"قازاقتەلەكوم" اق باسقارما ءتوراعاسى قىزىلوردا وبلىسىنا جۇمىس ساپارىمەن باردى. ساپار بارىسىندا نەگىزگى ينفراقۇرىلىمدىق جوبالاردىڭ ىسكە اسىرىلۋ ناتيجەلەرى تالقىلاندى. جاساندى ينتەللەكت (جي) نەگىزىندەگى يننوۆاسيالىق شەشىمدەر تانىستىرىلىپ، قىزمەتكەرلەردىڭ جۇمىس جاعدايىن جاقسارتۋعا ارنالعان وندىرىستىك ينفراقۇرىلىم نىسانى اشىلدى، دەپ حابارلايدى Dalanews.kz.
ينفراقۇرىلىمنىڭ ىرگەتاسى مەن جوبالاردى تانىستىرۋ
جۇمىس ساپارى بارىسىندا كومپانيا ءتوراعاسى وبلىس اكىمى نۇرلىبەك نالىبايەۆپەن كەزدەستى. مۇندا تاراپتار ساندىق ينفراقۇرىلىمدى دامىتۋ جانە ايماقتاعى تۇرعىنداردىڭ ءومىر ساپاسى مەن كاسىپ جاعدايىنا اسەر ەتىپ وتىرعان جوبالار تالقىلاندى.
باستى نازار مەملەكەت باسشىسىنىڭ اۋىلدىق ەلدى مەكەندەردى ساپالى ينتەرنەتپەن قامتاماسىز ەتۋ جونىندەگى تاپسىرماسىن ورىنداۋعا اۋدارىلدى. "قازاقتەلەكوم" قىزىلوردا وبلىسىندا 737 شاقىرىمنان استام تالشىقتى-وپتيكالىق جەلىلەرىن تارتقان. قازىرگى تاڭدا كومپانيانىڭ وڭىردەگى ۇلەسى 73%-عا جەتىپ، 63 مىڭنان استام ءۇي شارۋاشىلىعىنا جانە 3 مىڭنان استام بيزنەس پەن مەملەكەتتىك ۇيىمدارعا جوعارى جىلدامدىقتى ينتەرنەت قىزمەتىن ۇسىنا الادى. 70-تەن استام اۋىل اراسىندا جوبا 26 ەلدى-مەكەندە ىسكە اسىرىلعان. ال 2026 جىلى تاعى 18 اۋىل ايماقتا ينفراقۇرىلىم قۇرىلماق.
"سيفرلاندىرۋ سەنىمدى ينفراقۇرىلىمنان باستالادى. "اۋىلعا ينتەرنەت" جوباسى – ءبىزدىڭ باستى باسىمدىق. ول ساندىق تەڭسىزدىكتەردى ازايتۋعا باعىتتالعان. ءبىز شالعايداعى مەكتەپتەردى، اۋرۋحانالاردى جانە شاعىن كاسىپورىنداردى ينتەرنەتكە قوسىپ، وڭىرلىك ەكونوميكانىڭ دامۋىنا نەگىز جاسايمىز"، – دەدى كومپانيانىڭ باسقارما ءتوراعاسى.
يننوۆاسيالار: AI MEKTEP پەن Smart City
تەحنولوگياداعى جەتىستىكتەردى تانىستىرۋ كەزىندە AI MEKTEP جوباسىنىڭ مۇمكىندىكتەرى دە كورسەتىلدى. بۇل جۇيە ماشينالىق كورۋ الگوريتمدەرى مەن جاساندى ينتەللەكتىنى قولدانا وتىرىپ، وڭىردەگى مەكتەپتەردە قاۋىپسىزدىكتى قامتاماسىز ەتۋ جانە وقۋ پروسەسىن باقىلاۋ ءۇشىن ەنگىزىلۋدە. جاساندى ينتەللەكت وقۋشىلاردىڭ بەلسەندىلىگىن تالداپ، ءتارتىپ پەن ساباققا قاتىسۋىن قاداعالايدى. سونداي-اق قاۋىپسىزدىك داچيكتەرىمەن (ءتۇتىن، شۋ دەتەكتورلارى جانە دابىل تۇيمەلەرى سياقتى) بىرىكتىرىلەدى.
ءبىلىم بەرۋ سالاسىنان بولەك، "قازاقتەلەكوم" تەحنولوگيالارى اگروونەركاسىپتىك كەشەندە جانە لوگيستيكادا (جاساندى ينتەللەكت ارقىلى قويما قورلارىن باقىلاۋ) بەلسەندى قولدانىستا. بۇل ءوڭىردىڭ سيفرلىق ترانسفورماسياسىنا ۇلەس قوسادى.
سونىمەن قاتار بيىل جانە كەلەسى جىلدىڭ باسىندا وڭىردە 20 مىڭنان استام ءۇيدى ينتەرنەتكە قوسۋ جوسپارلانعان.
"اۋدان اكىمىنە كونسترۋكتيۆتى ديالوگ پەن سيفرلىق باستامالاردى قولداعانى ءۇشىن العىس ايتامىن. بىرلەسكەن جۇمىس ءوڭىردى دامىتۋدى جەدەلدەتىپ، زاماناۋي تەحنولوگيالاردى ءاربىر تۇرعىنعا قولجەتىمدى ەتەدى دەپ سەنەمىن"، – دەدى باعدات مۋسين.
ادامدارعا قامقورلىق: جۇمىس جاعدايلارىنىڭ جاڭا ستاندارتتارى
باعدارلامانىڭ ماڭىزدى بولىگى قىزىلوردا وبلىستىق تەلەكوممۋنيكاسيالار باسقارماسىنا جۇمىس ساپارى بولدى. وندا تولىق جاڭارتىلعان تەحنيكالىق قىزمەت (مونتەرسكوي) بولمەسى اشىلدى. جاڭا بولمە زاماناۋي تالاپتارعا ساي جوبالانعان:
اۋىسىمدا جۇمىس ىستەيتىندەر ءۇشىن ىڭعايلى دەمالىس ايماقتار؛
زاماناۋي دۋش جانە دارەتحانالار؛
تەحنيكالىق قۇجاتتاردى دايىنداۋعا ارنالعان ەرگونوميكالىق جۇمىس ورىندارى بار.
"ءبىز ساندىق جۇيەلەردىڭ ادامدارعا – كاسىبي ماماندارعا تاۋەلدى ەكەنىن تۇسىنەمىز. قىزمەتكەرلەرىمىز قانداي اۋا رايى بولماسىن، قيىن جاعدايلاردا دا ازاماتتارىمىزدى ۇزدىكسىز بايلانىسپەن قامتاماسىز ەتىپ ءجۇر. مونتەرلەرگە جايلى جانە لايىقتى جۇمىس جاعدايىن جاساۋ – جاي جوندەۋ وتكىزۋ ەمەس، ولاردىڭ ەڭبەگىنە قۇرمەت كورسەتۋ"، – دەپ اتاپ ءوتتى باسقارما ءتوراعاسى فيليال قىزمەتكەرلەرىمەن كەزدەسۋدە.
ساپار بارىسىندا باعدات مۋسين بىرنەشە وندىرىستىك نىساندى ارالادى. اتاپ ايتقاندا، بايلانىس باعانالارىن اۋىستىراتىن ۋچاسكەلەرگە باردى. سونداي-اق ول ابونەنتتەردى مىس سىم ينفراقۇرىلىمىنان وپتيكالىق تالشىقتى جەلىلەرگە اۋىستىرۋ پروسەسىمەن تانىستى. بۇل بويىنشا شامامەن 20 مىڭ قوسىلىم جوسپارلانعان.
سونىمەن قاتار ينفراقۇرىلىمدى جاڭارتۋ مەن ەنەرگيانى ءتيىمدى پايدالانۋ بويىنشا تەحنيكالىق شەشىمدەر قارالدى. تەكسەرۋ كەزىندە وڭىرلىك دەرەكتەردى وڭدەۋ ورتالىعىن جاساۋ جانە بار قۋاتتى كەڭەيتۋ مۇمكىندىگى انىقتالدى. بۇل ورتالىق 50 سەرۆەرلىك تىرەۋىشكە دەيىن جۇمىس ىستەي الادى، جالپى قۋاتى 1 مۆت.
ايماقتىڭ بولاشاعى
ساپاردى قورىتىندىلاي كەلە، كىزىلوردا وبلىسى سيفرلىق وزگەرىستەرگە تەز بەيىمدەلىپ كەلە جاتقانى اتاپ ءوتىلدى. "قازاقتەلەكوم" كومپانياسى ساپالى قىزمەت كورسەتۋ مەن قىزمەتكەرلەردى قولداۋعا باسىمدىق بەرە وتىرىپ، Smart City جوبالارىن كەڭەيتۋدى جانە 5G جەلىسىن دامىتۋ جۇمىستارىن جالعاستىرا بەرەدى.
