استانادا وتكەن وقو كۇندەرى اياسىندا ەكسپو-2017 كورمەسىنە كەلۋشىلەردىڭ سانى رەكوردتىق دەڭگەيگە جەتكەنى بەلگىلى بولدى.



ەلودارادا 29 ءساۋىر مەن 3 قىركۇيەك ارالىعىندا وڭتۇستىك قازاقستان وبلىسىنىڭ كۇندەرى اياسىندا حالىقارالىق ەكسپو-2017 مامانداندىرىلعان كورمەسىنە كەلۋشىلەر سانى رەككوردتىق دەڭگەيگە جەتكەنىن كورمەنى ۇيىمداستىرۋشىلار مالىمدەدى. وسى كۇندەرى كورمەنى تاماشالاۋعا 398 341 ادام كەلگەن. ورتا ەسەپپەن العاندا كۇنىنە 56 905 ادام كەلگەنىن بايقايمىز. ناقتىراق ايتساق، كورمەنى تاماشالاۋشىلاردىڭ رەكوردتىق سانى 3 قىركۇيەك كۇنى تىركەلگەن. بۇل كۇنى كورمەگە 75 مىڭنان استام كەلىپتى.

ءدال وسى كۇنى ەكسپو-2017 حالىقارالىق مامانداندىرىلعان كورمەسىنىڭ امفيتەاترىندا وڭتۇستىك قازاقستان وبلىسىنان شىققان ەسترادا جۇلدىزدارىنىڭ "ءان مەن كۇي الديلەيدى استاناانى" اتتى گالا-كونسەرتى وتكەن بولاتىن.

«ەكسپو-2017» حالىقارالىق مامانداندىرىلعان كورمەسىنە ارنالعان وڭتۇستىك قازاقستان وبلىسىنىڭ مادەنيەت كۇندەرى اياسىندا وتكەن گالا-كونسەرتكە قايرات نۇرتاس، جۇبانىش جەكسەن ۇلى، التىناي جورابايەۆا، نۇرلان ونەربايەۆ، زاتتىبەك كوپبوسىن ۇلى، مارجان اراپبايەۆا، يبراگيم ەسكەندىر، ا.جايلاۋبايەۆا سىندى ەلىمىزگە تانىمال ەسترادا جۇلدىزدارى ونەر كورسەتىپ، جينالعان جۇرتتىڭ قۇلاق قۇرىشىن قاندىرعان بولاتىن.

ايتا كەتەيىك، استاناداعى وڭتۇستىك قازاقستان وبلىسنىڭ كۇندەرى اياسىندا ءبىرقاتار اۋقىمدى ءىس-شارالار ۇيىمداستىرىلعانى بەلگىلى. ولاردىڭ اراسىندا بيزنەس-فورۋم، تاۋار وندىرۋشىلەر مەن اۋىلشارۋاشىلىعى جارمەڭكەسى دە بار. وڭتۇستىك حالقى استانا تۇرعىندارىنا مۇنىمەن قوسا، قايتالانباس كونسەرتتىك باعدارلامالارىمەن، ۇلتتىق ات سپورت ويىندارى جارىسىمەن قۋانىتتى. سونىمەن قاتار قالا تۇرعىندارى مەن قوناقتارىنا قۇربان ايتتا داستارحان جايىپ، 300 كەلى پالاۋ ءپىسىرىپ، تاراتتى. ديقاندارى 40 توننا قاۋىن-قاربىز اكەلىپ، الەۋمەتتىك جاعدايى تومەن وتباسىلار مەن بالالار ۇيىنە تەگىن تاراتىپ بەرگەنىن ايتا كەتۋىمىز كەرەك.

جالپى، ەكسپو-2017 كورمەسى اشىلعالى بەرى 10 ماۋسىمنەن 3 قىركۇيەككە دەيىن استاناعا كەلىپ، كورمەنى تاماشالاۋشىلار سانى  3 ميلليون 525 مىڭ 300 ادامعا جەتكەن.

نۇرلان اۋباكىر

"قمد" اقپارات