مەملەكەت باسشىسى قاسىم-جومارت توقايەۆ 2022 جىلعى 1 قىركۇيەكتەگى قازاقستان حالقىنا جولداۋىندا شاعىن جانە ورتا بيزنەستى نەسيەلەندىرۋگە قاتىستى ءبىرقاتار تاپسىرما بەرگەن بولاتىن. ونىڭ ىشىندە جىلدىق 2،5 پايىزبەن جەڭىلدەتىلگەن شاعىن نەسيەلەۋ تەتىگىنىڭ ارقاسىندا جاستارعا ستارتاپ اشۋ مۇمكىندىگى قولجەتىمدى.
ەلوردا جاستارى كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسى اياسىندا جەڭىلدەتىلگەن نەسيە بەرىلۋدە.
– شاعىن نەسيەلەر اگرونەسيەلىك كورپوراسيا ارقىلى جۇزەگە اسۋدا. شاعىن نەسيەنى 21 مەن 35 جاس ارالىعىنداعى جاس كاسىپكەرلەر الا الادى. نەسيە شاعىن كاسىپكەرلىكپەن اينالىسقىسى كەلگەن جاستارعا كونكۋرستىق نەگىزدە بەرىلەدى. جەڭىلدەتىلگەن نەسيەنىڭ شارتتارى جاستار ءۇشىن قولايلى. ايتالىق، نەسيەنىڭ نومينالدى جىلدىق سىياقى مولشەرلەمەسى 2،5%-دى قۇراسا، نەسيەنىڭ ماكسيمالدى سوماسى – 5 ملن تەڭگە (كەپىلدىكپەن). مەرزىمى – 5 جىل. مال شارۋاشىلىعى ءۇشىن – 7 جىلعا دەيىن بەرىلەدى، – دەدى ەرلان ءجۇسىپوۆ.
ءوتىنىش بەرگەن كەزدە جەكە كاسىپكەر رەتىندە تىركەلۋ مەرزىمى بەس جىلدان اسپاۋى كەرەك. سونىمەن قاتار، ميكروكرەديت بەرۋ مەرزىمىنىڭ ۇشتەن ءبىر بولىگى ءۇشىن نەگىزگى بورىشتى وتەۋ جانە سىياقى تولەۋ بويىنشا جەڭىلدىك كەزەڭى قاراستىرىلعان.
مىندەتتى شارت – كەپىلزاتتىڭ بولۋى. كەپىل رەتىندە جىلجىمالى دا، جىلجىمايتىن مۇلىك تە قابىلدانادى. ولار بولماعان جاعدايدا كەپىل بەرۋشىنى تارتۋ كوزدەلەدى – اتا-انالارى، تۋىستارى جانە باسقا دا سەنىمدى ادامدار بولۋى مۇمكىن.
جاستارعا شاعىن نەسيە بەرۋ تۋرالى شەشىمدى بيزنەس جوبالاردى ىرىكتەۋ جونىندەگى كونكۋرستىق كوميسسيا قابىلدايدى. ونىڭ قۇرامىنا جەرگىلىكتى اتقارۋشى ورگانداردىڭ، «اتامەكەن» كاسىپكەرلەر پالاتاسىنىڭ، قوعامدىق بىرلەستىكتەردىڭ، ءتۇرلى بيزنەس سالالارىنىڭ، سونداي-اق وقۋ ورىندارى مەن ب ا ق وكىلدەرى كىرەدى.
وتىنىمدەردى قابىلداۋ وسى جىلدىڭ 6 ناۋرىزىندا اگرارلىق-نەسيەلىك كورپوراسياسىنىڭ استانا قالاسى بويىنشا فيليالىندا مىنا مەكەنجاي بويىنشا قابىلدانادى: تۇران داڭعىلى، 19/1، «ەدەم» بيزنەس ورتالىعى. انىقتاما ءۇشىن تەلەفون +7 701 006 16 38.
ميكروكرەديت الۋ ءۇشىن ءوتىنىش بەرۋشىگە قاجەتتى قۇجاتتار ءتىزىمى:
- جەكە كۋالىك،
- بيزنەس جوسپار،
- شوتىڭىز بار ەكەنىن راستايتىن بانك انىقتاماسى.
- نەسيەلەر بولعان جاعدايدا نەسيەلىك بەرەشەگىنىڭ، ونىڭ ىشىندە مەرزىمى وتكەن بەرەشەگىنىڭ بار نەمەسە جوق ەكەندىگى تۋرالى انىقتامالار تالاپ ەتىلەدى.
- جۇمىسىڭىز بولسا، ءوتىنىش بەرۋشىنىڭ جالاقىسى مەن باسقا دا تابىسىن راستايتىن قۇجاتتى كورسەتىڭىز.
- سونداي-اق كەپىلگە بەرىلگەن مۇلىكتى باعالاۋ تۋرالى ەسەپ جانە باسقا دا قۇجاتتار بولۋى كەرەك.
– بيىل 562 ميكروكرەديتتىك قىزمەت الۋشىعا رەسپۋبليكالىق بيۋدجەتتەن 2،8 ملرد تەڭگە قاراستىرىلعان، – دەپ قوستى ەرلان ءجۇسىپوۆ.
سۇراقتارعا جاۋاپ بەرە وتىرىپ، ول كەپىلگە قويىلعان مۇلىكتىڭ استانا قالاسىنىڭ اۋماعىندا بولۋى مىندەتتى ەمەس ەكەنىن جانە ونى قازاقستان رەسپۋبليكاسىنىڭ بۇكىل اۋماعىندا تىركەۋگە بولاتىنىن اتاپ ءوتتى.
ەسكە سالا كەتەيىك، 2023 جىلدىڭ 1 قاڭتارىنان باستاپ مەملەكەت باسشىسىنىڭ تاپسىرماسىن ورىنداۋ ماقساتىندا كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسى اياسىندا جاس قازاقستاندىقتارعا جەڭىلدەتىلگەن شاعىن نەسيە بەرۋدىڭ جاڭا تەتىگى ەنگىزىلگەن بولاتىن.
قارجى رەسۋرستارى ءوز كاسىبىن اشقىسى كەلەتىن نەمەسە كاسىپكەرلىكپەن اينالىساتىن، ونىڭ ىشىندە تاۋار ءوندىرۋ نەمەسە ساتۋ، جۇمىستاردى ورىنداۋ جانە قىزمەتتەر كورسەتۋ، ءوندىرىستى جۇزەگە اسىرۋعا نيەت بىلدىرگەن 21 جاستان 35 جاسقا دەيىنگى ازاماتتارعا كونكۋرستىق نەگىزدە ۇسىنىلادى.
https://dalanews.kz/suranys/88289-alemde-ayes-salu-qaytadan-qarqyn-aldy
