جولداۋدا كورسەتىلگەن «نۇرلى جەر» تۇرعىن ءۇي باعدارلاماسى ارىس قالاسىندا بيىل جۇزەگە اسىرىلا باستادى دەيدى قالا اكىمى مۇرات قادىربەك وڭىرلىك كوممۋنيكاسيالار قىزمەتىندە وتكەن باسپاسوز-كونفەرەنسياسىندا.

ونىڭ ايتۋىنشا، وسى باعدارلاما اياسىندا قالاداعى كوكتەم-2 تۇرعىن اۋدانىندا 3 قاباتتى 36 پاتەرلى 3 تۇرعىن ءۇيدىڭ قۇرىلىسى باستالعان. سونىمەن قاتار بيىل 3 جانە 5 كوپقاباتتى بەس تۇرعىن ءۇيدىڭ جوبالىق-سمەتالىق قۇجاتتامالارى ازىرلەنىپ جاتىر.  ال بۇگىندە ارىس قالاسىندا 1 مىڭ وتباسى تۇرعىن ۇيگە كەزەگىندە تۇرسا، تۇرعىن ءۇي سالۋ ءۇشىن جەر  تەلىمىن الۋعا 1 655 ازامات كەزەككە تىركەلگەن ەكەن.

«نۇرلى جەر» باعدارلاماسى اياسىندا ارىس قالاسىنداعى وتىرار، ناۋرىز، وڭتۇستىك تۇرعىن اۋداندارىنىڭ ينفراقۇرىلىم قۇرىلىس جۇمىستارى جۇرگىزىلۋدە. نىساندى اعىمداعى جىلدىڭ قاراشا ايىندا پايدالانۋعا بەرۋ جوسپارلانۋدا. وسىنىڭ ناتيجەسىندە 3 394 جەر تەلىمىنە ينفراقۇرىلىم تارتىلىپ،  11 182 ادام، ياعني قالا تۇرعىندارىنىڭ 15 پايىزى  ينفراقۇرىلىممەن قامتاماسىز ەتىلەتىن بولادى»،-دەدى اكىم.

سونداي-اق، قالا بويىنشا ورتالىقتاندىرىلعان قۇبىر سۋىمەن قامتىلعان حالىقتىڭ ۇلەسى 91،4 پايىزدى قۇراسا، 7 ەلدى مەكەندى اۋىز سۋمەن قامتاماسىز ەتۋ ماقساتىندا ءتيىستى جۇمىستار جۇرگىزىلۋدە. ال ارىستاعى بارلىق ەلدى مەكەندەر 2016-2022 جىلدارعا ارنالعان تابيعي گازبەن قامتاماسىز ەتۋ ءىس-شارا جوسپارىنا سايكەس كەزەڭ-كەزەڭمەن قامتىلاتىن بولادى. ماسەلەن، «بەينەۋ-بوزاي-اقبۇلاق» گاز ماگيسترالى قۇبىرى بويىنداعى №19 اۆتوماتتاندىرىلعان گاز تاراتۋ ستانساسىنان – ارىس قالاسى جانە 5 ەلدى مەكەن كوگىلدىر وتىنمەن قامتاماسىز ەتىلەدى.

 

وقو اكىمىنىڭ باسپا ءسوز قىزمەتى