«مەملەكەت باسشىسى ازاماتتىق قوعام ينستيتۋتتارىن، ونىڭ ىشىندە ۇلتتىق قوعامدىق سەنىم كەڭەسىن دامىتۋدىڭ ماڭىزدى ەكەنىن ايتتى. بىزگە دە قالالىق قوعامدىق كەڭەسپەن ءوزارا بايلانىستى كۇشەيتۋ قاجەت.
جاقىندا عانا 16 تۇرعىن ءۇي الابىن دامىتۋ بويىنشا قوعامدىق تىڭداۋلار وتكىزدىك. تۇرعىنداردىڭ بارلىق شاعىم-ەسكەرتپەلەرىن تىڭداپ، نەگىزگى ماسەلەلەردى جوسپارعا ەنگىزدىك.
پرەزيدەنت پىكىر الۋاندىعى مەن اشىقتىقتى دامىتۋعا، بەيبىت پىكىر بىلدىرگەن ازاماتتاردىڭ قۇقىعىن قورعاۋعا ۇلكەن ءمان بەرىپ وتىر.
قالا ءماسليحاتىنىڭ شەشىمىمەن رۇقسات بەرىلگەن بەيبىت ميتينگتەر وتكىزۋگە ەكى ارنايى ورىن بولىنگەن. ءبىراق، كەز كەلگەن زاڭبۇزۋشىلىق پەن ءتارتىپتى بۇزۋدىڭ جولى كەسىلەدى. ءبىزدىڭ مىندەتىمىز - تۇرعىنداردىڭ تىنىشتىعىن قامتاماسىز ەتۋ.
جانە ءبىز مەملەكەت وكىلى رەتىندە ازاماتتارىمىزدىڭ مۇددەسىن قورعايمىز. ءبىرىڭعاي ازاماتتىق قۇندىلىقتاردى ەنگىزۋ، كونفەسسياارالىق، ەتنيكاارالىق كەلىسىم مەن ءوزارا قۇرمەتتى ارتتىرۋ جۇمىستارىن كۇشەيتۋىمىز قاجەت»، - دەدى التاي كولگىنوۆ.
اكىمنىڭ ايتۋىنشا، ەلوردادا 130-دان استام ۇلت وكىلدەرى تۇرادى جانە 23 ەتنومادەني بىرلەستىك جۇمىس ىستەيدى.
«بۇل مادەني بايلىقتى ساقتاۋ كەرەك. سونىمەن بىرگە، مەملەكەتتىك ءتىلىمىزدىڭ ءرولىن ارتتىرۋ ماڭىزدى. ول ءۇشىن تۇرعىندار ءتىلىمىزدى تەرەڭىرەك زەردەلەپ، كۇندەلىكتى قولدانعانى ءجون»، - دەدى ا. كولگىنوۆ.
دەرەككوز: قازاقپارات
