سىبايلاس جەمقورلىققا قارسى قىزمەت مادەنيەت جانە سپورت مينيسترلىگىنىڭ بۇرىنعى ۆيسە-مينيسترى ەرلان قوجاعاپانوۆ پەن مەردىگەر ۇيىم باسشىلارىنا قاتىستى تەرگەۋ ءىسىن اياقتادى. ولارعا قىزمەتتىك وكىلەتتىكتەرىن اسىرا پايدالانىپ، 1 ميلليارد تەڭگەدەن استام قاراجاتتى جىمقىردى دەگەن ايىپ تاعىلىپ وتىر، دەپ حابارلايدى Dalanews.kz.
انتيكوردىڭ مالىمەتىنشە، قىلمىستىق ءىس بويىنشا ماتەريالدار وتكەن جىلدىڭ 13 جەلتوقسانىندا باس پروكۋراتۋراعا جىبەرىلىپ، سوتقا جولدانعان.
“ولار قىزمەتتىك وكىلەتتىكتەرىن اسىرا پايدالاندى جانە 1 ملرد تەڭگەدەن استام قاراجاتتى جىمقىردى دەپ ايىپتالىپ وتىر. وتكەن جىلدىڭ 13 جەلتوقسانىندا باس پروكۋراتۋرا كۇدىكتىلەردى سوتقا بەردى”، - دەپ حابارلادى انتيكور.
قىلمىستىق-پروسەستىك كودەكستىڭ 201-بابىنا سايكەس، تەرگەۋ بارىسىنا قاتىستى باسقا اقپارات جاريالانبايدى.
سونىمەن قاتار كونستيتۋسيانىڭ 77-بابى جانە قىلمىستىق-پروسەستىك كودەكستىڭ 19-بابىنا سايكەس، سوت ۇكىمى زاڭدى كۇشىنە ەنگەنگە دەيىن ءاربىر ازامات كىناسىز دەپ تانىلادى.
ەسكە سالايىق، بۇعان دەيىن انتيكور بۇرىنعى مادەنيەت جانە سپورت ۆيسە-مينيسترى ەرلان قوجاعاپانوۆ نە ءۇشىن ۇستالعانىن مالىمدەگەن ەدى.
ەكس-شەنەۋنىك جەمقورلىق دەرەگى بويىنشا ايىپتالىپ وتىر.
"1 ناۋرىزدا سىبايلاس جەمقورلىققا قارسى قىزمەت جاسىرىن ءىس-شارالار ناتيجەلەرى بويىنشا مادەنيەت جانە سپورت ەكس-ۆيسە-مينيسترى قوجاعاپانوۆتى اۋىر جەمقورلىق قىلمىس جاسادى دەگەن كۇدىك بويىنشا ۇستادى.
كوممەرسيالىق ۇيىمنىڭ مۇددەسى ءۇشىن ارەكەت ەتە وتىرىپ، ول 2018 جىلى پەتروپاۆل قالاسىندا قازاقستان رەسپۋبليكاسى مەن رەسەي فەدەراسياسىنىڭ 15ء-شى ونەرارالىق ىنتىماقتاستىق فورۋمىنىڭ كورمەسىن ۇيىمداستىرۋ بويىنشا شارت جاساۋدى قولدانعان. بۇل رەتتە فورۋمدى وتكىزۋ ءۇشىن سمەتا ەكى ەسەگە ءوستى.
بۇل بيۋدجەت قاراجاتى نەگىزسىز جۇمسالۋىنا اكەپ سوقتى. قىلمىستىق جولمەن الىنعان اقشاعا ساتىپ الىنعان مۇلىك انىقتالدى جانە وعان تىيىم سالىنعان"، - دەدى انتيكور وكىلى.
بۇعان دەيىن سىبايلاس جەمقورلىققا قارسى قىزمەت سوتقا دەيىنگى تەرگەپ-تەكسەرۋ شەڭبەرىندە بۇرىنعى مادەنيەت جانە سپورت ۆيسە-مينيسترى اۋىر جەمقورلىق قىلمىس جاسادى دەگەن كۇدىكپەن ۇستالعانىن راستادى.
