قىرعىزستاننىڭ شۋ وبلىستىق سوتى 4 قازاندا ەزٸمجان اسقاروۆتىڭ ٸسٸن قاراۋدى باستادى. سوت پروتسەسٸ جازانى ورىنداۋ مەملەكەتتٸك قىزمەتٸنٸڭ تۇتقىنداردى الىپ جٷرۋ دەپارتامەنتٸنٸڭ عياراتىندا ٶتٸپ جاتىر.
سوت زالىندا اسقاروۆ قۇراندى ۇستاپ انت بەرٸپ, ٶزٸنٸڭ ايىبى جوق ەكەنٸن ايتىپ, شىندىق دەتەكتورىنان ٶتكٸزۋدٸ سۇرادى.
ول سونىمەن بٸرگە بازار-قورعان اۋدانىندا بولعان وقيعاعا قاتىسپاعانىن ايتادى. ونىڭ سٶزدەرٸنشە, قۇقىق قورعاۋشىلاردا وقيعانى تٷسٸرگەن بەينەجازبا بار. سونى قاراپ, ٶزٸنٸڭ ول جەردە بولماعانىن تٷسٸنۋگە بولادى دەيدٸ.
سوتقا كۋەگەر رەتٸندە قاتىسقان ميليتسييا قىزمەتكەرلەرٸ بولسا ول ايتقانداي بەينەتاسپا جوق دەيدٸ.
سوت اسقاروۆتىڭ شىندىق دەتەكتورىنان ٶتكٸزۋ ۇسىنىسىن قابىلدامادى.
اسقاروۆ بازار-قورعان اۋدانىندا ادام قۇقىقىن قورعاۋ قىزمەتٸمەن اينالىستى. 2010 جىلعى ماۋسىم وقيعالارىنان سوڭ ول جاپپاي تەرتٸپسٸزدٸكتٸ ۇيىمداستىردى, ميليتسييا قىزمەتكەرٸن ٶلتٸرۋگە قاتىستى دەگەن كٷدٸكپەن ۇستالعان. سوتتىڭ بارلىق ينستانتسييالارى ونى ٶمٸرلٸك تٷرمە جازاسىنا كەستٸ.
2016 جىلى سەۋٸردە بۇۇ ادام قۇقىقتارى جٶنٸندەگٸ كوميتەتٸ قىرعىز بيلٸگٸن اسقاروۆقا تاعىلعان ايىپتاردى جويىپ, ونى بوساتۋعا شاقىردى.
