پرەزيدەنتتىڭ تاپسىرماسى بويىنشا استانا سۋ قويماسى 55 جىلدان كەيىن العاش رەت تازارتىلىپ جاتىر،- دەپ حابارلايدى Dalanews.kz سۋ رەسۋرستارى جانە يرريگاسيا مينيسترلىگىنە سىلتەمە جاساپ.
كەشەندى تازارتۋ جۇمىسىن سۋ رەسۋرستارى جانە يرريگاسيا مينيسترلىگىنىڭ قولداۋىمەن «قازسۋشاردىڭ» اقمولا وبلىسىنداعى فيليالى جۇرگىزىپ جاتىر.
سۋ قويماسىن تازارتۋعا ارنايى ەكى تەحنيكا جۇمىلدىرىلعان: ساعاتىنا 2000 تەكشە مەترگە دەيىن ءتۇرلى شوگىندىلەردەن تازارتاتىن ۇلكەن جەرسنارياد جانە قۋاتى ساعاتىنا 900 تەكشە مەترگە دەيىن جەتەتىن كوپفۋنكسيونالدى ءارى وزدىگىنەن جۇرەتىن شاعىن جەرسنارياد.
بيىل استانا سۋ قويماسىنان 50 مىڭ توننا لاي شىعارۋ جوسپارلانعان. بۇل جۇمىستار قازان ايىنىڭ سوڭىنا دەيىن جالعاسىپ، جىل سايىن 13 جىل بويى جۇرگىزىلەدى. ناتيجەسىندە استانا سۋ قويماسىنىڭ سىيىمدىلىعى 47 ملن تەكشە مەترگە ارتادى. نىسان كوبىرەك سۋ جيناپ، ەلوردا تۇرعىندارىن سۋمەن قامتاماسىز ەتۋدى جاقسارتۋعا مۇمكىندىك بەرەدى. استانا سۋ قويماسى 1970 جىلى پايدالانۋعا بەرىلگەن. بۇگىندە نىساندى تۇبىندەگى شوگىندىلەردەن تازارتۋ العاش رەت جۇرگىزىلىپ جاتىر.
«پرەزيدەنتتىڭ تاپسىرماسىن ورىنداۋ ءۇشىن ارنايى ماماندار توبى قۇرىلدى. بارلىق قىزمەتكەر ارنايى تەحنيكامەن جۇمىس ىستەۋ ءۇشىن قاجەتتى وقىتۋدان جانە دايىندىقتان ءوتتى. استانا سۋ قويماسى - ەلوردانى سۋمەن قامتاماسىز ەتۋدە ماڭىزدى ءرول اتقاراتىن ستراتەگيالىق نىسان. زاماناۋي تەحنيكانىڭ ارقاسىندا ءبىز بۇل سۋ قويماسىن جارتى عاسىردان كەيىن العاش رەت تازارتىپ، جۇمىستى جاقسى ءارى ءتيىمدى اتقارا الامىز»،– دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
