ق ر ۇلتتىق بانكى تۇرعىندار تاراپىنان ءجيى ءتۇسىپ جاتقان وتىنىشتەرگە بايلانىستى ەل اۋماعىندا قولما-قول شەتەل ۆاليۋتاسىمەن ايىربا وپەراسيالارىن جۇزەگە اسىرۋ ءتارتىبىن، سونىڭ ىشىندە بانكنوتالاردى اينالىمعا جارامدى دەپ تانۋ قاعيدالارى مەن ايىرباستان نەگىزسىز باس تارتىلعان جاعدايدا قالاي ارەكەت ەتۋ كەرەكتىگىن ءتۇسىندىردى، دەپ حابارلايدى Dalanews.kz.
سونىمەن اقشا ايىرباستاۋ وپەراسيالارىن جۇزەگە اسىرۋ قاعيدالارىنا سايكەس:
- ءتيىستى ەميتەنت-ەلدىڭ اۋماعىندا زاڭدى قولما-قول تولەم قۇرالى سانالاتىن؛
- ەميتەنت ەلدىڭ انىقتامالىق ماتەريالدارىندا كورسەتىلگەن تولىق سيپاتتاماعا سايكەس كەلەتىن شەتەلدىك ۆاليۋتاداعى بانكنوتالار زاڭدى تولەم قۇرالى تۇرىندە اينالىمعا جارامدى دەپ تانىلادى.
تولەمگە قابىلەتسىز جانە قولدانۋعا جارامسىز شەتەل ۆاليۋتاسىنىڭ بانكنوتالارىن ساتىپ الۋ جانە ساتۋ ءتارتىبى
"ءتيىستى شەت مەملەكەتتىڭ ەميتەنت-بانكى اينالىمنان شىعارعان جاعدايدا، شەتەلدىك ۆاليۋتا بانكنوتالارى — تولەمگە قابىلەتسىز، ال جىرتىلعان، بۇلىنگەن جانە باسقا دا ءمىنى بولسا — جارامسىز دەپ تانىلادى. مۇنداي بانكنوتالاردى ينكاسسالىق وپەراسيا جۇرگىزۋگە شەتەلدىك بانكتەرمەن شارت جاساسقان ۋاكىلەتتى بانكتەر عانا ساتىپ الادى جانە اۋىستىرادى"، دەلىنگەن ۇلتتىق بانك حابارلاماسىندا.
قۇزىرلى ورگان مۇنداي وپەراسيالاردىڭ كوميسسياسى نومينالدى قۇنىنىڭ 10%-نان اسپاۋعا ءتيىس ەكەنىن ەسكە سالادى.
بۇل رەتتە كليەنت ينكاسسو شارتى كورسەتىلگەن جازباشا كەلىسىمگە قول قويادى جانە وعان ەميتەنت-بانك (شەتەلدىك بانك) ايىرباستاۋدان باس تارتۋى مۇمكىن ەكەنى تۋرالى ەسكرەتىلەدى.
اينالىمعا جارامدى شەتەلدىك ۆاليۋتا بانكنوتالارىن ساتىپ الۋ جانە ساتۋ كەزىندە نەگىزسىز باس تارتۋ جاعدايىنداعى ءىس-قيمىل ءتارتىبى
ق ر ۇلتتىق بانكتىڭ مالىمەتىنشە، ەگەر اينالىمعا جارامدى بولسا، قولما-قول شەتەل ۆاليۋتاسىنىڭ نومينالى مەن شىعارۋ جىلىنا شەكتەۋ بولمايدى.
جەكە تۇلعانىڭ قولىندا شەتەلدىك جانە ۇلتتىق ۆاليۋتادا قاجەت سوماسى بولعان جاعدايدا، ايىرباستاۋ پۋنكتى مىنا جاعدايلاردى ەسەپكە الماعاندا، ۆاليۋتا ايىرباستاۋدان باس تارتۋعا قۇقىلى ەمەس:
- كجتقق تۋرالى زاڭ تالاپتارىندا كوزدەلگەن شارالار قولدانىلعاندا؛
- جەكە باسىن كۋالاندىراتىن قۇجاتتى نەمەسە سيفرلىق قۇجات سەرۆيسى ارقىلى جەكە باسىن راستايتىن دەرەكتى ۇسىنباعاندا.
"ايىرباستاۋ وپەراسياسىنان نەگىزسىز باس تارتىلعان جاعدايدا ازاماتتار ايىرباستاۋ پۋنكتى ورنالاسقان جەردەگى ۇلتتىق بانكتىڭ اۋماقتىق فيليالىنا شاعىم تۇسىرۋگە قۇقىلى. شاعىمدا باس تارتۋ سەبەبى تولىق كورسەتىلىپ، زاڭ تالابىنا ساي ءتيىستى شارا قابىلداۋ ءۇشىن قولدا بار قۇجات قوسا بەرىلگەنى ءجون"، دەپ ناقتىلايدى رەتتەۋشى ورگان.
