بويىنشا I كومپونەنتتى العاندار 49،9%، II كومپونەنتتى العاندار – حالىقتىڭ رەسمي سانى بويىنشا 33،6%-دى قۇرادى. الايدا، بۇل COVID-19 «دەلتا» نۇسقاسىنان تۋىنداعان ەپيدەميانىڭ كەزەكتى تولقىنىن تۇراقتاندىرۋ ءۇشىن ءالى دە جەتكىلىكسىز.
سونىمەن قاتار، سوڭعى 2 اپتاداعى جاس قۇرامىنى تالداۋ مىنانى كورسەتەدى، 1 جاسقا دەيىنگى بالالار دەرتىنىڭ ءوسۋى جالعاسۋدا – 0،3%، 2،8% قۇرايدى. وتكەن اپتادا 135 بالا دەرتكە شالدىقسا ءقازىر ولاردىڭ سانى – 178 بالاعا ارتتى. كۆي دەرتى 20-دان 40 جاسقا دەيىنگى ازاماتتار اراسىندا – 38%، 40-59 جاستا – 25% جانە 60 جاستان اسقان ادامداردا – 20%-عا باسىم.
وسىعان وراي، باقىتجان ساعىنتايەۆ الماتىلىقتار مەن قالا قوناقتارىن كۆي-گە قارسى ەكپە الىپ، ساقتىق پەن جاۋاپكەرشىلىك تانىتۋعا شاقىردى. تەك ەكپە الۋ ارقىلى عانا ءومىرىمىز بەن دەنساۋلىعىمىزدى ساقتاي الامىز. ەڭ باستىسى، ۆاكسينالانعان قالالىقتار وزدەرىنىڭ جاقىندارى مەن اينالاسىنداعىلاردىڭ – دوستارىنىڭ، ارىپتەستەرى مەن تانىستارىنىڭ قاۋىپسىزدىگىن قامتاماسىز ەتەدى.
