وڭتۇستىك قازاقستان وبلىسىندا «ارىس جاعاسىندا» رەترو-فەستيۆالى ءوتتى. وڭىردە سەگىزىنشى رەت وتكىزىلىپ وتىرعان مەرەكەلىك كەشتە ەلىمىزگە بەلگىلى تۇردىقىلىش ءىزتاي، مۇحتار قۇرالوۆ، قۇرالاي ساتمۇحانبەتوۆا، لەسبەك امانوۆ، ەرجان سەرىكبايەۆ سىندى كومپوزيتورلاردىڭ اندەرى ورىندالدى.



مەرەكەلىك شاراعا قاتىسقان وبلىس اكىمى ج.تۇيمەبايەۆ بارشا ونەر سۇيەر قاۋىمىن قۇتتىقتاپ، بۇگىنگى شارانىڭ ماڭىزدىلىعىنا توقتالدى.

– قازاق حالقى – ەجەلدەن ونەر سۇيگەن، ونەرپازدارىن قادىرلەگەن حالىق. ال ونەر – ءبىزدىڭ رۋحىمىز. رۋح ەشقاشان دا ولمەيدى. ەڭ قاسيەتتى رۋح حالىقتا دەپ بىلەمىن. سول سەبەپتى دە رۋحانيات حالىقپەن بىرگە ماڭگى جاسايدى. بۇل فەستيۆال بۇگىندە تەك وڭتۇستىك جۇرتىنا عانا ەمەس، بۇكىل ەلگە اتى ءماشھۇر. وڭتۇستىك وڭىردەن شىعىپ، بارشا قازاقتىڭ ماقتانىشىنا اينالعان كومپوزيتورلاردى، ونەر ۇجىمدارى مەن انشىلەردى دارىپتەۋگە، ولاردىڭ شىعارماشىلىعىن ناسيحاتتاۋعا باعىتتالعان بۇل شارا ۇلتتىق ونەردى، جەرگىلىكتى دارىنداردى قولداۋدىڭ الاڭىنا اينالدى، – دەدى اكىم.



جىر كەشىندە جەرگىلىكتى سازگەرلەردىڭ حالىق اراسىندا كەڭىنەن تاراعان 20 ءانى ورىندالدى. فەستيۆالگە ەلىمىزگە تانىمال ونەر جۇلدىزدارى ق ر ەڭبەك سىڭىرگەن قايراتكەرى ۇلىقپان جولداسوۆ، ق ر مادەنيەت قايراتكەرلەرى جۇبانىش جەكسەن ۇلى، شاحيزادا بايپاتشانوۆا، اقبوتا كەرىمبەكوۆالار قاتىستى.

فەستيۆال تاريحى 1992 جىلدان باستاۋ العان. وسى جىلدان باستاپ وبلىستا ءشامشى قالداياقوۆ اتىنداعى «مەنىڭ قازاقستانىم» ءان بايقاۋى وتكىزىلىپ كەلەدى. اتالعان بايقاۋ وتكەن جىلى ءشامشى اعانىڭ تۋعان جەرى وتىرار اۋدانىندا وتكىزىلسە، بيىل سوزاق اۋدانىندا ءوتتى. بايقاۋدىڭ اياسىندا وڭتۇستىك قازاقستان وبلىسىنان شىققان كومپوزيتورلاردىڭ شىعارماشىلىعىن ناسيحاتتاۋ، ولارعا قولداۋ كورسەتۋ ماقساتىندا 2010 جىلدان باستاپ «ارىس جاعاسىندا» رەترو - فەستيۆالى ش.قالداياقوۆتىڭ اتىنا بەرىلگەن وسى گۇلزاردا جىل سايىن وتكىزىلىپ كەلەدى.

وسىمەن سەگىزىنشى رەت ۇيىمداستىرىلعان رەترو-فەستيۆال بيىل دا جوعارعى دەڭگەيدە ءوتتى.

وقو اكىمىنىڭ باسپا ءسوز قىزمەتى

 

https://dalanews.kz/29983