استانادا الاياق ۆەتنامعا جوق اۋە بيلەتتەرىن ساتقان، دەپ حابارلايدى Dalanews.kz.

استانالىق تۇرعىننىڭ الاياقتىق ارەكەتتەرى سالدارىنان 70-تەن استام ازامات ۆەتنامعا دەمالىسقا بارا الماي قالدى. ولاردىڭ تۋريستىك جولدامالارى جويىلىپ، جابىرلەنۋشىلەر ايتارلىقتاي قارجىلىق شىعىنعا ۇشىراعان.

كىنالى تۇلعا اۋە بيلەتتەرىن نارىقتاعىدان تومەن باعامەن ۇسىنىپ، كليەنتتەرىنە ولاردى ارنايى بايلانىس ارقىلى ساتىپ الاتىنىنا سەندىرگەن. الايدا، ول شىنايى بيلەتتەردىڭ ورنىنا جالعان مارشرۋتتىق تۇبىرتەكتەردى بەرگەن. تۋريستەر اۋە بيلەتتەرگە تاپسىرىس جوق ەكەنىن ۇشار الدىندا، اۋەجايدا ءبىر-اق بىلگەن.

زارداپ شەككەندەر اراسىندا ەرەسەكتەر دە، بالالار دا بار. جالپى ماتەريالدىق شىعىن 17 ملن تەڭگەدەن استى. ادامدار تەك اقشالارىنان عانا ەمەس، كوپتەن كۇتكەن دەمالىستارىنان دا ايىرىلدى – تولەنگەن قوناقۇيلەر، ەكسكۋرسيالار جانە باسقا دا شىعىندار وتەلمەگەن.

الاياق ايەل 3 جىل 6 ايعا باس بوستاندىعىنان ايىرۋ جازاسىنا سوتتالدى.

كەلتىرىلگەن ماتەريالدىق شىعىن سوتتالعاننان ءوندىرىلدى.

استانا قالاسى نۇرا اۋدانىنىڭ پروكۋراتۋراسى تۋريستىك قىزمەتتەر الۋ ءۇشىن تولەم جاساماس بۇرىن قۇجاتتاردى مۇقيات تەكسەرۋدىڭ قاجەتتىگىن ەسكەرتەدى.