دٷيسەنبٸ كٷنٸ كەشكٸسٸن نيۋ-يوركتەگٸ حوفسترا ۋنيۆەرسيتەتٸندە اقش پرەزيدەنتتٸگٸنە ٷمٸتكەرلەر اراسىندا ٶتۋگە تيٸس بٸر جارىم ساعاتقا سوزىلاتىن ٷش دەباتتىڭ العاشقىسى ٶتتٸ.
پٸكٸرسايىس تەرتٸبٸ بويىنشا بٸرٸنشٸ كەزەكتە ەكونوميكالىق مەسەلەلەر كٶتەرٸلۋ كەرەك. دەموكراتتار اتىنان ٷمٸتكەر حيللاري كلينتون ٶتە باي امەريكالىقتاردىڭ سالىقتارىن كٶتەرۋ ارقىلى ورتا توپتىڭ, اتاپ ايتقاندا ستۋدەنت جاستار مەن جاس انالاردىڭ ساۋلىعىنا باسىمدىق بەرەتٸنٸن ايتتى.
رەسپۋبليكاشىلدار اتىنان ٷمٸتكەر دونالد ترامپ كورپوراتيۆتٸ سالىقتى قىسقارتۋ ارقىلى بيزنەس-قاۋىمداستىقتى قولدايتىنىن, جاس ٸسكەرلەردٸ امەريكاعا تارتىپ, جۇمىس ورىندارىنىڭ كٶپتەپ اشىلۋىنا جاعداي جاسايتىنىن مەلٸمدەدٸ. ول سونىمەن بٸرگە سالىق كودەكسٸنە ٶزگەرٸستەر ەنگٸزەتٸنٸن دە ايتتى. ول كەزٸندە بيلل كلينتون بەكٸتكەن, باراك وباما قول قويعان سولتٷستٸكامەريكالىق كەلٸسٸمدٸ سىنعا الدى.
قاتىسۋشىلار ەلدەرٸندەگٸ نەسٸلدٸك قارىم-قاتىناس مەسەلەسٸن دە كٶتەردٸ.
كلينتوننىڭ سٶزدەرٸنشە, سوت-تەرگەۋ جٷيەسٸندە نەسٸلدٸك, از ۇلتتارعا قاتىستى كەمسٸتۋشٸلٸك بايقالادى, بۇعان جول بەرمەۋ كەرەك. كلينتون سونىمەن بٸرگە قارۋ-جاراقتى ساتۋ باقىلاۋىن كٷشەيتٸنٸن دە ايتتى.
ترامپ بولسا قۇقىق قورعاۋ ورگاندارىنداعى قىزمەتكەرلەر سانىن ٶسٸرۋ ارقىلى تەرتٸپتٸ كٷشەيتەمٸن دەدٸ.
سىرتقى ساياساتقا قاتىستى كلينتون رەسەيدٸڭ امەريكاداعى پارتييالىق جەنە قوعامدىق قۇرىلىمدارعا قارسى حاككەرلٸك شابۋىلىن سىنعا الدى. ونى بۇل ەلدٸڭ سايلاۋ پروتسەسٸنە كەدەرگٸ جاساۋ دەپ اتاپ ٶتتٸ.
ترامپ بولسا, رەسەيدٸڭ حاككەرلٸك شابۋىلدى جاساعانىن جٶنٸندە ناقتى دەلەلدەر جوق دەدٸ. بٸراق رەسەيدٸڭ زىمىران-يادرولىق ارسەنالىن جاڭارتىپ جاتقانىن قاۋٸپپەن اتاپ ٶتتٸ. بۇعان قۇراما شتاتتار تيٸسٸنشە جاۋاپ بەرگەن جوق دەپ ەسەپتەيدٸ.
ميللياردەر ٷمٸتكەر دونالد ترامپ بۇعان دەيٸن بەتپە-بەت دەباتقا قاتىسقان ەمەس. حيللاري كلينتون 2008 جىلى پرەزيدەنت سايلاۋى الدىندا ٷمٸتكەر باراك وبامامەن دەباتقا شىقتى. اقش-تاعى پرەزيدەنت سايلاۋى 8 قاراشادا ٶتەدٸ.
